Xalq deputatlari Amudaryo tuman Kengashining 60-sessiyasi toʻgʻrisida axborot

2023-yil 25-aprel kuni Xalq deputatlari Amudaryo tuman Kengashining 60-sessiyasi boʻlib oʻtdi.

Sessiya ishida tuman Kengashi deputatlari, sektorlar rahbarlari, hokim oʻrinbosarlari, hokimlik masʼul xodimlari, huquq-tartibot organlari, boʻlimlar, jamoat tashkilotlari rahbarlari hamda ommaviy axborot vositalari vakillari ishtirok etdi. Sessiyani tuman hokimi – Xalq deputatlari tuman Kengashi raisi Sultonboy Yoʻldashev ochdi va olib bordi. Sessiya kotibligiga 7-Oybek saylov okrugidan deputat Saʼdulla Sodikov saylandi.

Sessiyada dastlab Fuqarolik ishlari boʻyicha Amudaryo tuman sudi tomonidan 2023-yilning dastlabki 3 oyi davomida amalga oshirilgan ishlar yuzasidan sud raisi Qayrulla Atamuratovning axboroti tinglandi. Axborotda keltirib oʻtilganidek, mazkur davr mobaynida sud tomonidan 1393ta ish koʻrib tamomlangan. Shuningdek, buyruq tartibida jami 884 arizalar boʻyicha sud buyrugʻi chiqarilgan.

Shundan keyin Jinoyat ishlari boʻyicha Amudaryo tuman sudi tomonidan 2023-yilning1-choragi davomida amalga oshirilgan ishlar yuzasidan sud raisi Asqar Safarov axborot berdi. Axborotda 3 oy mobaynida 29ta ish boʻyicha 39 nafar shaxsga nisbatan jinoyat ishi boʻyicha ayblov hukmi chiqarilib, 13 ta ish boʻyicha 13 nafar shaxsga nisbatan jinoyat ishi xarakatdan tugatilgani, 3ta ish boʻyicha 4 nafar shaxsga nisbatan oqlov huqmi chiqarilgani qayd etildi.

Sessiya ishida Oʻzbekiston Respublikasi Prezidentining “Hududlarni kompleks ijtimoiy-iqtisodiy rivojlantirish boʻyicha sektorlar faoliyatini yanada takomillashtirishga doir qoʻshimcha chora-tadbirlar toʻgʻrisida”gi qarorining tumandagi ijrosi yuzasidan sektor rahbarlarining hisobotlari tinglandi.

Kun tartibidagi masala yuzasidan tuman hokimi – 1-sektor rahbari Sultonboy Yoʻldashevning hisobotida taʼkidlanganidek, joriy yilning 3 oyi mobaynida sektor hududini ijtimoiy-iqtisodiy rivojlantirish dasturi doirasida 30,7 mlrd. soʻmlik 26ta loyihalar ishga tushirilib, 132ta yangi ish oʻrinlari yaratilgan.

3-sektor rahbari – tuman Ichki ishlar boʻlimi boshligʻi Jamaladdin Yusupov oʻz hisobotida joriy yilning 3 oyi davomida “Bandlik” dasturiga muvofiq Aholi bandligiga koʻmaklashish markazi tomonidan 138 nafar fuqarolar ishga joylashtirilganini, ijtimoiy himoyaga muhtoj 25 nafar fuqaro esa reablitatsiya-texnik vositalari va kreslo-aravachalar bilan taʼminlanganini aytib oʻtdi.

4-sektor rahbari – tuman DSI boshligʻi Aydos Seyitov hisobotida qayd etib oʻtilganidek, sektor hududida yashovchi 40 nafar ishsiz fuqarolar kasbga oʻqitilgan, 112 nafar fuqarolarga oilaviy tadbirkorlikini boshlashlari uchun 1 mlrd 904 mln. soʻmlik kreditlar ajratilgan.

Sessiya ishida tuman Xalq qabulxonasi, sektorlar va hududdagi tashkilotlar rahbarlarining aholi murojaatlari va muammolari bilan ishlash holati yuzasidan tuman Xalq qabulxonasi boʻlimi mudiri Erkin Rajabovning axboroti tinglandi. Axborotda qayd etilganidek, 2023-yilning 1-choragi davomida tuman aholisi tomonidan yoʻllangan murojaatlarning aksariyati bolalar nafaqasini tayinlash, aliment undirish, ish bilan taʼminlash, moddiy yordam, sogʻliqni saqlash va tabiiy gaz bilan bogʻliq muammolar haqida boʻlgan.

Sessiya kun tartibidagi navbatdagi masala yuzasidan tuman ichki ishlar boʻlimi boshligʻi, podpolkovnik Jamaladdin Yusupovning hisoboti tinglandi. Hisobotda taʼkidlanganidek, tumanda olib borilgan profilaktik tadbirlar natijasida oʻtgan 3 oyda qayd etilgan jami jinoyatlar oʻtgan yilning shu davriga nisbatan 45 tadan 40 ga yaʼni 5 taga kamayishiga erishilgan.

Sessiya davomida tuman Adliya boʻlimi tomonidan 2023-yilning dastlabki 3 oyi davomida amalga oshirilgan ishlar yuzasidan Adliya boʻlimi boshligʻi Mansur Sadikovning hisoboti tinglandi. Hisobotda aytib oʻtilganidek, boʻlim tomonidan 3 oy davomida jami 43 ta davlat organlari va tashkilotlariga 179 ta qonun va qonunosti aktlari yetkazilgan.

Sessiya ishida “Tashabbusli byudjet” loyihasining 1-mavsumi doirasida 2 mingdan ortiq ovoz toʻplab, qoʻshimcha tarzda gʻolib boʻlgan 9 ta tashabbuslar loyihasini gʻoliblar qatoriga qoʻshish boʻyicha tuman hokimining birinchi oʻrinbosari Rashid Salayev tomonidan taklif berildi. Taklif deputatlar tomonidan bir ovozdan maʼqullandi.

Sessiya kun tartibida Amudaryo tumani hokimligi Bolalarni himoya qilish shoʻʼbasining joriy yilning 1-choragi davomidagi faoliyati yuzasidan shoʻʼba mudiri Jahongir Xolmurodovning axboroti tinglandi. Taʼkidlab oʻtilganidek, voyaga yetmaganlar oʻrtasida jinoyatchilik va huquqbuzarlikning oldini olish maqsadida hamkor tashkilotlar bilan birgalikda hozirgi kunga qadar 78 ta “Oʻquvchi”, “Tungi reyd”, “Tigʻ” va ”Davomat” tadbirlari oʻtkazilgan.

Sessiya ishida Oʻzbekiston Respublikasi Prezidentining “Dehqon xoʻjaliklari tashkil etishni qoʻllab-quvvatlash orqali aholi daromadlarini oshirish boʻyicha qoʻshimcha chora-tadbirlar toʻgʻrisida”gi qarori ijrosi yuzasidan tuman Fermer, dehqon xoʻjaliklari va tomorqa yer egalari Kengashi raisi Ilhom Palvonov hisobot berdi. Hisobotda dehqon xoʻjaliklarini tashkil etish, chorvachilik, paxta-gʻallachilikni rivojlantirish maqsadida zahira yer maydonlarini ochiq elektron tanlovga qoʻyish boʻyicha taklif berildi. Taklif deputatlar tomonidan bir ovozdan maʼqullandi.

Sessiya ishida kun tartibiga kiritilgan barcha masalalar atroflicha koʻrib chiqilib, tuman Kengashining tegishli qarorlari qabul qilindi. Shuning bilan sessiya oʻz ishini yakunladi.

Tuman hokimligining Axborot xizmati.