Умумтаълим мактабни олтин ҳамда кумуш медаллар билан тугатган ўқувчиларни тақдирлаш маросими бўлиб ўтди

Бугунги кунда мамлакатимизнинг барча жойларида бўлгани сингари Амударё туманидаги умумий ўрта таълим мактабларида ҳам битирувчи синф ўқувчилари якуний имтиҳонларни тамомлаб, катта ҳаётга йўлланма олмоқдалар. 2 минг 704 нафар амударёлик ўқувчи-ёшлар меҳрибон устозлари, қадрдон мактаби билан хайрлашиб, олий таълим даргоҳларига ҳужжат топширишмоқда.

19 июнь куни туман ҳокимлиги биносида 2022-2023 ўқув йилида умумий ўрта таълим мактабларини олтин ва кумуш медаллар билан тамомлаган ҳамда фанлар олимпиадаси ва турли танловларда муваффақиятга эришган ўқувчиларни тақдирлаш маросими бўлиб ўтди.

Унда туман ҳокими Султонбой Йўлдашев, секторлар раҳбарлари, туман ҳокими ўринбосарлари, Мактабгача ва мактаб таълими бўлими масъуллари, мактаб директорлари ҳамда ота-оналар иштирок этишди.

Маълумот учун, жорий ўқув йилида Амударё тумани бўйича 36 нафар ўқувчи мактабни олтин ва 11 нафар ўқувчи кумуш медаль билан битказдилар. Ундан ташқари, 50 нафар ўқувчи инглиз тилини билиш даражаси бўйича Халқаро B2, 5 нафар ўқувчи эса Халқаро С1 сертификатини қўлга киритган бўлса, 1 нафар битирувчи асосий фанлар олимпиадасининг Қорақалпоғистон Республикаси совриндори бўлди.

Тадбир давомида туман ҳокими Султонбой Йўлдашев, битирувчиларни мактабни муваффақиятли тугатгани билан табриклаб, ўзлари севган ва танлаган касб-ҳунарларни ва мутахассисликларни эгаллаб, Ватанимиз корига ярайдиган муносиб фарзанд бўлишларига ишонч билдирди.

 Шунингдек, туман ҳокими билимдон ўқувчиларнинг мактаб директорларига, уларга таълим ва тарбия берган фидоий ўқитувчилар ҳамда ота-оналарга миннатдорчилик билдириб, бундан кейин ҳам баркамол авлодни тарбиялаб, вояга етказишларида куч-ғайрат тилади.

Тадбирда туман Мактабгача ва мактаб таълими бўлими мудираси Саида Садикова битирувчи ёшларни етуклик шаҳодатномаларини олиб, катта ҳаётга қадам ташлаганликлари билан қутлаб, кейинги ўқиш ва ишларида омад тилади.

40-сонли мактаб директори Санобар Хўжамуратова эса битирувчи ёшларни йиллар давомида қунт билан билим олиб, ота-онаси, устозларининг ишончини оқлагани, олтин, кумуш медаллар соҳиб ва соҳибалари бўлгани билан муборакбод этиб, тақдирланаётганлар тумандаги 2 минг 704 нафар битирувчилар орасида энг билимли, зукко ўқувчилар эканини таъкидлади.

31-сонли мактаб директори Нилуфар Давлетова эса барча битирувчиларнинг кейинги ҳаётларида фақатгина муваффақиятлар ёр бўлишини, юртимиздаги энг нуфузли корхона ва ташкилотларда иш бошлаб, юртимиз тараққиётига муносиб ҳисса қўшадиган кадрлар бўлиб етишишига тилакдошлик билдирди.

Шундан сўнг, “Зулфия номидаги Давлат мукофоти” соҳибаси Барно Самандарова тенгдошларига ўзининг эришган муваффақиятлари, ютуқлари ҳақида гапириб, мактабни тугатгандан кейин ҳам ўқиб билим олишдан асло чарчамаслигини, бошқа ўқувчилар ҳам Олий таълим талабаси бўлганидан сўнг, юқори марраларни забт этишларига тилак билдирди.

Тантанали тақдирлаш маросимида олтин медаль соҳиб ва соҳибалари ҳам сўзга чиқиб, эришган муваффақиятлари ҳақида барча тенгдошлари билан ўртоқлашдилар.

Тадбир якунида ўқувчиларга олтин ҳамда кумуш медаллар, ташаккурномалар, қимматбаҳо совғалар тантанали тарзда топширилди. 

Битирувчилар ўзларига билдирилган бу каби юксак эътибордан мамнун бўлиб, билдирилган ишончни оқлашга ваъда бердилар.

Ўйлаймизки, ёшларимиз Президентимиз ишонч билдирганларидек, мамлакатимизда яратилган имкониятлар асосида етук мутахассислар бўлиб, Ватан равнақи учун муносиб ҳисса қўшадилар.

Туман ҳокимлигининг Ахборот хизмати.