Oʻzini oʻzi band qilib, daromad topayotgan xotin-qizlar tajribasi ommalashtirilmoqda

Amudaryo tumanida faoliyat yuritayotgan “Jayxun ilhomlari” nodavlat notijorat tashkiloti tomonidan “Besh tashabbus – besh imkoniyat” nomli grant loyihasi doirasida joylarda turli tadbirlar, uchrashuvlar, tanlovlar oʻtkazilib kelinmoqda.

Loyihaning ish rejasi doirasida “Taraqqiyot koʻzgusi” gazetasi tahririyati bilan hamkorlikda manzilli qoʻllab-quvvatlash daftarlariga kiritilgan yoshlarning adabiyotga qiziqishini oshirish va isteʼdodlarini yuzaga chiqarish maqsadida ular oʻrtasida turli mavzularda insholar tanlovlari oʻtkazilib, gʻolib va sovrindorlari tashkilot tomonidan ragʻbatlantirib kelinmoqda. Bundan tashqari, manzilli qoʻllab-quvvatlash daftariga kiritilgan yoshlar uchun maktablarda “Kompyuter texnologiyalari va internetdan samarali foydalanish” mavzusida ochiq darslar oʻtkazildi.

Shuningdek, “Taraqqiyot koʻzgusi” va amunews.uz veb-sayti tahririyatlari bilan hamkorlikda yoshlar maʼnaviyatini yuksaltirish, ular oʻrtasida kitobxonlikni keng targʻib qilish boʻyicha tizimli ishlarni tashkil etish maqsadida manzilli qoʻllab-quvvatlash daftarlariga kiritilgan yoshlarning ijod namunalari gazeta va mahalliy televideniyeda yoritib borilmoqda.

Shu toifadagi yoshlar bilan ishlashish, ularning maʼnaviyatini yuksaltirish, kitobxonlikni keng targʻib qilish maqsadida tumanning ovul hududlarida yashovchi yoshlar uchun “Kitoblar karvoni” ham tashkil etilmoqda.

Bundan tashqari, tashkilot manzilli qoʻllab-quvvatlash daftarlariga kiritilgan xotin-qizlarning bandligiga koʻmaklashish maqsadida oʻzini oʻzi band qilgan holda uy sharoitida mehnat qilib, daromad topayotgan ayol-qizlar haqida maqola va informatsion lavhalar tayyorlash orqali ularni boshqalarga oʻrnak qilib koʻrsatish, shu yoʻl bilan ayol-qizlarning bandligini taʼminlashga hissa qoʻshishni ham oʻz oldiga vazifa qilib qoʻygan.

Shu maqsadda tashkilot xodimlari tumanning Oybek nomli mahallasi hududida yashovchi ishbilarmon ayol Saida Nurimbetova xonadonida boʻlib, uning chevarlik bobidagi ishlari bilan yaqindan tanishdilar.

Saida Nurimbetova ayni kunlarda anʼanaviy quroq, koʻrpacha, dasturxon, chimildiq kabi mahsulotlarni tikib tayyorlash bilan shugʻullanadi. Bu iqtidor Saidaga onasi Gulxadicha opa tomonidan meros boʻlib qolgan. Bugungi kunda Saidaning oʻzi ham oʻnlab shogirdlar yetishtirgan tajribali ustozga aylangan.

Saida Nurimbetova bu hunar bilan jiddiy shugʻullana boshlaganiga 6-yildan oshdi. Uning shogirdlari bilan birgalikda tayyorlanayotgan toʻy koʻrpachalari, chimildiqlari, toʻy dasturxonlari xaridorlar tomonidan buyurtma asosida sotib olinmoqda.

Saida Nurimbetova kabi ishbilarmonlarning kun sayin safi ortib borayotganligi mahallada xotin-qizlarning bandligini taʼminlash borasidagi ishlarini hukumat qarorlari asosida yoʻlga qoʻyilganligining yaqqol dalilidir.

Mahallada tadbirkorlik ishlari bilan shugʻullanish istagini bildirgan ayol-qizlar uchun har tomonlama amaliy yordamlar koʻrsatilmoqda. Bu esa oʻzining ijobiy samarasini berib, natijada mahalla ayol-qizlari ish bilan band boʻlib, bu ishini oʻz oilasi uchun daromad manbaiga aylantirib bormoqdalar.

Oʻrozali Reimov, “Jayxun ilhomlari” NNT raisi