Faol maʼnaviyat targʻibotchisi

Maktab – qutlugʻ dargoh. Har yili ana shunday muassasalardan minglab oʻgʻil-qizlar mustaqil hayotga yoʻllanma olishadi. Ularning hayotda oʻz oʻrnini topishi, el koriga yaraydigan insonlar boʻlib yetishishi koʻp jihatdan ustozlar ibratiga, sifatli taʼlim berilishiga bogʻliq. Ayniqsa, maʼnaviy-maʼrifiy ishlarni sifatli tashkil etish, yoshlarning intellektul salohiyati, tafakkurini yuksaltirish, ularning koʻnglida el-yurtiga yuksak muhabbat va sadoqat tuygʻularini shakllantirishda maktablar direktorlarining maʼnaviy-maʼrifiy ishlar boʻyicha oʻrinbosarlarining hissasi katta.

Amudaryo tumanining Toʻlqin ovulida faoliyat yuritayotgan 32-sonli maktab direktorining maʼnaviy-maʼrifiy ishlar boʻyicha oʻrinbosari Xudoyor Xoʻjamurodov muassasa faoliyati namunali yoʻlga qoʻyilishida samarali xizmat koʻrsatayotgan fidoyi ustozlardan biri.

Uning oʻqituvchilik kasbini egallashi ham bejizga emasdi. Otasi Saʼdulla Xoʻjamurodov, onasi Safargul Egizboyevalar ham oʻqituvchi boʻlganligidan oilasida bolalar tarbiyasi-taʼlimi xususida koʻp suhbatlar boʻlar, bolalarga nisbatan oʻzgacha mehr, fidoyilik ufurib turadigan bunday suhbatlar Xudoyorni befarq qoldirmas edi. Ona tili va adabiyot fani oʻqituvchisi, ijodkor, oʻz sohasi boʻyicha oʻqishdan, izlanishdan toʻxtamaydigan, oilasida ham oʻquvchilarining bilimini oshirish uchun ular bilan soatlab shugʻullanadigan onasi kabi oʻqituvchi boʻlish orzusi uni doimo intilishga, tinimsiz ilm olishga undardi. Ilk mehnatlari samarasi - oliygohga oʻqishga kirganida juda xursand boʻldi.

Xudoyor Xoʻjamurodov 2005-yilda oʻzi taʼlim olgan, dadasi, onasi mehnat qilayotgan maktabda oʻqituvchilik faoliyatini boshladi. 2013-yilgacha oʻquvchilarga ona tili va adabiyot fanidan dars berdi. 2013-yildan beri esa maktab direktorining maʼnaviy-maʼrifiy ishlar boʻyicha oʻrinbosari boʻlib ishlab kelayapti. U xizmat lavozimi taqozosiga koʻra, oʻqituvchilar jamoasida oʻquvchilarga sifatli taʼlim berilishini taʼminlash, sogʻlom maʼnaviy muhitni shakllantirish, oʻquvchilarda ilm olishga, oʻqib-oʻrganishga ragʻbat uygʻotish, oʻzaro ahillikda muassasa ichki tartib-intizomiga rioya etishlariga erishish, iqtidorlarini rivojlantirish, isteʼdodlarini namoyish etishlariga sharoit yaratish kabi biri-biridan muhim va dolzarb ishlarni aʼlo darajada uddalab kelayotir. Bular maktab oʻqituvchilari, oʻquvchilari erishayotgan yutuqlarda oʻz aksini topayapti.

Xususan oʻtgan yili muassasaning 11-sinfini bitirgan 25 nafar oʻquvchilarning 11 nafari respublikamizdagi turli oliygohlarning talabalari boʻldilar, 11-sinf oʻquvchisi Guldona Toʻliboyeva asosiy fanlar olimpiadasining respublika bosqichida faol ishtirok etib keldi. 4-sinf oʻquvchisi Ruxshona Norboyeva tasviriy sanʼat boʻyicha tanlovda tumanda 1-oʻrinni egallab, Qoraqalpogʻiston Rsepublikasi bosqichida qatnashib keldi va chizgan rasmlari yuqori baholandi. 7-sinf oʻquvchi qizlaridan tashkil topgan stritbolchilar jamoasi “Besh tashabbus olimpiadasi”da stritbol boʻyicha Qoraqalpogʻiston Respublikasida uchinchi oʻrinni egalladilar.

Joriy yilgi xorijiy tillar eng yaxshi oʻqitiladigan maktab tanlovida ushbu muassasa faxrli 3-oʻrin sohibi boʻldi va 50 million soʻm pul mukofoti bilan taqdirlandi. Xorijiy tillar fani oʻqituvchilari Timur YOʻldoshev C1, Xurshida Rajabova B2 sertifikatlarini, Nuraddin Xoʻjaboyev, Sohiba Yoʻldosheva, Alisher Abdullayevlar esa xalqaro va milliy sertifikatlarni himoya qilib oldilar.

Maktabda Sharofat Xolmurodova, Toʻliboy Yoʻldoshev, Mohinur Toʻraboyeva kabi ijodkor oʻqituvchilar ham borligi maʼnaviy-maʼrifiy ishlar samaradorligini oshirishda muhim ahamiyat kasb etmoqda.

Ayni kunda ushbu muassasada 47 nafar oʻqituvchilar 457 nafar oʻquvchilarga taʼlim-tarbiya berishmoqda. Erishilayotgan yutuqlarda Xudoyor Xoʻjamurodovning munosib hissasi bor.

Oygul RAJABOVA