EKOLOGIK PARTIYaDAN OʻZBEKISTON RESPUBLIKASI PREZIDENTLIGIGA NOMZODNING IShONChLI VAKILI AMUDARYoLIK SAYLOVChILAR BILAN UChRAShDI

Oʻzbekiston Respublikasi Markaziy saylov komissiyasining qaroriga koʻra yurtimizda faoliyat yuritayotgan Xalq demokratik partiyasi, Tadbirkorlar va ishbilarmonlar harakati – Oʻzbekiston leberal-demokratik partiyasi, “Adolat” sotsial-demokratik partiyasi hamda Oʻzbekiston Ekologik partiyasidan koʻrsatilgan nomzodlar roʻyxatga olinib, qariyb bir oy vaqtdan beri nomzodlarning saylovoldi tashviqoti davom etmoqda.

Oʻzbekiston Respublikasi Prezidentligiga nomzodlar, ularning ishonchli vakillari hududlarda saylovchilar bilan uchrashib, saylovoldi dasturlari bilan tanishtirmoqda.

3-iyul kuni Amudaryo tumanidagi 9-sonli Bolalar musiqa va sanʼat maktabi binosida Oʻzbekiston Ekologik partiyasidan Oʻzbekiston Respublikasi Prezidentligiga nomzod Abdishukur Xamzayevning ishonchli vakili – Oliy Majlis Qonunchilik palatasi deputati Laylo Seitovaning amudaryolik saylovchilar bilan uchrashuvi boʻlib oʻtdi.

Uchrashuvda Oliy Majlis Qonunchilik palatasi deputati Turgunbay Xojanazarov, Ekologik partiyaning Qoraqalpogʻiston Respublikasi ijroiya qoʻmitasi raisi Oysanam Begimova, partiyaning tuman Kengashi raisi Saʼdulla Sodiqov, partiya aʼzolari, faollar, keng jamoatchilik vakillari qatnashdilar.

Uchrashuvda nomzodning ishonchli vakili Laylo Seitova saylovchilarni Abdushukur Hamzayevning tarjimai holi va 9 ta banddan iborat saylovoldi dasturi bilan tanishtirdi. Ayniqsa dasturda Orolboʻyida ekologik muhitni yaxshilash, chiqindilarni saralash, tashish va qayta ishlash, atmosferaning zararli gazlar va chiqindilar bilan ifloslanishining oldini olish muammolariga ulkan eʼtibor qaratilgani, bu borada tezkor choralar koʻrish lozimligi belgilangani qayd etib oʻtildi.

Ishonchli vakil qayd etishicha, Oʻzbekiston Respublikasi Prezidentligiga ekologik partiyadan nomzod Abdushukur Xamzayevning saylovoldi dasturida mamlakatda iqtisodiyotni isloh qilishga qaratilgan muhim tashabbuslar ilgari surilmoqda. Jumladan, pestitsidlardan foydalanishdan voz kechishga yoʻnaltirilgan “Yashil Oʻzbekiston – 2030” dasturini, tarmoqlar va hududlarning “Yashil iqtisodiyotga oʻtish indeksi”ni ishlab chiqish, “Yashil viza” dasturini joriy etish, yuk tashishni yirik mashinalardan temir yoʻllarga oʻzgartirishga qaratilgan choralarni amalga oshirish koʻzlanmoqda.

Shuningdek, shaharlar bosh rejalarini tuzishda kamida 30 foiz yashil maydonlar yaratish, shaharsozlik faoliyatida jamoatchilik nazoratini kuchaytirish, normativ hujjatlarni qabul qilishda atrof-muhitga taʼsirini baholash tizimini joriy etish kabi muhim tashabbuslar ilgari surilayotgani alohida taʼkidlandi.

Uchrashuvda Laylo Saitova xalqimizning kelajagi uchun zarur buningdek rejalarning amalga oshishi, ekologik vaziyatning yaxshilanishiga hissa qoʻshish uchun 9-iyul kuni boʻlib oʻtadigan Oʻzbekiston Respublikasi Prezidenti saylovida Ekologik partiya nomzodi Abdishukur Xamzayevga ovoz berishga chaqirdi.

Uchrashuvda Ekologik partiya tuman Kengashi raisi Saʼdulla Sodiqov, partiya Qoraqalpogʻiston Respublikasi ijroiya qoʻmitasi raisi Oysanam Begimovalar ham barchani saylovda faol qatnashib, Abdushukur Xamzayevning nomzodini qoʻllab-quvvatlashga chaqirdilar.

Uchrashuvda saylovchilar ham nomzodning saylovoldi dasturiga oʻz munosabatlarini bildirdilar.

Oygul RAJABOVA.