Amudaryo tumanidagi barcha maktablarda soʻnggi qoʻngʻiroq chalindi

Bugun – 25-may kuni mamlakatimizning barcha joylarida boʻlgani kabi Amudaryo tumanidagi umumtaʼlim maktablarida ham soʻnggi qoʻngʻiroq jaranglab, joriy oʻquv yili nihoyasiga yetishi munosabati bilan “Xayr, maktabim!” nomli tadbirlar oʻtkazildi.

Amudaryo tumani Maktabgacha va maktab taʼlimi boʻlimiga qarashli 31-sonli umumtaʼlim maktabida 2022-2023 oʻquv yili yakuniga bagʻishlangan “Soʻnggi qoʻngʻiroq” tadbirida Qoraqalpogʻiston Respublikasi Vazirlar Kengashi Raisi Farhod Ermanov, tuman hokimi Sultonboy Yoʻldashevlar, sektorlar rahbarlari va boshqa masʼullar ishtirok etishdi.

Tadbir bayramona bezatilgan maktab hovlisida Oʻzbekiston va Qoraqalpogʻiston Respublikalarining davlat madhiyalari sadolari ostida boshlandi.

Tadbirda Qoraqalpogʻiston Respublikasi Vazirlar Kengashi Raisi Farhod Ermanov soʻzga chiqib, oʻqituvchilar, ota-onalar barcha bitiruvchilarni unutilmas sana — "Soʻnggi qoʻngʻiroq" bayrami bilan samimiy qutladi, ularning kelgusi ishlariga muvaffaqiyat va zafarlar tiladi.

Tuman hokimi Sultonboy Yoʻldashev maktab bitiruvchilarining yurtimizda yaratilgan imkoniyatlardan toʻliq foydalangan holda, yetuk mutaxassislar boʻlib yetishishlariga yurtimizdagi zamonaviy klasterlar, fermer xoʻjaliklari, ishlab chiqarish korxonalari, katta-katta qurilishlar, firma va kompaniyalar, davlat va nodavlat tashkilotlar, madaniy va ijodiy jamoalarda ish boshlab, Vatanimiz ravnaqi, xalqimiz farovonligini oshirishga xissa qoʻshishlariga ishonch bildirdi.

Tadbirda uzoq yillardan buyon 31-sonli maktabda faoliyat yuritib kelayotgan oʻqituvchilardan biri Sanim Uzakbayeva, bitiruvchilarning bobo va buvilari, ota-onalari soʻzga chiqishib, yoshlarni maktab taʼlimini muvaffaqiyatli tamomlagani, hayotidagi dastlabki muhim dovondan oshgani bilan samimiy qutlashdi.

Tadbirda jonajon Vatanimizni, tinchlik-osoyishtalikni, yoshlik va muhabbatni, ustozlarga extiromni tarannum etuvchi sheʼrlar oʻqildi, kuy-qoʻshiqlar ijro etildi.

Fan olimpiadalari, intellektual bellashuvlar, ijodiy tanlovlarda, jamoat ishlarida faol ishtirok etgan yoshlar va ularning ota-onalariga tashakkurnoma va esdalik sovgʻalari tantanali tarzda topshirildi.

Aytish kerakki, bu yil Amudaryo tumanidagi umumtaʼlim maktablarini 2 704 nafar oʻquvchi yoshlar bitkazishmoqda.

Jumladan, 31-sonli maktabni 76 nafar bitiruvchilar tamomlab, ular orasida 2 nafari oltin, 1 nafari kumush medal sohiblari boʻlishdi.

Tadbir yakunida soʻnggi qoʻngʻiroq chalindi. Bitiruvchilar jonajon maktabi va oʻqituvchilari bilan xayrlashdilar.

Barcha bitiruvchilarning davlat imtihonlaridan muvaffaqiyatli oʻtib, oliy taʼlim muassasalari talabasi boʻlish baxtiga erishishlariga tilakdoshmiz! Oʻylaymizki, yoshlarimiz Prezidentimiz ishonch bildirganlaridek, mamlakatimizda yaratilgan imkoniyatlar asosida oʻz kasbining yetuk mutaxassislari boʻlib yetishib chiqishadi hamda Vatanimiz ravnaqi, xalqimiz farovonligini oshirishga munosib hissa qoʻshishadi.

Tuman hokimligining Axborot xizmati.