“KASBLAR FESTIVALI” TADBIRIDA YoShLAR 2-SONLI KASB-HUNAR MAKTABI ShAROITLARI BILAN TANIShIShDI

Amudaryo tumanidagi yoshlarga malakali kasb-hunar oʻrgatilib kelinayotgan 2-sonli kasb-hunar maktabida “Kasblar festivali” tadbiri tashkil etildi.

24-may kuni kasb-hunar maktabi binosi oldida tashkil etilgan ushbu tadbirda tumandagi barcha umumtaʼlim maktablarining 9-sinf bitiruvchilari, maktab psixologlari, ota-onalar ishtirok etishdi.

Tadbirni maktab direktori Muzaffar Qurbonboyev ochib berdi va yurtimizda yoshlarga kasb-hunar oʻrgatish yoʻllarini yanada takomillashtirish va ularning moddiy va maʼnaviy asoslarini vujudga keltirish sohalarida katta ishlar amalga oshirilayotgani toʻgʻrisida soʻzladi. Kasb-hunar maktablarini tamomlagan yoshlarning mutaxassisligi boʻyicha oliy oʻquv yurtlarida oʻqishni davom ettirishlari, ish bilan taʼminlanishi jamiyatimizda doimiy diqqati markazida turgan masalalardan biri sifatida alohida eʼtibor qaratilayotganini ham taʼkidlab oʻtdi. Shuningdek, kasb-hunar maktabida tashkil qilingan yoʻnalishlar toʻgʻrisida maʼlumotlar berdi va tadbir ishtirokchilarini tanishib chiqish uchun taklif etdi.

Tadbir ishtirokchilari chiroyli bezatilgan taʼlim muassasasi hovlisiga joylashtirilgan kasb-hunar maktabida faoliyat olib borayotgan turli toʻgaraklar, ishlab chiqarish tsexlari toʻgʻrisidagi axborot-maʼlumot koʻrgazmalari bilan tanishishdi. Shuningdek, koʻrgazmali tarzda jihozlangan barcha oʻquv va amaliyot xonalari, kasb-hunar maktabidagi oʻquv jarayoni, oʻquvchilar uchun yaratilgan shart-sharoitlarni koʻrib chiqishdi. Kasb-hunar maktabining oʻqituvchilari, amaliyot ustalari bitiruvchi-yoshlarni oʻquv dargohidagi imkoniyatlar bilan yaqindan tanishtirishdi.

Hozirgi kunda 2-son kasb-hunar maktabida 17 guruhda 419 nafar oʻquvchiga taʼlim berilmoqda. Joriy oʻquv yilida ushbu dargohni 8 ta guruhdagi 201 nafar oʻquvchi bitirib, taʼlimni oliygohlarda davom ettirishni niyat qilishgan.

Kelgusi 2023-2024 oʻquv yili uchun 12 ta yoʻnalishga 360 nafar oʻquvchi qabul qilinadi. Ayni paytda 2-sonli kasb-hunar maktabiga umumtaʼlim maktablarining 9-sinf bitiruvchilarining hujjatlarni qabul qilish jarayonlari boshlanmoqda. Ushbu maktabda joriy yilda kunduzgi taʼlim shakli boʻyicha avtomobil dvigatellarini tashxislash va taʼmirlash, avtomobil shassisiga texnik xizmat koʻrsatish va taʼmirlash, kompyuter grafikasi va dizayn operatori, elektromontyor, elektrgazpayvandlash ishlari, tikuvchi, qurilish ishlari ishchisi kabi yoʻnalishlarga oʻquvchilar hujjatlarini topshirishmoqda. Shuningdek, oqava suv va suv taʼminoti tizimlaridan foydalanish va montaj qilish ustasi, maishiy texnika jihozlarini taʼmirlash, bogʻbon, issiqxona va parnik xoʻjaligi laboranti, oshpaz kabi yoʻnalishlarda ham oʻquvchilarga kasb oʻrgatish yoʻlga qoʻyilgan.

Tadbir davomida oʻquvchi-yoshlarga kasb-hunarli inson hech narsaga muhtoj boʻlmasligi, halol rizq topish uchun har kim, albatta biror kasbni, hunarni bilishi kerakligi tushuntirildi. Hozirgi davrda yer yuzida kasb va hunarlarning turlari koʻpligi, barchasi odamlar uchun xizmat qilishi toʻgʻrisida aytildi. Shuningdek, yoshlarga hozirgi davrda hunar va kasblardan bir nechtasini oʻrganib, el-yurt oldida oʻz kasbining ustasi boʻlsa, rizqi doim butun boʻlishi taʼkidlab oʻtildi.

Mazkur taʼlim muassasasidagi shart-sharoit, taʼlim-tarbiya jarayoni bilan toʻliq tanishgan yoshlar tikuvchilik, elektromontyor, avtomobil dvigatellarini tashxislash va taʼmirlash yoʻnalishlariga koʻproq qiziqish bildirishdi. Shuningdek, qizlar koʻproq oshpazlik, tikuvchilik, kompyuter grafikasi va dizayn operatori kabi yoʻnalishlarida oʻqishga qiziqishlari borligini aytib, hujjatlarini shu yoʻnalishlarga topshirishga kelishishdi.

Kasb-hunar maktabi ijodkor oʻquvchilari ijro etgan kuy-qoʻshiqlar, raqslar tadbirga bayramona ruh bagʻishladi. Bir soʻz bilan aytganda, bu tadbir haqiqiy yoshlik, orzular bayramiga aylanib ketdi.

Yurtimizda sanoat, qishloq xoʻjaligi, xizmat koʻrsatish, qurilish kabi koʻplab sohalar rivojlanib, yangi-yangi korxonalar ochilmoqda. Kasb-hunar maktablarida oʻzlari tanlagan yoʻnalishlarda oʻqib, ilm olgan yoshlar bu keng imkoniyatlardan foydalanib, ham oilasiga, ham jamiyatga naf keltirishadi.

O.Xudoyberganova