Fermer xoʻjaliklarida gʻalladan boʻshagan yer maydonlariga takroriy ekinlar ekilmoqda

Maʼlumki, gʻalladan boʻshagan maydonlarga sabzavot, poliz, kartoshka ekinlarni ekib, takroriy ekin sifatida yetishtirish aholining kuz-qish mavsumlari hamda kelasi yilning may oyigacha boʻlgan muddatlarda qishloq xoʻjaligi mahsulotlariga boʻlgan talabini qondirish, mahsulotni eksportga chiqarish, qish mavsumiga saqlash hamda bozorlarda narxlarning barqarorligini taʼminlash imkoniyatini beradi. Qolaversa, fermer xoʻjaliklarida va tomorqa yerlardan oqilona foydalanish orqali 2-3 marotaba hosil olish va kattagina daromad olish mumkin.

Amudaryo tumanida yerdan unumli foydalanib, har yili moʻl hosil olish orqali oʻz oilasining va hamqishloqlarining dasturxonlari toʻkinligiga, qolaversa, bozorlarimizda narx-navoning barqaror boʻlishiga hissa qoʻshayotgan mirishkor dehqonlar, tajribali tomorqachilar va ishbilarmon fermerlar juda koʻp. Ularning fidoyi mehnatlarining samarasi sifatida bugun qishloq xoʻjaligi mahsulotlari yilning toʻrt faslida ham savdo rastalari va doʻkonlarda maqbul narxlarda sotilmoqda.

Amudaryo tumanidagi “Allaberganov Izzatjon” fermer xoʻjaligi raisi Umidjon Allaberganov 2015-yilda yaxshi niyatlar bilan fermer xoʻjaligini tashkil etdi. Xoʻjalikning umumiy ekishlik yer maydoni 60 gektar boʻlib, 25 nafar pudratchi va 10 nafar ishchi faoliyat yuritadi. Tajribali fermer har yili gʻalladan boʻshagan yer maydonlarini ijtimoiy himoyaga muhtoj, kam taʼminlangan oilalarga va ishsiz yoshlarga ularning xohishiga qarab ajratib beradi.

Shunday yoshlardan biri fermerdan yer olib, oʻz mehnatsevarligi bilan tengdoshlariga oʻrnak boʻlayotgan Diyorbek Ashirovdir.

Fermer xoʻjaligida ayni kunlarda asosan sabzi, osh lavlagi, gulkaram, piyoz, turp, sholgʻom, bodring, sarimsoqpiyoz, koʻkatlar, sabzavot hamda kartoshkalar ekilmoqda. Ijtimoiy himoya daftarlarida turuvchi aholiga fermer tomonidan yer maydonlari ajratib berilgani ularning daromad manbaiga ega boʻlishiga, qolaversa bozor rastalarining arzon va sifatli qishloq xoʻjaligi mahsulotlari bilan taʼminlanishiga katta hissa boʻlib qoʻshilmoqda.

2002-yilda oʻz faoliyatini yoʻlga qoʻygan tajribali fermerlardan biri –“Beshboyev Qurbongʻali” fermer xoʻjaligi rahbari Qurbongʻali Beshboyev ham fermer xoʻjaligidagi 73 gektar ekishlik yer maydonining 47 gektariga paxta, 14 gektariga gʻalla ekkan edi.

Endilikda fermer gʻalladan boʻshagan yer maydonlarini “Temir daftar”, “Ayollar daftari”, “Yoshlar daftari”da turuvchi ishsiz fuqarolarning 50 nafariga shudgorlatib, ekin ekishga tayyor holatda ajratib berdi. Bandligi taʼminlangan aholi oʻzlariga koʻrsatilgan bu kabi eʼtibor va daromad topishlari uchun yaratilgan sharoitdan mamnun boʻlib, dalalarda javlon urib mehnat qilishmoqda.

Shu oʻrinda aytish kerakki, bugungi kunda poliz ekinlaridan qovun, tarvuz, tariq, mosh, loviya, sabzavotlardan qalampir va boshqa kabi ekinlarini ekib yetishtirish avvalo takroriy ekin hilma-xilligini, ushbu ekinlarni ishlab chiqarish hajmini oshirishga zamin boʻlmoqda. Qolaversa, aholining bandligi taʼminlanishida ham muhim ahamiyat kasb etmoqda.

Tuman hokimligining Axborot xizmati.