Фермер хўжаликларида ғалладан бўшаган ер майдонларига такрорий экинлар экилмоқда

Маълумки, ғалладан бўшаган майдонларга сабзавот, полиз, картошка экинларни экиб, такрорий экин сифатида етиштириш аҳолининг куз-қиш мавсумлари ҳамда келаси йилнинг май ойигача бўлган муддатларда қишлоқ хўжалиги маҳсулотларига бўлган талабини қондириш, маҳсулотни экспортга чиқариш, қиш мавсумига сақлаш ҳамда бозорларда нархларнинг барқарорлигини таъминлаш имкониятини беради. Қолаверса, фермер хўжаликларида ва томорқа ерлардан оқилона фойдаланиш орқали 2-3 маротаба ҳосил олиш ва каттагина даромад олиш мумкин.

Амударё туманида ердан унумли фойдаланиб, ҳар йили мўл ҳосил олиш орқали ўз оиласининг ва ҳамқишлоқларининг дастурхонлари тўкинлигига, қолаверса, бозорларимизда нарх-навонинг барқарор бўлишига ҳисса қўшаётган миришкор деҳқонлар, тажрибали томорқачилар ва ишбилармон фермерлар жуда кўп. Уларнинг фидойи меҳнатларининг самараси сифатида бугун қишлоқ хўжалиги маҳсулотлари йилнинг тўрт фаслида ҳам савдо расталари ва дўконларда мақбул нархларда сотилмоқда.

Амударё туманидаги “Аллаберганов Иззатжон” фермер хўжалиги раиси Умиджон Аллаберганов 2015 йилда яхши ниятлар билан фермер хўжалигини ташкил этди. Хўжаликнинг умумий экишлик ер майдони 60 гектар бўлиб, 25 нафар пудратчи ва 10 нафар ишчи фаолият юритади. Тажрибали фермер ҳар йили ғалладан бўшаган ер майдонларини ижтимоий ҳимояга муҳтож, кам таъминланган оилаларга ва ишсиз ёшларга уларнинг хоҳишига қараб ажратиб беради.

Шундай ёшлардан бири фермердан ер олиб, ўз меҳнатсеварлиги билан тенгдошларига ўрнак бўлаётган Диёрбек Ашировдир.

Фермер хўжалигида айни кунларда асосан сабзи, ош лавлаги, гулкарам, пиёз, турп, шолғом, бодринг, саримсоқпиёз, кўкатлар, сабзавот ҳамда картошкалар экилмоқда. Ижтимоий ҳимоя дафтарларида турувчи аҳолига фермер томонидан ер майдонлари ажратиб берилгани уларнинг даромад манбаига эга бўлишига, қолаверса бозор расталарининг арзон ва сифатли қишлоқ хўжалиги маҳсулотлари билан таъминланишига катта ҳисса бўлиб қўшилмоқда.

2002 йилда ўз фаолиятини йўлга қўйган тажрибали фермерлардан бири –“Бешбоев Қурбонғали” фермер хўжалиги раҳбари Қурбонғали Бешбоев ҳам фермер хўжалигидаги 73 гектар экишлик ер майдонининг 47 гектарига пахта, 14 гектарига ғалла эккан эди.

Эндиликда фермер ғалладан бўшаган ер майдонларини “Темир дафтар”, “Аёллар дафтари”, “Ёшлар дафтари”да турувчи ишсиз фуқароларнинг 50 нафарига шудгорлатиб, экин экишга тайёр ҳолатда ажратиб берди. Бандлиги таъминланган аҳоли ўзларига кўрсатилган бу каби эътибор ва даромад топишлари учун яратилган шароитдан мамнун бўлиб, далаларда жавлон уриб меҳнат қилишмоқда.

Шу ўринда айтиш керакки, бугунги кунда полиз экинларидан қовун, тарвуз, тариқ, мош, ловия, сабзавотлардан қалампир ва бошқа каби экинларини экиб етиштириш аввало такрорий экин ҳилма-хиллигини, ушбу экинларни ишлаб чиқариш ҳажмини оширишга замин бўлмоқда. Қолаверса, аҳолининг бандлиги таъминланишида ҳам муҳим аҳамият касб этмоқда.

Туман ҳокимлигининг Ахборот хизмати.