QORAQALPOQ ADABIYoTINING YIRIK NOMAYoNDALARI XOTIRASIGA HURMAT-EHTIROM KOʻRSATILDI

Umumtaʼlim maktablarida oʻquvchilarning bilimi, odobi va axloqiy sifatlarini baholab borish orqali ularning faolligini oshirishga alohida eʼtibor qaratiladi. Chunki sinfdoshlari va maktabdoshlari davrasida oʻzi erishayotgan yutuqlari haqida alohida eʼtirof etilib, maʼnaviy ragʻbatlantirilgan oʻquvchi oʻz ustida yanada samaraliroq ishlashga, yangi yutuqlarga erishishga intiladi.

Amudaryo tumanidagi 1-sonli umumtaʼlim maktabi pedagogika jamoasi tomonidan oʻquvchilarning ijtimoiy faolligini oshirishning oʻziga xos va samarali uslubidan foydalaniladi. Maktabda har dushanba va juma kunlari ertalabki saflanish oʻtkaziladi. Bu saflanish vaqtida oʻquvchilarning hafta davomida olgan bilimlari, yutuq va kamchiliklari tahlil qilinadi. Alohida muvaffaqiyatga erishgan oʻquvchi-yoshlar maktabdoshlariga namuna qilib koʻrsatiladi hamda ularning yutuqlarini maktab miqyosida ommalashtirishga qaratilgan targʻibot tadbirlari ham oʻtkaziladi. Dushanba kunlari esa yangi oʻquv haftasi uchun rejalar belgilab olinadi.

Joriy yilning 5-may sanasidagi saflanish hafta yakuniga bagʻishlandi. Unda anʼanaga koʻra, aʼlochi, jamoatchi va izlanuvchan oʻquvchilar boshqalarga ibrat qilib koʻrsatildi. Saflanish tadbiri davomida Oʻzbekiston Qahramonlari, Oʻzbekiston va Qoraqalpogʻiston xalq shoiri Ibroyim Yusupov hamda Oʻzbekiston va Qoraqalpogʻiston xalq yozuvchisi Toʻlepbergen Qaipberganov tavalludining 94 yilligiga bagʻishlangan adabiy xotira kechasi, shuningdek, faol oʻquvchi-yoshlarni taqdirlash marosimi oʻtkazildi.

Qoraqalpoq va oʻzbek adabiyotining zabardast namoyondalari, xalqimizning aziz farzandlari Ibroyim Yusupov qalamiga mansub sheʼrlarni oʻquvchilar mahorat bilan yoddan oʻqib berdilar. Shuningdek, Qoraqalpoq va oʻzbek adabiyotiga oʻzining betakror ijodiy faoliyati, biri-biridan qiziqarli nodir asarlari bilan munosib hissa qoʻshgan Toʻlerbergen Qaipberganov asarlari haqida toʻlqinlanib soʻz yuritdilar.

Tadbir davomida “Yosh gvardiyachilar” musobaqasining Amudaryo tumani bosqichida faxrli 3-oʻrinni egallagan “Qalqon” jamoasi tomonidan Xotira va qadrlash kuni munosabati bilan jangovor mashqlar namoyish etildi.

Shundan soʻng, “Yosh gvardiyachilar” musobaqasining tuman bosqichida faxrli 3-oʻrinni egallagan “Qalqon” jamoasi aʼzolari, sport musobaqalari hamda fanlar olimpiadasi, turli xil koʻrik-tanlovlarda ishtirok etib, gʻolib va sovrindor boʻlgan oʻquvchilar maktab maʼmuriyati tomonidan munosib taqdirlandilar.

Saflanish tadbiridan soʻng, maktabning qoraqalpoq tili oʻqituvchisi Aptabida Abdumuratova tomonidan qoraqapoq adabiyoti yirik namoyondalari Ibroyim Yusupov hamda Toʻlerbergen Qaipbergenovlar ijodiga bagʻishlangan davra suhbati ham tashkil etilib, unda qoraqalpoq tili fani uslubbirlashmasi va “Ziyvar” toʻgaragi aʼzolari ishtirok etishdi.

Qiziqarli savol-javoblar Ibroyim Yusupov sheʼriyati va Toʻlepbergen Qaipbergenov asarlarining badiiy qimmati, tili va uslubi, ular yaratgan zamonamiz qahramonlarining yoshlar taʼlim-tarbiyasida tutgan oʻrni haqida soʻz yuritildi. Shu bilan birga Ibroyim Yusuopv sheʼriyati hamda Toʻlepbergen Qaipbergenov asarlarining bilimdonlari ham aniqlanib, alohida eʼtirof etildi. Qoraqalpoq tili oʻqituvchisi Aptabida Abdumuratova “Ziyvar” toʻgaragi aʼzolari uchun Qoraqalpoq tili va adabiyotining xalqimiz maʼnaviyatini yuksaltirishdagi juda katta ahamiyati xususida sermazmun maʼruza qildi hamda toʻgarak aʼzolarining bu boradagi bilimlarini sinovdan oʻtkazish maqsadida qoraqalpoq folklor adabiyoti xazinasi durdonalaridan parchalar oʻqib berib, zakovat oʻyinlari oʻtkazdi. Oʻz navbatida toʻgarak aʼzolari qoraqalpoq folklor adabiyoti yuzasidan oʻzlarini qiziqtirgan savollar bilan murojaat qildilar. Barcha savollarga Aptabida Abdumuratova biri-biridan qiziqarli xalq ogʻzaki ijodi namunalari orqali javoblar berdi.

Maktabda oʻtkazilgan Saflanish tadbiri doirasidagi Xotira va qadrlash kuniga bagʻishlangan adabiy kecha, shuningdek “Ziyvar” toʻgaragi aʼzolari ishtirokidagi davra suhbati qiziqarli taassurotlarga boy tarzda oʻtdi.

Robiya YOʻLDOShEVA.