Oʻzbekiston Respublikasi Prezidentligiga nomzodning ishonchli vakili saylovchilar bilan uchrashdi

Oʻzbekiston xalqi muhim siyosiy-ijtimoiy voqea arafasida turibdi. Shu yilning 9-iyul kuni oʻtkaziladigan Oʻzbekiston Respublikasi Prezidenti saylovi xalqimizning kelajagi, farovonligi, davlatimizning taraqqiyoti bilan bogʻliq muhim siyosiy jarayondir.

Saylovoldi targʻiboti kampaniyasi doirasida Oʻzbekiston Xalq demokratik partiyasidan prezidentlikka nomzod Ulugʻbek Inoyatovning ishonchli vakili Xalilla Yeshimbetov amudaryolik saylovchilar bilan uchrashdi.

Boʻlib oʻtgan muloqotda saylovchilar, talaba-yoshlar, jamoat tashkilotlari, fuqarolarning oʻzini oʻzi boshqarish organlari vakillari, mahalliy kengash deputatlari, partiya faollari ishtirok etishdi.

Uchrashuvda Oʻzbekiston Xalq demokratik partiyasi Qoraqalpogʻiston Respublika Kengashi raisi, prexidentlikka nomzodning ishonchli vakili Xalilla Yeshimbetov saylovchilarga nomzodning tarjimai holi haqida batafsil maʼlumot berdi.

Saylovchilar huzurida chiqish qilgan ishonchli vakil nomzodning saylovoldi dasturidagi ustuvor yoʻnalishlarga toʻxtalib oʻtdi.

Jumladan, dasturda kuchli ijtimoiy siyosat, arzon uy-joy va sifatli kommunal xizmatlar, kafolatli va sifatli tibbiy yordam koʻrsatish, yoshlar uchun taʼlim kafolatlarini mustahkamlash, ijtimoiy yoʻnaltirilgan bozor iqtisodiyoti, tovar va xizmatlarning ijtimoiy maqbulligi, ijtimoiy tenglikka asoslangan demokratiya, sud-huquq islohotlari, konstruktiv tashqi siyosatga oid 9 ta ustuvor yoʻnalish boʻyicha aniq va manzilli taklif hamda tashabbuslar ilgari surilgan.

Bundan tashqari, Xalilla Yeshimbetov Oʻzbekiston Xalq demokratik partiyasining dasturiy maqsadi – ijtimoiy davlat kontseptsiyasi ekani, shu boisdan ham yangi tahrirdagi Konstitutsiyada belgilangan ijtimoiy davlat maqomidan kelib chiqib, davlatning ijtimoiy majburiyatlarini samarali amalga oshirish mexanizmlarini mustahkamlash hamda demokratik ijtimoiy davlatni barpo etishga alohida eʼtibor qaratilgani xususida toʻxtalib oʻtdi.

Ishonchli vakil oʻz maʼruzasida Qoraqalpogʻiston Respublikasini ijtimoiy-iqtisodiy rivojlantirishning istiqboldagi imkoniyatlari haqida toʻxtaldi.

Xususan, nomzod dasturidagi aholi, ayniqsa, yoshlar va xotin-qizlarni doimiy ish bilan taʼminlash, nogironligi boʻlgan va imkoniyati cheklangan shaxslar uchun barqaror ish oʻrinlari yaratish, infratuzilmani yaxshilash, ichimlik suvi, elektr, tabiiy gaz taʼminoti bilan bogʻliq muammolarni bartaraf etishga qaratilgan tashabbuslarga eʼtibor qaratdi.

Ochiq, samimiy muloqot ruhida oʻtgan uchrashuvda saylovchilar oʻzlarini qiziqtirgan savollar bilan prezidentlikka nomzodning ishonchli vakiliga murojaat qildilar.

Uchrashuvda soʻzga chiqqan faollar Xalq demokratik partiyasidan Oʻzbekiston Prezidentligiga nomzod Ulugʻbek Inoyatovning saylovoldi dasturini qoʻllab-quvvatlashlarini, barcha amudaryolik saylovchilarni saylovda ushbu nomzodga ovoz berishga daʼvat qildilar.

Tuman hokimligining Axborot xizmati.