Tuman hokimining tadbirkorlar va hokim yordamchilari bilan uchrashuvi boʻlib oʻtdi

Maʼlumki, shu yilning 15-may kuni Prezidentimiz Shavkat Mirziyoyev raisligida kambagʻallikni qisqartirish va bandlikni taʼminlash ishlarini yangi pogʻonaga olib chiqish chora-tadbirlari yuzasidan videoselektor yigʻilishi boʻlib oʻtgan edi.

Videoselektor yigʻilishida berilgan topshiriqlarning tumandagi ijrosini taʼminlash maqsadida 17-may kuni Amudaryo tumanining Qipchoq ovul fuqarolar yigʻini binosida tuman hokimining tadbirkorlar va hokim yordamchilari bilan uchrashuvi boʻlib oʻtdi. Uchrashuvda Savdo-sanoat palatasining tuman filiali boshligʻi Maqsud Rajabov, amudaryolik tadbirkorlar va ovul hamda mahallalarda faoliyat yuritayotgan hokim yordamchilari ishtirok etishdi.

Uchrashuvda tuman hokimi Sultonboy Yoʻldashev tadbirkorlar bilan yoʻlga qoʻyilgan manfaatli hamkorlik orqali mahallalardagi bandlik masalalari ijobiy yechim topayotganligini aytib oʻtdi. Bu boradagi ishlarni yanada jadallashtirish maqsadida Prezidentimiz tomonidan ilgari surilgan “20 ming tadbirkor – 500 ming malakali mutaxassis” dasturi bandligi taʼminlanmagan aholi va kam taʼminlangan ishsiz yoshlar uchun katta imkoniyat ekanligini taʼkidladi.

Aytish kerakki, Oʻzbekiston boʻylab dastur uchun 2023-2024-yillarda jami 1 milliard dollar ajratiladi. Bu mablagʻlar hisobidan kambagʻal oilalar aʼzosi kasbga oʻqitilib, ishli qilish boʻyicha loyiha ahamiyatiga qarab, amaldagidan past foizlarda va uzoqroq muddatga kredit beriladi. Shuningdek, dasturda ishtirok etadigan tadbirkorlarga soliqlardan alohida imtiyozlar beriladi.

Jumladan, tadbirkor kamida 20 foiz kambagʻal oila aʼzosini bir yil davomida ish bilan taʼminlasa, mol-mulk va yer soliqlaridan ozod qilinadi, kambagʻal oila aʼzosi esa daromad soligʻidan ozod qilinadi.

Tuman hokimi Sultonboy Yoʻldashev ushbu tizim bir martalik ish emas, davomli jarayon boʻlishini va buning natijasida kam taʼminlangan oilalar uchun koʻplab imkoniyatlar yaratilishini aytib oʻtdi.

Shuningdek, yigʻilishda kambagʻallikni qisqartirish sohasida Xitoy tajribasini oʻrganish boʻyicha Prezidentimiz tomonidan bildirilgan taklif va tashabbuslar qoʻllab-quvvatlandi.

Taʼkidlanganidek, endlikda Xitoy tajribasi asosida Oʻzbekiston boʻylab kambagʻallikdan chiqarish boʻyicha alohida dastur amalga oshiriladi. Bunda kambagʻallik yuqori boʻlgan tumanlarda yoʻl-transport, elektr, aloqa va turizm infratuzilmasini yaxshilash, kichik va oʻrta shaharlarni rivojlantirish, mahallalarni sanoatlashtirishga eʼtibor qaratiladi.

Undan tashqari, Xitoy markazlari bilan hamkorlikda mahallalardagi hokim yordamchilarini oʻqitish, yaxshi natijaga erishgan kamida 200 nafar salohiyatli hokim yordamchilarining Xitoyga amaliyot oʻtashga yuborilishi hokim yordamchilari uchun katta tajriba maktabi boʻladi.

Yigʻilishda soʻzga chiqqan hokim yordamchilari tumanda aholi bandligini taʼminlash va tadbirkorlik faoliyatini qoʻllab-quvvatlash boʻicha tizimli ishlar amalga oshirilayotganligini, bunda ayniqsa tumandagi tadbirkorlar bilan samarali tarzda hamkorlik yoʻlga qoʻyilganini aytib oʻtishdi.

Yigʻilish yakunida Prezidentimiz raisligida boʻlib oʻtgan videoselektor yigʻiishida berilgan topshiriqlar ijrosini amalga oshirish boʻyicha muhim chora-tadbirlar belgilab olindi.

Tuman hokimligining Axborot xizmati.