“Sabirova Malika” fermer xoʻjaligida gʻalla oʻrimi avjida

Shu kunlarda yurtimizda gʻalla oʻrim-yigʻimi qizgʻin pallaga kirgan. Zahmatli mehnat evaziga yetishtirilgan hosilni nest-nobud qilmay yigʻib olish uchun gʻallakorlar bor kuch va imkoniyatini ishga solgan.

Amudaryo tumanida ham 2023-yilgi gʻalla hosili uchun tumandagi 361 ta fermer xoʻjaliklarining jami 7000 gektar yer maydoniga gʻalla urugʻlari ekilgan edi. “Qipchoq gʻalla klasteri” masʼuliyati cheklangan jamiyati 5861 gektar, “Amu Rich Harvest” masʼuliyati cheklangan jamiyati 1139 gektar ekin maydonlarida yetishtirilgan gʻalla hosilini xarid qilish boʻyicha fermer xoʻjaliklari bilan shartnoma imzolashgan.

Tuman boʻyicha joriy yilgi mavsumda gʻalla klasterlarining qabul maskanlariga qabul qilinadigan jami don miqdori 16 ming 460 tonnani tashkil etadi. Yetishtirilgan hosilning 1450 tonnasi urugʻlik don uchun, 8000 tonnasi esa isteʼmol uchundir.

 Undan tashqari, joriy yilgi hosildan 7010 tonna don mahsuloti birja savdolari uchun vaqtincha saqlashga yoʻnaltiriladi.

 Tumanda gʻalla oʻrimiga tushayotgan fermer xoʻjaliklari birin-ketin belgilangan shartnoma rejasini ortigʻi bilan bajarishmoqda. Fermer xoʻjaliklari yerlarga ekilgan gʻalla maydonlarida allaqachon hosilni nobud qilmasdan yigʻib olish ishlari avjiga chiqqan. Bundan maqsad bitta – ona xalqimiz dasturxoni toʻkin-sochinligiga hissa qoʻshish.

Amudaryo tumanining Oq oltin ovuli hududidagi “Sabirova Malika” fermer xoʻjaligining 18 gektar maydoniga ekinlgan gʻalla ham toʻliq pishib yetilgan boʻlib, ayni kunlarda oʻrim-yigʻim ishlari uyushqoqlik bilan amalga oshirilmoqda.

Fermer xoʻjaligi raisi Gʻulomjon Ollabergenov ham tumandagi boshqa fermer xoʻjalik rahbarlari singari yetilib pishgan bugʻdoyni nes-nobud qilmasdan oʻrib-yigʻib olishga harakat qilmoqda.

Oʻzlarining zahmatkash mehnati bilan hosilni yigʻib olishga hissa qoʻshayotgan kombayn haydovchilarining ham xizmatlari katta boʻlmoqda.

Shu oʻrinda aytish kerakki, gʻalla – xalq boyligi, bobodehqonlarning ertayu kech qilgan mehnatlarining samarasi, xalqimizning rizqu nasibasidir. Ana shu bebaho nematning bir misqolini ham nobud qilmasdan oʻrib olish ishlarida faol ishtirok etish bugungi kunda har bir mutasaddining asosiy vazifasidir.

Tuman hokimligining Axborot xizmati.