Фаол маънавият тарғиботчиси
Мактаб – қутлуғ даргоҳ. Ҳар йили ана шундай муассасалардан минглаб ўғил-қизлар мустақил ҳаётга йўлланма олишади. Уларнинг ҳаётда ўз ўрнини топиши, эл корига ярайдиган инсонлар бўлиб етишиши кўп жиҳатдан устозлар ибратига, сифатли таълим берилишига боғлиқ. Айниқса, маънавий-маърифий ишларни сифатли ташкил этиш, ёшларнинг интеллектул салоҳияти, тафаккурини юксалтириш, уларнинг кўнглида эл-юртига юксак муҳаббат ва садоқат туйғуларини шакллантиришда мактаблар директорларининг маънавий-маърифий ишлар бўйича ўринбосарларининг ҳиссаси катта.
Амударё туманининг Тўлқин овулида фаолият юритаётган 32-сонли мактаб директорининг маънавий-маърифий ишлар бўйича ўринбосари Худоёр Хўжамуродов муассаса фаолияти намунали йўлга қўйилишида самарали хизмат кўрсатаётган фидойи устозлардан бири.
Унинг ўқитувчилик касбини эгаллаши ҳам бежизга эмасди. Отаси Саъдулла Хўжамуродов, онаси Сафаргул Эгизбоевалар ҳам ўқитувчи бўлганлигидан оиласида болалар тарбияси-таълими хусусида кўп суҳбатлар бўлар, болаларга нисбатан ўзгача меҳр, фидойилик уфуриб турадиган бундай суҳбатлар Худоёрни бефарқ қолдирмас эди. Она тили ва адабиёт фани ўқитувчиси, ижодкор, ўз соҳаси бўйича ўқишдан, изланишдан тўхтамайдиган, оиласида ҳам ўқувчиларининг билимини ошириш учун улар билан соатлаб шуғулланадиган онаси каби ўқитувчи бўлиш орзуси уни доимо интилишга, тинимсиз илм олишга ундарди. Илк меҳнатлари самараси - олийгоҳга ўқишга кирганида жуда хурсанд бўлди.
Худоёр Хўжамуродов 2005 йилда ўзи таълим олган, дадаси, онаси меҳнат қилаётган мактабда ўқитувчилик фаолиятини бошлади. 2013 йилгача ўқувчиларга она тили ва адабиёт фанидан дарс берди. 2013 йилдан бери эса мактаб директорининг маънавий-маърифий ишлар бўйича ўринбосари бўлиб ишлаб келаяпти. У хизмат лавозими тақозосига кўра, ўқитувчилар жамоасида ўқувчиларга сифатли таълим берилишини таъминлаш, соғлом маънавий муҳитни шакллантириш, ўқувчиларда илм олишга, ўқиб-ўрганишга рағбат уйғотиш, ўзаро аҳилликда муассаса ички тартиб-интизомига риоя этишларига эришиш, иқтидорларини ривожлантириш, истеъдодларини намойиш этишларига шароит яратиш каби бири-биридан муҳим ва долзарб ишларни аъло даражада уддалаб келаётир. Булар мактаб ўқитувчилари, ўқувчилари эришаётган ютуқларда ўз аксини топаяпти.
Хусусан ўтган йили муассасанинг 11-синфини битирган 25 нафар ўқувчиларнинг 11 нафари республикамиздаги турли олийгоҳларнинг талабалари бўлдилар, 11-синф ўқувчиси Гулдона Тўлибоева асосий фанлар олимпиадасининг республика босқичида фаол иштирок этиб келди. 4-синф ўқувчиси Рухшона Норбоева тасвирий санъат бўйича танловда туманда 1-ўринни эгаллаб, Қорақалпоғистон Рсепубликаси босқичида қатнашиб келди ва чизган расмлари юқори баҳоланди. 7-синф ўқувчи қизларидан ташкил топган стритболчилар жамоаси “Беш ташаббус олимпиадаси”да стритбол бўйича Қорақалпоғистон Республикасида учинчи ўринни эгалладилар.
Жорий йилги хорижий тиллар энг яхши ўқитиладиган мактаб танловида ушбу муассаса фахрли 3-ўрин соҳиби бўлди ва 50 миллион сўм пул мукофоти билан тақдирланди. Хорижий тиллар фани ўқитувчилари Тимур ЙЎлдошев C1, Хуршида Ражабова B2 сертификатларини, Нураддин Хўжабоев, Соҳиба Йўлдошева, Алишер Абдуллаевлар эса халқаро ва миллий сертификатларни ҳимоя қилиб олдилар.
Мактабда Шарофат Холмуродова, Тўлибой Йўлдошев, Моҳинур Тўрабоева каби ижодкор ўқитувчилар ҳам борлиги маънавий-маърифий ишлар самарадорлигини оширишда муҳим аҳамият касб этмоқда.
Айни кунда ушбу муассасада 47 нафар ўқитувчилар 457 нафар ўқувчиларга таълим-тарбия беришмоқда. Эришилаётган ютуқларда Худоёр Хўжамуродовнинг муносиб ҳиссаси бор.
Ойгул РАЖАБОВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
