Yoshlar oʻrtasida kitobxonlikni keng targʻib qilish maqsadida davra suhbati boʻlib oʻtdi

Kitob – insonnint eng yaqin doʻsti va maslahatchisi, aql qayrogʻi va bilim manbaidir. Kitob fikrlash quroli, xazinalar kaliti, tafakkur manbai boʻlgani uchun ham xalqimiz uni nonday aziz, moʻʼtabar deb hisoblagan. Shuning uchun kitobga muhabbat, uni qadrlash, oʻqishga ishtiyoq xalqimiznint qon-qoniga singib ketgan. Kishining madaniyati uning kitob oʻqish yoki oʻqimasligida aks etadi.

Shu maʼnoda, butungi kunda kitob oʻqish va unga munosabat bir qadar susaygandek. Chunki, yoshlar koʻproq kino, video, televideniye, kompyuterga berilib ketdi. Kompyuter hozirgi kunda koʻpgina xonadonlarga ham kirib kelgan. Istalgan yangilig-u axborotlarni bu vositalardan xohlagancha olish mumkin. Achinarlisi, bugun kitob oʻqish uchun vaqt sarflashga hojat yoʻqdek.

 Aslida hech bir axborot vositasi, kino yoki videofilm badiiy asar oʻrnini bosolmaydi.

Amudaryo televideniyesida Oliy majlis huzuridagi Nodavlat notijorat tashkilotlarni va fuqarolik jamiyatining boshqa institutlarini qoʻllab-quvvatlash Jamoat fondi tomonidan moliyalashtirilgan “Yuksak maʼnaviyatli va axloqli yoshlar – kelajak poydevori” nomli grant loyihasi doirasida yoshlar oʻrtasida kitobxonlikni keng targʻib qilish maqsadida tadbirlar oʻtkazilib kelinmoqda.

Yaqinda tumanimizning Arna boʻyi mahallasi hududida joylashgan 27-sonli umumtaʼlim maktabida ham shu maqsadda davra suhbati tashkil etildi.

Tadbirda tuman hokimligining Axborot xizmati rahbari Fotima Eshimbetova, maktab direktori Quvvatboy Joʻrayev, shu maktabning ona tili va adabiyot fani oʻqituvchilari Zaynab Matchanova, Amina Toʻrayevalar soʻzga chiqib kitob oʻqishning foydasi, badiiy asarlarning inson hayotidagi roli xususida batafsil aytib oʻtishdi.

Maktab direktori Quvvatboy Joʻrayev yoshlarga toʻgʻri kelgan kitobni emas, aynan bizning millatimiz ruhiga mos, qalblarga maʼnaviy oziq, boylik beradigan asarlar oʻqishlari lozimligini taʼkidladi.

Darhaqiqat, hozirgi globallashuv jarayonida xalqning maʼnaviy ildizlariga bolta urish, “ommaviy madaniyat”, diniy ekstremizm, diniy aqidaparastlik gʻoyalarini targʻib qilishga xizmat qiluvchi kitoblar ham har xil yoʻllar bilan chetdan mamlakatimizga olib kelinayotir. Bundan tashqari, maʼnaviy-tarbiyaviy ahamiyati sayoz asarlar ham chop etilayotir.

 Demak, oʻqiladigan asarni tanlay bilish ham sanʼat. Oʻsib kelayotgan yoshlar ongida ana shunday sanʼatni, toʻgʻrirogʻi, maʼnaviy immunitetni shakllantirishimiz va mustahkamlash zarurdir.

 Davra suhbatida 7-10-sinf oʻquvchilari Oʻtkir Hoshimovning dunyoga mashhur asari “Dunyoning ishlari” qissasidan parchalar oʻqib berishdi.

Ayniqsa, “Oq marmar, qora marmar”, “Iltijo”, “Acha xola” haqidagi hikoyalarni oʻquvchilar juda taʼsirlanib aytib berishdi.

Qolaversa, oʻquvchilar asar qahramonlari oʻrnida boʻlib qolsalar ularning yoʻl qoʻygan xatolarini takrorlamasliklarini aytib oʻzlarining mustaqil fikrlarini bildirib oʻtishdi.

Davra suhbati baxs-munozaraga boy tarzda qiziqarli boʻlib oʻtdi.

F.Eshimbetova