Umumtaʼlim maktabni oltin hamda kumush medallar bilan tugatgan oʻquvchilarni taqdirlash marosimi boʻlib oʻtdi

Bugungi kunda mamlakatimizning barcha joylarida boʻlgani singari Amudaryo tumanidagi umumiy oʻrta taʼlim maktablarida ham bitiruvchi sinf oʻquvchilari yakuniy imtihonlarni tamomlab, katta hayotga yoʻllanma olmoqdalar. 2 ming 704 nafar amudaryolik oʻquvchi-yoshlar mehribon ustozlari, qadrdon maktabi bilan xayrlashib, oliy taʼlim dargohlariga hujjat topshirishmoqda.

19-iyun kuni tuman hokimligi binosida 2022-2023 oʻquv yilida umumiy oʻrta taʼlim maktablarini oltin va kumush medallar bilan tamomlagan hamda fanlar olimpiadasi va turli tanlovlarda muvaffaqiyatga erishgan oʻquvchilarni taqdirlash marosimi boʻlib oʻtdi.

Unda tuman hokimi Sultonboy Yoʻldashev, sektorlar rahbarlari, tuman hokimi oʻrinbosarlari, Maktabgacha va maktab taʼlimi boʻlimi masʼullari, maktab direktorlari hamda ota-onalar ishtirok etishdi.

Maʼlumot uchun, joriy oʻquv yilida Amudaryo tumani boʻyicha 36 nafar oʻquvchi maktabni oltin va 11 nafar oʻquvchi kumush medal bilan bitkazdilar. Undan tashqari, 50 nafar oʻquvchi ingliz tilini bilish darajasi boʻyicha Xalqaro B2, 5 nafar oʻquvchi esa Xalqaro S1 sertifikatini qoʻlga kiritgan boʻlsa, 1 nafar bitiruvchi asosiy fanlar olimpiadasining Qoraqalpogʻiston Respublikasi sovrindori boʻldi.

Tadbir davomida tuman hokimi Sultonboy Yoʻldashev, bitiruvchilarni maktabni muvaffaqiyatli tugatgani bilan tabriklab, oʻzlari sevgan va tanlagan kasb-hunarlarni va mutaxassisliklarni egallab, Vatanimiz koriga yaraydigan munosib farzand boʻlishlariga ishonch bildirdi.

 Shuningdek, tuman hokimi bilimdon oʻquvchilarning maktab direktorlariga, ularga taʼlim va tarbiya bergan fidoiy oʻqituvchilar hamda ota-onalarga minnatdorchilik bildirib, bundan keyin ham barkamol avlodni tarbiyalab, voyaga yetkazishlarida kuch-gʻayrat tiladi.

Tadbirda tuman Maktabgacha va maktab taʼlimi boʻlimi mudirasi Saida Sadikova bitiruvchi yoshlarni yetuklik shahodatnomalarini olib, katta hayotga qadam tashlaganliklari bilan qutlab, keyingi oʻqish va ishlarida omad tiladi.

40-sonli maktab direktori Sanobar Xoʻjamuratova esa bitiruvchi yoshlarni yillar davomida qunt bilan bilim olib, ota-onasi, ustozlarining ishonchini oqlagani, oltin, kumush medallar sohib va sohibalari boʻlgani bilan muborakbod etib, taqdirlanayotganlar tumandagi 2 ming 704 nafar bitiruvchilar orasida eng bilimli, zukko oʻquvchilar ekanini taʼkidladi.

31-sonli maktab direktori Nilufar Davletova esa barcha bitiruvchilarning keyingi hayotlarida faqatgina muvaffaqiyatlar yor boʻlishini, yurtimizdagi eng nufuzli korxona va tashkilotlarda ish boshlab, yurtimiz taraqqiyotiga munosib hissa qoʻshadigan kadrlar boʻlib yetishishiga tilakdoshlik bildirdi.

Shundan soʻng, “Zulfiya nomidagi Davlat mukofoti” sohibasi Barno Samandarova tengdoshlariga oʻzining erishgan muvaffaqiyatlari, yutuqlari haqida gapirib, maktabni tugatgandan keyin ham oʻqib bilim olishdan aslo charchamasligini, boshqa oʻquvchilar ham Oliy taʼlim talabasi boʻlganidan soʻng, yuqori marralarni zabt etishlariga tilak bildirdi.

Tantanali taqdirlash marosimida oltin medal sohib va sohibalari ham soʻzga chiqib, erishgan muvaffaqiyatlari haqida barcha tengdoshlari bilan oʻrtoqlashdilar.

Tadbir yakunida oʻquvchilarga oltin hamda kumush medallar, tashakkurnomalar, qimmatbaho sovgʻalar tantanali tarzda topshirildi. 

Bitiruvchilar oʻzlariga bildirilgan bu kabi yuksak eʼtibordan mamnun boʻlib, bildirilgan ishonchni oqlashga vaʼda berdilar.

Oʻylaymizki, yoshlarimiz Prezidentimiz ishonch bildirganlaridek, mamlakatimizda yaratilgan imkoniyatlar asosida yetuk mutaxassislar boʻlib, Vatan ravnaqi uchun munosib hissa qoʻshadilar.

Tuman hokimligining Axborot xizmati.