Beshtom mahallasida tuman hokimining yoshlar bilan uchrashuvi va sayyor qabuli boʻlib oʻtdi

11-may kuni Beshtom mahalla fuqarolar yigʻini binosida tuman hokimining sayyor qabuli va yoshlar bilan uchrashuvi boʻlib oʻtdi. Uchrashuvda tuman hokimi Sultonboy Yoʻldashev, Xalq qabulxonasi boʻlimi mudiri Erkin Rajabov, tuman hokimi oʻrinbosari Mahmud Shermetov hamda mahalla faollari, yoshlar vakillari ishtirok etdi. Ishtirokchilarning 18 nafari tuman hokimiga biriktirilgan yoshlar boʻlib, sayyor qabulda ular oʻz muammo va takliflari bilan masʼullarga murojaat qildilar.

Uchrashuvda tuman hokimi Sultonboy Yoʻldashev jamiyatning eng katta taʼsirchan kuchi sifatida bugun yurtimiz yoshlari davlatimizda olib borilayotgan keng islohotlar jarayonida faol ishtirok etishayotganini, vatanimiz taraqqiyotini taʼminlash yoʻlida oʻz gʻoya va takliflari bilan maydonga chiqayotganligini, shu boisdan yoshlarning intilishlari va hayotiy maqsadlari har qanday soha rivojida katta asos boʻlib xizmat qilishini aytib oʻtdi.

Darhaqiqat, yoshlar muammolarini oʻrganish har bir davrning eng muhim masalasi sifatida qaralib kelingan va bu jarayon bugun oʻzining yangi rivojlanish davrini boshidan oʻtkazmoqda.

Ayniqsa, yoshlar bandligi va bu orqali ularning daromad topishlarini taʼminlash borasida soʻnggi yillarda davlatimiz tomonidan qator amaliy choralar olib borilmoqda. Ammo, bu borada talay muammolar ham borki, ularni hal etish boʻyicha masʼul idora vakillarining jonbozligi va vatanparvarligi bugun har qachongidanda muhimdir.

Uchrashuv davomida mahallada yashovchi yoshlardan biri – Maʼmurjon Matrizayev subsidiya asosida chilangarlik asbob-uskunalarini olishda amaliy yordam soʻrab murojaat qildi. Uning murojaati shu yerning oʻzida ijobiy hal etildi. Faol yoshlardan yana biri Temur Shomuradov esa safarbarlik chaqiruv rezerviga borish istagi borligini, ammo oilaviy sharoiti tufayli badal pullarini toʻlashga imkoni boʻlmayotganligini aytib murojaat qildi. Uning murojaati ham shu yerning oʻzida oʻrganib chiqilib, ijobiy hal etiladigan boʻldi.

Undan tashqari, uchrashuvda mahalla hududida istiqomat qiluvchi faol fuqarolar mahalla infratuzilmasini yaxshilash boʻyicha oʻz takliflarini bildirib oʻtishdi.

Taʼkidlash lozimki, jamiyatimizning eng muhim boʻgʻini hisoblanadigan mahalla bugun hayotimizga daxldor barcha masalalarni hal etishda bevosita ishtirok etuvchi, xalq va davlatni bir-biriga yaqinlashtirib, ular oʻrtasidagi munosabatlarni tartibga soluvchi muhim tuzilmaga aylanib bormoqda.

Aniqroq aytganda, davlatimizning barqaror rivojlanishi, xalq farovonligining oshishi, fuqarolarimizning oʻz hayotidan rozi boʻlib, ertangi kunga qatʼiy ishonch bilan yashashlarini taʼminlash boʻyicha qoʻyilgan maqsad va vazifalarni izchil amalga oshirishda jamiyatning eng muhim boʻgʻini hisoblangan mahalla institutining oʻrni va ahamiyati beqiyosdir.

Shu maʼnoda, bugun mahallalarda yuzaga kelayotgan muammolarni shu yerning oʻzida, mahalla ichida ijobiy hal etish har qachongidanda ham muhim ahamiyat kasb etmoqda. Bu borada esa masʼullarning joylarga chiqib, aholi bilan uchrashuvlar oʻtkazayotgani davlat va xalq oʻrtasida vosita boʻlmoqda.

Tuman hokimligining Axborot xizmati