“КАСБЛАР ФЕСТИВАЛИ” ТАДБИРИДА ЁШЛАР 2-СОНЛИ КАСБ-ҲУНАР МАКТАБИ ШАРОИТЛАРИ БИЛАН ТАНИШИШДИ
Амударё туманидаги ёшларга малакали касб-ҳунар ўргатилиб келинаётган 2-сонли касб-ҳунар мактабида “Касблар фестивали” тадбири ташкил этилди.
24 май куни касб-ҳунар мактаби биноси олдида ташкил этилган ушбу тадбирда тумандаги барча умумтаълим мактабларининг 9-синф битирувчилари, мактаб психологлари, ота-оналар иштирок этишди.
Тадбирни мактаб директори Музаффар Қурбонбоев очиб берди ва юртимизда ёшларга касб-ҳунар ўргатиш йўлларини янада такомиллаштириш ва уларнинг моддий ва маънавий асосларини вужудга келтириш соҳаларида катта ишлар амалга оширилаётгани тўғрисида сўзлади. Касб-ҳунар мактабларини тамомлаган ёшларнинг мутахассислиги бўйича олий ўқув юртларида ўқишни давом эттиришлари, иш билан таъминланиши жамиятимизда доимий диққати марказида турган масалалардан бири сифатида алоҳида эътибор қаратилаётганини ҳам таъкидлаб ўтди. Шунингдек, касб-ҳунар мактабида ташкил қилинган йўналишлар тўғрисида маълумотлар берди ва тадбир иштирокчиларини танишиб чиқиш учун таклиф этди.
Тадбир иштирокчилари чиройли безатилган таълим муассасаси ҳовлисига жойлаштирилган касб-ҳунар мактабида фаолият олиб бораётган турли тўгараклар, ишлаб чиқариш цехлари тўғрисидаги ахборот-маълумот кўргазмалари билан танишишди. Шунингдек, кўргазмали тарзда жиҳозланган барча ўқув ва амалиёт хоналари, касб-ҳунар мактабидаги ўқув жараёни, ўқувчилар учун яратилган шарт-шароитларни кўриб чиқишди. Касб-ҳунар мактабининг ўқитувчилари, амалиёт усталари битирувчи-ёшларни ўқув даргоҳидаги имкониятлар билан яқиндан таништиришди.
Ҳозирги кунда 2-сон касб-ҳунар мактабида 17 гуруҳда 419 нафар ўқувчига таълим берилмоқда. Жорий ўқув йилида ушбу даргоҳни 8 та гуруҳдаги 201 нафар ўқувчи битириб, таълимни олийгоҳларда давом эттиришни ният қилишган.
Келгуси 2023-2024 ўқув йили учун 12 та йўналишга 360 нафар ўқувчи қабул қилинади. Айни пайтда 2-сонли касб-ҳунар мактабига умумтаълим мактабларининг 9-синф битирувчиларининг ҳужжатларни қабул қилиш жараёнлари бошланмоқда. Ушбу мактабда жорий йилда кундузги таълим шакли бўйича автомобиль двигателларини ташхислаш ва таъмирлаш, автомобиль шассисига техник хизмат кўрсатиш ва таъмирлаш, компьютер графикаси ва дизайн оператори, электромонтёр, электргазпайвандлаш ишлари, тикувчи, қурилиш ишлари ишчиси каби йўналишларга ўқувчилар ҳужжатларини топширишмоқда. Шунингдек, оқава сув ва сув таъминоти тизимларидан фойдаланиш ва монтаж қилиш устаси, маиший техника жиҳозларини таъмирлаш, боғбон, иссиқхона ва парник хўжалиги лаборанти, ошпаз каби йўналишларда ҳам ўқувчиларга касб ўргатиш йўлга қўйилган.
Тадбир давомида ўқувчи-ёшларга касб-ҳунарли инсон ҳеч нарсага муҳтож бўлмаслиги, ҳалол ризқ топиш учун ҳар ким, албатта бирор касбни, ҳунарни билиши кераклиги тушунтирилди. Ҳозирги даврда ер юзида касб ва ҳунарларнинг турлари кўплиги, барчаси одамлар учун хизмат қилиши тўғрисида айтилди. Шунингдек, ёшларга ҳозирги даврда ҳунар ва касблардан бир нечтасини ўрганиб, эл-юрт олдида ўз касбининг устаси бўлса, ризқи доим бутун бўлиши таъкидлаб ўтилди.
Мазкур таълим муассасасидаги шарт-шароит, таълим-тарбия жараёни билан тўлиқ танишган ёшлар тикувчилик, электромонтёр, автомобиль двигателларини ташхислаш ва таъмирлаш йўналишларига кўпроқ қизиқиш билдиришди. Шунингдек, қизлар кўпроқ ошпазлик, тикувчилик, компьютер графикаси ва дизайн оператори каби йўналишларида ўқишга қизиқишлари борлигини айтиб, ҳужжатларини шу йўналишларга топширишга келишишди.
Касб-ҳунар мактаби ижодкор ўқувчилари ижро этган куй-қўшиқлар, рақслар тадбирга байрамона руҳ бағишлади. Бир сўз билан айтганда, бу тадбир ҳақиқий ёшлик, орзулар байрамига айланиб кетди.
Юртимизда саноат, қишлоқ хўжалиги, хизмат кўрсатиш, қурилиш каби кўплаб соҳалар ривожланиб, янги-янги корхоналар очилмоқда. Касб-ҳунар мактабларида ўзлари танлаган йўналишларда ўқиб, илм олган ёшлар бу кенг имкониятлардан фойдаланиб, ҳам оиласига, ҳам жамиятга наф келтиришади.
О.Худойберганова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
