Ёшлар ўртасида китобхонликни кенг тарғиб қилиш мақсадида давра суҳбати бўлиб ўтди

Китоб – инсоннинт энг яқин дўсти ва маслаҳатчиси, ақл қайроғи ва билим манбаидир. Китоб фикрлаш қуроли, хазиналар калити, тафаккур манбаи бўлгани учун ҳам халқимиз уни нондай азиз, мўътабар деб ҳисоблаган. Шунинг учун китобга муҳаббат, уни қадрлаш, ўқишга иштиёқ халқимизнинт қон-қонига сингиб кетган. Кишининг маданияти унинг китоб ўқиш ёки ўқимаслигида акс этади.

Шу маънода, бутунги кунда китоб ўқиш ва унга муносабат бир қадар сусайгандек. Чунки, ёшлар кўпроқ кино, видео, телевидение, компьютерга берилиб кетди. Компьютер ҳозирги кунда кўпгина хонадонларга ҳам кириб келган. Исталган янгилиг-у ахборотларни бу воситалардан хоҳлаганча олиш мумкин. Ачинарлиси, бугун китоб ўқиш учун вақт сарфлашга ҳожат йўқдек.

 Аслида ҳеч бир ахборот воситаси, кино ёки видеофильм бадиий асар ўрнини босолмайди.

Амударё телевидениесида Олий мажлис ҳузуридаги Нодавлат нотижорат ташкилотларни ва фуқаролик жамиятининг бошқа институтларини қўллаб-қувватлаш Жамоат фонди томонидан молиялаштирилган “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ёшлар ўртасида китобхонликни кенг тарғиб қилиш мақсадида тадбирлар ўтказилиб келинмоқда.

Яқинда туманимизнинг Арна бўйи маҳалласи ҳудудида жойлашган 27-сонли умумтаълим мактабида ҳам шу мақсадда давра суҳбати ташкил этилди.

Тадбирда туман ҳокимлигининг Ахборот хизмати раҳбари Фотима Эшимбетова, мактаб директори Қувватбой Жўраев, шу мактабнинг она тили ва адабиёт фани ўқитувчилари Зайнаб Матчанова, Амина Тўраевалар сўзга чиқиб китоб ўқишнинг фойдаси, бадиий асарларнинг инсон ҳаётидаги роли хусусида батафсил айтиб ўтишди.

Мактаб директори Қувватбой Жўраев ёшларга тўғри келган китобни эмас, айнан бизнинг миллатимиз руҳига мос, қалбларга маънавий озиқ, бойлик берадиган асарлар ўқишлари лозимлигини таъкидлади.

Дарҳақиқат, ҳозирги глобаллашув жараёнида халқнинг маънавий илдизларига болта уриш, “оммавий маданият”, диний экстремизм, диний ақидапарастлик ғояларини тарғиб қилишга хизмат қилувчи китоблар ҳам ҳар хил йўллар билан четдан мамлакатимизга олиб келинаётир. Бундан ташқари, маънавий-тарбиявий аҳамияти саёз асарлар ҳам чоп этилаётир.

 Демак, ўқиладиган асарни танлай билиш ҳам санъат. Ўсиб келаётган ёшлар онгида ана шундай санъатни, тўғрироғи, маънавий иммунитетни шакллантиришимиз ва мустаҳкамлаш зарурдир.

 Давра суҳбатида 7-10 синф ўқувчилари Ўткир Ҳошимовнинг дунёга машҳур асари “Дунёнинг ишлари” қиссасидан парчалар ўқиб беришди.

Айниқса, “Оқ мармар, қора мармар”, “Илтижо”, “Ача хола” ҳақидаги ҳикояларни ўқувчилар жуда таъсирланиб айтиб беришди.

Қолаверса, ўқувчилар асар қаҳрамонлари ўрнида бўлиб қолсалар уларнинг йўл қўйган хатоларини такрорламасликларини айтиб ўзларининг мустақил фикрларини билдириб ўтишди.

Давра суҳбати бахс-мунозарага бой тарзда қизиқарли бўлиб ўтди.

Ф.Эшимбетова