Туман ҳокимининг тадбиркорлар ва ҳоким ёрдамчилари билан учрашуви бўлиб ўтди

Маълумки, шу йилнинг 15 май куни Президентимиз Шавкат Мирзиёев раислигида камбағалликни қисқартириш ва бандликни таъминлаш ишларини янги поғонага олиб чиқиш чора-тадбирлари юзасидан видеоселектор йиғилиши бўлиб ўтган эди.

Видеоселектор йиғилишида берилган топшириқларнинг тумандаги ижросини таъминлаш мақсадида 17 май куни Амударё туманининг Қипчоқ овул фуқаролар йиғини биносида туман ҳокимининг тадбиркорлар ва ҳоким ёрдамчилари билан учрашуви бўлиб ўтди. Учрашувда Савдо-саноат палатасининг туман филиали бошлиғи Мақсуд Ражабов, амударёлик тадбиркорлар ва овул ҳамда маҳаллаларда фаолият юритаётган ҳоким ёрдамчилари иштирок этишди.

Учрашувда туман ҳокими Султонбой Йўлдашев тадбиркорлар билан йўлга қўйилган манфаатли ҳамкорлик орқали маҳаллалардаги бандлик масалалари ижобий ечим топаётганлигини айтиб ўтди. Бу борадаги ишларни янада жадаллаштириш мақсадида Президентимиз томонидан илгари сурилган “20 минг тадбиркор – 500 минг малакали мутахассис” дастури бандлиги таъминланмаган аҳоли ва кам таъминланган ишсиз ёшлар учун катта имконият эканлигини таъкидлади.

Айтиш керакки, Ўзбекистон бўйлаб дастур учун 2023-2024 йилларда жами 1 миллиард доллар ажратилади. Бу маблағлар ҳисобидан камбағал оилалар аъзоси касбга ўқитилиб, ишли қилиш бўйича лойиҳа аҳамиятига қараб, амалдагидан паст фоизларда ва узоқроқ муддатга кредит берилади. Шунингдек, дастурда иштирок этадиган тадбиркорларга солиқлардан алоҳида имтиёзлар берилади.

Жумладан, тадбиркор камида 20 фоиз камбағал оила аъзосини бир йил давомида иш билан таъминласа, мол-мулк ва ер солиқларидан озод қилинади, камбағал оила аъзоси эса даромад солиғидан озод қилинади.

Туман ҳокими Султонбой Йўлдашев ушбу тизим бир марталик иш эмас, давомли жараён бўлишини ва бунинг натижасида кам таъминланган оилалар учун кўплаб имкониятлар яратилишини айтиб ўтди.

Шунингдек, йиғилишда камбағалликни қисқартириш соҳасида Хитой тажрибасини ўрганиш бўйича Президентимиз томонидан билдирилган таклиф ва ташаббуслар қўллаб-қувватланди.

Таъкидланганидек, эндликда Хитой тажрибаси асосида Ўзбекистон бўйлаб камбағалликдан чиқариш бўйича алоҳида дастур амалга оширилади. Бунда камбағаллик юқори бўлган туманларда йўл-транспорт, электр, алоқа ва туризм инфратузилмасини яхшилаш, кичик ва ўрта шаҳарларни ривожлантириш, маҳаллаларни саноатлаштиришга эътибор қаратилади.

Ундан ташқари, Хитой марказлари билан ҳамкорликда маҳаллалардаги ҳоким ёрдамчиларини ўқитиш, яхши натижага эришган камида 200 нафар салоҳиятли ҳоким ёрдамчиларининг Хитойга амалиёт ўташга юборилиши ҳоким ёрдамчилари учун катта тажриба мактаби бўлади.

Йиғилишда сўзга чиққан ҳоким ёрдамчилари туманда аҳоли бандлигини таъминлаш ва тадбиркорлик фаолиятини қўллаб-қувватлаш бўича тизимли ишлар амалга оширилаётганлигини, бунда айниқса тумандаги тадбиркорлар билан самарали тарзда ҳамкорлик йўлга қўйилганини айтиб ўтишди.

Йиғилиш якунида Президентимиз раислигида бўлиб ўтган видеоселектор йиғиишида берилган топшириқлар ижросини амалга ошириш бўйича муҳим чора-тадбирлар белгилаб олинди.

Туман ҳокимлигининг Ахборот хизмати.