BOShLANGʻICh SINFLAR OʻQUVChILARIGA BERILAYoTGAN YeNGIL NONUShTA TAYYoRLANIShI, TARQATILIShI NAZORAT QILINMOQDA

Oʻzbekiston Respublikasi Prezidentining “2022-2026-yillarga moʻljallangan Yangi Oʻzbekistonning taraqqiyot strategiyasi toʻgʻrisida”gi 2022-yil 28-yanvardagi Farmoniga muvofiq Qoraqalpogʻiston Respublikasi va Xorazm viloyatidagi boshlangʻich sinf oʻquvchilarini bosqichma-bosqich bepul ovqat bilan taʼminlash tizimini yoʻlga qoʻyish belgilangan edi. Bu borada Vazirlar Mahkamasining 2022-yil 25-avgustdagi 472-sonli qarori qabul qilindi. Ushbu qaror ijrosi yuzasidan Amudaryo tumanida ham muayyan ishlar qilinmoqda. Mavjud 85 ta umumiy oʻrta taʼlim maktablarining 1-4-sinflari oʻquvchilarini bepul ovqatlantirish tashkil etilgan va hozirgi kunga qadar davom ettirilmoqda.

Tumandagi 85 ta maktablarda tahsil olayotgan jami 14 ming 769 nafar boshlangʻich sinf oʻquvchilariga 4 ta tadbirkorlik subʼekti tomonida yengil nonushta yetkazlib berilmoqda. “Shoxnur Azatovich”, “Navroʻz”, “Mangʻit milk”, “Tabassum” masʼuliyati cheklangan jamiyatlari shular jumlasidandir. 

“Shoxnur Azatovich” masʼuliyati cheklangan jamiyati tomonidan 13 ta,  “Navroʻz” masʼuliyati cheklangan jamiyati tomonidan 29 ta, “Mangʻit milk” masʼuliyati cheklangan jamiyati tomonidan 14 ta hamda “Tabassum” masʼuliyati cheklangan jamiyati tomonidan 29 ta umumtaʼlim maktablarining boshlangʻich sinf oʻquvchilari oʻz vaqtida va sifatli yengil nonushta bilan taʼminlanmoqda.

1-4-sinflar oʻquvchilarini keytering usulida sogʻlom ovqatlantirish maqsadida tumandagi 85 ta maktablarning oshxonalarida va sinf xonalarida sanitariya va gigiyena qoidalari, normalari hamda talablariga mos shart-sharoitlar yaratilgan. Bu borada maktablarda maxsus komissiyalar tashkil qilingan boʻlib, maxsus komissiya tarkibiga shu maktabning direktori, hamshirasi, maʼnaviy-maʼrifiy ishlar boʻyicha direktor oʻrinbosarlari, maktabning amaliyotchi psixologi va sinf rahbarlari hamda ota-onalar vakillari kiritilgan. Ular kunlik hisobotlarini, 1-4-sinf oʻquvchilar davomatini tuman Xalq taʼlimi boʻlimiga har kuni berib boradi va hisobotlar umumlashtirilib, kundalik.com tizimi bilan solishtirilib, Qoraqalpogʻiston Respublikasi Xalq taʼlimi vazirligiga yetkaziladi.

Bundan tashqari, umumiy oʻrta taʼlim maktablarining boshlangʻich sinf oʻquvchilarini keytering usulida bepul ovqatlantirishning standart talablariga mosligini kundalik koʻrikdan oʻtkazib borish maqsadida tuman hokimligining bayoni asosida ishchi guruh tuzilgan.

Ishchi guruh tarkibiga tuman hokimining birinchi oʻrinbosari, tuman maktabgacha va maktab taʼlimi boʻlimi boshligʻi, tuman Tibbiyot birlashmasi boshligʻi, tuman sanitariya-epidemiologik osoyishtalik va jamoat salomatligi boʻlimi boshligʻi, Isteʼmolchilar huquqlarini himoya qilish jamiyatlari federatsiyasi tuman boʻlimi boshligʻi ham kiritilgan.

Ular muntazam ravishda oʻquvchilarga berilayotgan oziq-ovqat mahsulotlarining belgilangan talablarga mosligi, oziq-ovqat mahsulotlarining sanitariya-gigiyena talablari hamda taomnomaga mosligini va miqdorlarini koʻrikdan oʻtkazdilar.

Shuni eʼtirof etish kerakki, oʻquvchilarga sifatli yengil nonushta tayyorlash va yetkazib berishda “Navroʻz” masʼuliyati cheklangan jamiyati bazasi Qoraqalpogʻiston Respublikasida eng namunali baza deb topildi. Bu yerda tumanimizdagi 30 ta maktabning 4983 nafar boshlangʻich sinf oʻquvchilariga keytering usulida yengil nonushta tarqatib kelinmoqda. Taomnomadagi oziq-ovqat mahsulotlarining 60 foizi shu yerda ishlab chiqariladi va shu kunning oʻzida qadoqlanib, 30 ta maktabga yetkazib berilmoqda.

Oʻtkazilgan nazorat tadbirlari davomida ishchi guruh aʼzolari 1-4-sinflar oʻquvchilariga berilayotgan yengil nonushta mahsulotlarining tayyorlanishi va tarqatilishini koʻzdan kechirib, tegishli xulosalar berib bormoqdalar.

Bolalar – kelajagimiz. Ularning jismonan va maʼnan sogʻlom boʻlib ulgʻayishi koʻp jihatdan sogʻlom va sifatli ovqatlanishiga ham bogʻliq. Shunday ekan, bu borada nazorat oʻrnatish nafaqat masʼul idoralarning, balki keng jamoatchilikning ham vazifasi boʻlmogʻi kerak.