Жайхун илҳомлари

Устозларга

Аҳил бир жамоа, мудом оғзи бир,

Мақсадлари улуғ – тарбия-таълим.

Кўнгиллар покиза, йўқдир асло кир,

Уларни аташган – Буюк муаллим!

 

Улар оддий эди, оддийлик – хислат,

Болани боладай суяр эдилар.

Ибройим Машариф, Шомурод Давлат,

Элнинг эртаси деб куяр эдилар.

 

Уларнинг сардори Исмоил устоз,

Адолат, қатъият унга ёр эди.

Ҳар бир дарси – мактаб, ёшларга парвоз,

Йўлдош Матқурбондай инсон бор эди.

 

Аминбой оғанинг ўргатган ҳарфи,

Маърифати билан дунёни кездим.

Мирза ака, Кенжабой, Ўрозбой оға,

Қаршисида ўзни энг ғариб сездим.

 

Маматсолий ака, Эгам Саидлар,

Аниқ фанлар аро султон эдилар.

Мозийдан сўз очса, Турсунбой устоз,

Буюклар синфда гирён эдилар.

 

Ҳар бир ўгитида маъно мужассам,

Сўзларим ғарибдир, таърифлар ҳам оз.

Билим ҳам тажриба таҳлил ила жам,

Қалбимизда яшар Назаримбат устоз.

 

Марҳумларнинг ёди қалбимиздадир,

Руҳларини доим қилиб туринг шод.

Тирикларга  ҳурмат тилимиздадир,

Дуоларда мудом қилиб туринг ёд.

 

Ана, даврададир Ражаббой устоз,

Адабий дунёга етаклаб кирган.

Ҳар битта болага ишонч ва парвоз,

Қанотлар бахш этган Машариф устоз.

 

Ражаббой, Тўрабой, Сапарбой оға,

Янгибой оғалар бир дунё эди.

Муаллима опалар дарси олдида,

Ҳатто эртаклар ҳам бўш, саёз эди.

 

Азизлар, Сизлардан кўп эрур қарзим,

Камтарин покиза, ҳокисор устоз.

Бугун пойингизда қиламан таъзим,

Сизгадир эҳтиром, сизгадир эъзоз.

Санобар Хўжамуродова,

40-сонли мактаб директори.

 

Амударём

Жайхун бўйларида гуллаб-яшнаган,

Манзилим-маконим, жон Амударём.

Ўзга юртга зарра ҳавасим йўқдир,

Ўзинг шараф-шоним, жон Амударём.

Ўғил-қизларингда шижоат бугун,

Имон-у эътиқод, итоат бугун.

Шу сабаб юртимда ҳаловат бугун,

Осуда осмоним, жон Амударём.

Қўли гул, миришкор, деҳқонларинг бор,

Ҳар соҳада бўлар зафар сенга ёр.

Бахтиёр инсонлар юрти бу диёр,

Азал бойлик кони, жон Амударём.

Янги Ўзбекистон – уйинг сеники,

Қадим-кўҳна қўшиқ, куйинг сеники.

Мустақиллик, Наврўз тўйинг сеники,

Мудом қувонч оним, жон Амударём.

Шомурод, шаънингга ғазал битарман,

Қўлга созим олиб, куйлаб ўтарман.

Эллар ичра номинг довруғ этарман,

Тилимда достоним, жон Амударём.

Шомурод ХЎЖАНОВ, Дўрман овули.

 

 

Яхшилар

Яхшиларга бу жоним фидо,

Ёмонларга кўрсатар Худо.

Юз бурмасин ёмонликка деб,

Яхшиларга айладим нидо.

Ёмонлардан чиқмайди ҳожат,

Яхшилардан топилар нажот.

Яхшилардан юк ерда қолмас,

Яхшилар бор, мазмунли ҳаёт.

Яхшиларда кўп яхши сўзлар,

Қувончлардан ёш тўксин кўзлар.

Яхшиларга интилар борлиқ,

Яхшиликдан эрийди музлар.

Яхшиларга жон бахшидадир,

Яхши бўлсин доимо йўлдош.

Яхшилар-ла яшаш яхшидир,

Яхшилардир ҳар ишда қўлдош.

Бекберган Тлеумуратов,

Қипчоқ ОФЙ.

 

Ҳаётинг олдинда

Ўғлим, кенг дунёда ҳаётинг олдда,

Босган қадамингнинг бариси ортда.

Шўх-шодон ўйнаган болалик ўтиб,

Ўйнаб юрган вақтлар сарфин унутиб.

Умид қилган ишинг амалга ошир,

Умр ўтгувчидир, ўзингни шошир.

Яқин йўлдошингга дўст бўла билгил,

Қинғир қилиқ эмас, яхшилик қилғил.

Айёр кўрсанг, домига тушма,

Ширин гапирар, деб сўзига учма.

Боғда доим гулмас, тикон ҳам ўсар,

Чақир тикон гулнинг йўлини тўсар.

Ҳар жой, ҳар кўчада ортдан отиб тош,

Душманинг кўзингга кўринса ювош,

Бундан огоҳ бўлиб омон ўтгайсан,

Бахт қушини ушлаб, қўлда тутгайсан.

Ғамларни кулиб енг, қайғудан чекин,

Эзгу ишларингни унутма лекин.

Йўлдан адаштириб кетгувчилар бор,

Суринсанг, устингдан кулгувчилар бор.

Айтганларим баъзан чўпчакка ўхшаб,

Туюлмасин сенга, пандим ол тўхтаб.

Доно гаплар айтар уйнинг қариси,

Булар бошдан ўтган бари-бариси.

Жумабой ҲИДОЯТОВ,

«Жайхун илҳомлари» ННТ аъзоси.

 

Юлдузим

Юлдузлар кўринмас осмонимда ҳеч,

Порлаб турар эди умид бахш этиб.

Хатони ўнглашга балки бўлди кеч?

Хавф-у хатарларда қолдик толиқиб.

Инсонлар ўзгарди вақт ўтган сари,

Балки шунинг учун хирадир юлдуз?

Меҳр-у оқибат ва эътибор қани?

Кўнгиллар гўёки қаҳратон қиш, муз.

Бўлармиш инсоннинг бахт юлдузи,

Бахтиёр бўлса гар қуёшдай порлар.

Ўша юлдуз порлаб кеча-кундузи,

Инсонни орзулар йўлига чорлар.

Ҳаёт синовлари ёмон қийнади,

Менинг юлдузимни тўсди булутлар.

Аммо орзуларни кўзим қиймади,

Улардан кечмадим, тўзди булутлар.

Ана, порлаб кетди яна юлдузим,

Меҳр нури тушиб ёришди йўлим.

Муҳайё Жумабоева,

82-мактаб ўқувчиси.

 

Ёмғир

Ёғса ёмғир майдалаб,

Майсаларни эркалаб.

Ер юзини сийпалаб,

Баракадан даракдир.

Деҳқонга мададкор у,

Меҳнат-ла далада у.

Яхшиликка бурканур,

Дунё ҳусни очилур.

Гоҳ булутнинг ортидан,

Мўралайди ер томон.

Гоҳида шўхлик қилиб,

Шовуллайди беором.

Юзларимни чимчилаб,

Ғуборларим аритгин.

Дилимдаги ғамларим,

Ўзинг-ла олиб кетгин.

Муродбой Мадияров,

51-мактаб ўқитувчиси.

 

Фанлар

Фанлар гўё бир дунё –

Оқади дарё бўлиб.

Дўстим, ўқи, тил ўрган,

Адашмайди тил билган.

Математика фанлар шоҳи,

Она тили санъатдир.

Рус тили тамал тоши –

Тил билмоқ-чун даъватдир.

Физикани билсанг гар,

Кимёга қилгунг сафар.

Биология билан,

Яшагинг келаверар.

Рус тили ҳамда инглиз,

Немис, испан, француз.

Тилларин билган ютар,

Араб-у Ҳиндга етар.

Муниса Тўремурадова,

6-мактаб ўқувчиси.

 

Орзу

Номингни танитиш мақсад қилганман,

Қалқон қилиб олдим виждон-иймонни.

Мен ҳали кўкларга олиб чиқаман,

Бошимга кўтариб Ўзбекистонни!

Энг катта бойлигим ўзингсан, юртим,

Юксалишинг учун тикаман жоним.

Мен ҳали дунёга олиб чиқаман,

Елкамга опичиб Ўзбекистонни!

Юртимнинг азамат ўғлонлари бор,

Ватан учун аямас жон ила қонни.

Биз ҳали кўкларга олиб чиқамиз,

Бошларга кўтариб Ўзбекистонни!

Мадина ҲАСАНБОЕВА, 2-сонли касб-ҳунар мактаби ўқувчиси.

 

ОИЛАМИЗ

Оиламизда беш киши,

Яшаймиз  аҳил-иноқ.

Ҳамжиҳатмиз доимо,

Бир-биримиздан қувноқ.

Дадам, онам ишлайди,

Укам ва мен ўқувчи.

Жуда эрка сингилчам,

Айтганин қилдиргувчи.

Меҳмон келиб қолса гар,

Биз онамга  дастёр.

Уйимиз файзга тўлар,

Бизга доим бахт ёр.

Гуласал МАХСУДОВА,

76-мактаб ўқувчиси.