83-sonli maktabda oʻquvchilarning tasviriy sanʼat asarlari koʻrgazmasi oʻtkazildi

Sanʼatning turlari juda koʻp. Musiqa, kino, teatr, xoreografiya, tasviriy sanʼat va boshqalar shular jumlasidandir. Borliqni tasviriy obrazlarda, shakllarda, fazoviy kenglikda yoki tekislikda aks ettiradigan sanʼat, yaʼni tasviriy sanʼat asrlar osha oʻz ixlosmandlariga ega boʻlib kelgan.

Oʻquvchilarning estetik idroki, didi, mazkur sohaga doir tushunchalari, tasavvur va xotiralarni oʻstirishda mazkur sanʼat turi muhim rol oʻynaydi. Borliqni idrok etish mashgʻulotlari tabiatdagi va tevarak-atrofdagi nafislik va goʻzallikni koʻra bilishdan boshlanadi. Shuning uchun ham tasviriy sanʼat oʻqituvchilari maktablarda oʻquvchilarni ushbu fanga qiziqtirish va ularning isteʼdodlarini roʻyobga chiqarishga katta eʼtibor qaratishadi.

Oʻquvchilar oʻzlarining borliq haqidagi tasavvurlarini, koʻz oʻngidagi sodir boʻlayotgan voqealarni, narsa va buyumlarni turli koʻz qarashda va tasviriy sanʼatning turli janrlarida tasvirlab berishadi. Ulardagi bor isteʼdod va qobilyatni yuzaga chiqarish hamda rivojlantirishda maktabgacha va maktab taʼlimi tizimida oʻtkazalib kelinadigan tasviriy sanʼat asarlari koʻrgazmasi, turli xil bellashuvlar muhim ahamiyat kasb etadi.

Shuningdek, oʻquvchilarni tasviriy sanʼatga oshno qilib, uning sir-asrorlarini puxta oʻrgatish tasviriy sanʼat va chizmachilik fani oʻqituvchilari zimmasiga ham katta masʼuliyat yuklaydi.

Amudaryo tumani Maktabgacha va maktab taʼlimi boʻlimiga qarashli 83-sonli maktabda 12-15 yoshli oʻquvchilar oʻrtasida mana shunday koʻrgazma tashkil etildi.

Koʻrgazmaning tashkil etilishda shu maktabning tasviriy sanʼat va chizmachilik fani oʻqituvchisi Nafisa Aminbayevaning xizmatlari katta boʻldi. U oʻz oʻquvchilari bilan dars mashgʻulotlaridan boʻsh paytlarida alohida shugʻullanib, ularga oʻzining bor bilimlarini berishga harakat qilib kelmoqda.

Koʻrgazmada 12-15 yosh oraligʻidagi oʻquvchilar tasviriy sanʼatning peyzaj, natyurmort, mozaika, kabi janrlarida yaratgan asarlarini ishtirokchilar eʼtiboriga havola qilishdi.

Oʻqituvchi Nafisa Aminboyeva oʻquvchilarning boʻsh vaqtini mazmunli tashkil etish, isteʼdodlarini rivojlantirish maqsadida darsdan tashqari toʻgaraklar tashkil etib, ular bilan muntazam shugʻullanib keladi. Ayni paytda toʻgarakka yuqori sinf oʻquvchilarining 15 nafari, boshlangʻich sinf oʻquvchilarining 20 nafardan ortigʻi aʼzo boʻlib, darsdan boʻsh paytlarida oʻqituvchilaridan tasviriy sanʼatning sir-asrorlarini oʻrganib kelishmoqda.

Tashkil etilgan koʻrgazma ham toʻgarakka aʼzo boʻlgan 10 nafar oʻquvchining ijod mahsullari orasidan saralab olindi. Koʻrgazmaga tashrif buyurgan ota-onalar, maktab oʻqituvchilari, oʻquvchilarning doʻstlari madaniy hordiq olishdi.

Shu oʻrinda aytish kerakki, darsdan tashqari tashkil etiladigan bu kabi koʻrgazmalar oʻquvchilarning dunyoqarashini kengaytirishda, faqatgina dars mashgʻulotlari bilan mashgʻul boʻlib zerikib qolmasliklarida, doʻst ortirishlarida, qobiliyatlarini rivojlantirishda hamda mehnatlari munosib etirof etilishida muhim oʻrin tutadi.

Bu galgi tasviriy sanʼat koʻrgazmasi ham oʻquvchilarning madaniy hordiq olishida va tasviriy sanʼat haqidagi bilimlarining yanada mustahkamlanishiga hissa qoʻshgani bilan ahamiyatli boʻldi.

Tuman hokimligining Axborot xizmati.