ЭКОЛОГИК ПАРТИЯДАН ЎЗБЕКИСТОН РЕСПУБЛИКАСИ ПРЕЗИДЕНТЛИГИГА НОМЗОДНИНГ ИШОНЧЛИ ВАКИЛИ АМУДАРЁЛИК САЙЛОВЧИЛАР БИЛАН УЧРАШДИ

Ўзбекистон Республикаси Марказий сайлов комиссиясининг қарорига кўра юртимизда фаолият юритаётган Халқ демократик партияси, Тадбиркорлар ва ишбилармонлар ҳаракати – Ўзбекистон леберал-демократик партияси, “Адолат” социал-демократик партияси ҳамда Ўзбекистон Экологик партиясидан кўрсатилган номзодлар рўйхатга олиниб, қарийб бир ой вақтдан бери номзодларнинг сайловолди ташвиқоти давом этмоқда.

Ўзбекистон Республикаси Президентлигига номзодлар, уларнинг ишончли вакиллари ҳудудларда сайловчилар билан учрашиб, сайловолди дастурлари билан таништирмоқда.

3 июль куни Амударё туманидаги 9-сонли Болалар мусиқа ва санъат мактаби биносида Ўзбекистон Экологик партиясидан Ўзбекистон Республикаси Президентлигига номзод Абдишукур Хамзаевнинг ишончли вакили – Олий Мажлис Қонунчилик палатаси депутати Лайло Сеитованинг амударёлик сайловчилар билан учрашуви бўлиб ўтди.

Учрашувда Олий Мажлис Қонунчилик палатаси депутати Тургунбай Хожаназаров, Экологик партиянинг Қорақалпоғистон Республикаси ижроия қўмитаси раиси Ойсанам Бегимова, партиянинг туман Кенгаши раиси Саъдулла Содиқов, партия аъзолари, фаоллар, кенг жамоатчилик вакиллари қатнашдилар.

Учрашувда номзоднинг ишончли вакили Лайло Сеитова сайловчиларни Абдушукур Ҳамзаевнинг таржимаи ҳоли ва 9 та банддан иборат сайловолди дастури билан таништирди. Айниқса дастурда Оролбўйида экологик муҳитни яхшилаш, чиқиндиларни саралаш, ташиш ва қайта ишлаш, атмосферанинг зарарли газлар ва чиқиндилар билан ифлосланишининг олдини олиш муаммоларига улкан эътибор қаратилгани, бу борада тезкор чоралар кўриш лозимлиги белгилангани қайд этиб ўтилди.

Ишончли вакил қайд этишича, Ўзбекистон Республикаси Президентлигига экологик партиядан номзод Абдушукур Хамзаевнинг сайловолди дастурида мамлакатда иқтисодиётни ислоҳ қилишга қаратилган муҳим ташаббуслар илгари сурилмоқда. Жумладан, пестицидлардан фойдаланишдан воз кечишга йўналтирилган “Яшил Ўзбекистон – 2030” дастурини, тармоқлар ва ҳудудларнинг “Яшил иқтисодиётга ўтиш индекси”ни ишлаб чиқиш, “Яшил виза” дастурини жорий этиш, юк ташишни йирик машиналардан темир йўлларга ўзгартиришга қаратилган чораларни амалга ошириш кўзланмоқда.

Шунингдек, шаҳарлар бош режаларини тузишда камида 30 фоиз яшил майдонлар яратиш, шаҳарсозлик фаолиятида жамоатчилик назоратини кучайтириш, норматив ҳужжатларни қабул қилишда атроф-муҳитга таъсирини баҳолаш тизимини жорий этиш каби муҳим ташаббуслар илгари сурилаётгани алоҳида таъкидланди.

Учрашувда Лайло Саитова халқимизнинг келажаги учун зарур бунингдек режаларнинг амалга ошиши, экологик вазиятнинг яхшиланишига ҳисса қўшиш учун 9 июль куни бўлиб ўтадиган Ўзбекистон Республикаси Президенти сайловида Экологик партия номзоди Абдишукур Хамзаевга овоз беришга чақирди.

Учрашувда Экологик партия туман Кенгаши раиси Саъдулла Содиқов, партия Қорақалпоғистон Республикаси ижроия қўмитаси раиси Ойсанам Бегимовалар ҳам барчани сайловда фаол қатнашиб, Абдушукур Хамзаевнинг номзодини қўллаб-қувватлашга чақирдилар.

Учрашувда сайловчилар ҳам номзоднинг сайловолди дастурига ўз муносабатларини билдирдилар.

Ойгул РАЖАБОВА.