REFERENDUM UChASTKALARINING ALOQA QURILMALARI VA INTERNET BILAN TAʼMINLANGANLIGI KOʻZDAN KEChIRILDI
Yurtimizda yaqin kunlarda, yaʼni 30-aprel kuni boʻlib oʻtadigan siyosiy jarayon – Konstitutsiyaviy qonun loyihasi boʻyicha referendumga qizgʻin hozirlik koʻrilmoqda. Qonunchilikda belgilangan tartibda hamda Oʻzbekiston Respublikasi Markaziy saylov komissiyasining Referendumga tayyorgarlik koʻrish va uni oʻtkazish boʻyicha rejasiga muvofiq, barcha chora-tadbirlar bosqichma-bosqich amalga oshirilmoqda. Ayni paytda hududlarda tuzilgan uchastkalar Referendumga tayyor qilib qoʻyildi.
“Oʻzkomnazorat” inspektsiyasi Qoraqalpogʻiston Respublikasi hududiy boʻlimi va Raqamli texnologiyalar vazirligi Qoraqalpogʻiston Respublikasi hududiy sektori masʼullari Amudaryo tumanidagi Referendum uchastkalarida boʻlib, oʻrganish ishlarini olib bordilar. Masʼullar tomonidan Referendum uchastkalarida aloqa qurilmalari, internet xizmatlarining uzluksiz va sifatli ishlashi koʻzdan kechirilib, tekshirildi. Shuningdek, saylovchilarning yagona elektron roʻyxati va saylov jarayonini boshqarish axborot tizimidan foydalanishning texnik imkoniyatlari oʻrganildi.
Maʼlumki, “Oʻzbekiston Respublikasining referendumi toʻgʻrisida”gi Oʻzbekiston Respublikasi Qonuniga koʻra, referendum uchastkalari referendum oʻtkazuvchi okrug komissiyalari tomonidan tumanlar, shaharlar, shaharlardagi tumanlarning chegaralarini inobatga olgan holda, referendumda ishtirok etish huquqiga ega boʻlgan fuqarolarga mumkin qadar koʻproq qulaylik yaratish maqsadida tuziladi. Shu jumladan, harbiy qismlar, sanatoriylar, dam olish uylari, kasalxonalar va boshqa statsionar davolash muassasalarida, olis va borish qiyin boʻlgan yerlardagi fuqarolar turgan joylarda, qamoqda saqlash va ozodlikdan mahrum etish joylarida ham referendum uchastkalari tuziladi. Bundan tashqari, mazkur Qonunda xorijdagi fuqarolarimizning oʻz huquqlaridan foydalanishlari uchun sharoit yaratish maqsadida Oʻzbekiston Respublikasining xorijiy davlatlardagi diplomatik va boshqa vakolatxonalari huzurida ham referendum uchastkalari tuzilishi mumkinligi koʻrsatilgan.
Oʻzbekiston Respublikasi Referendumini oʻtkazuvchi 1-Qoraqalpogʻiston okrug komissiyasi qaroriga koʻra Amudaryo tumanida 64 ta uchastka tuzildi. Ulardan 57 tasi umumtaʼlim maktablari, 2 tasi madaniyat uyi, 3 tasi texnikum va kasb-hunar maktablari, 1 tasi tuman Sport maktabi, 1 tasi Bolalar musiqa va sanʼat maktabi binosida joylashtirilgan. Ushbu uchastkalardagi referendum oʻtkazuvchi komissiyalar tomonidan tayyorgarlik ishlari oʻz muddatida olib borilib, referendum kuniga tayyor qilib qoʻyildi. Uchastkalarning har biriga telefon aloqasi oʻrnatilib, yangidan raqamlar berildi. Shuningdek, Olmazor mahallasidagi 95-referendum uchastkasi va Farovon mahallasidagi 93-referendum uchastka markazlari videokuzatuv kameralari bilan taʼminlandi. Ayni paytda internet xizmatlari bilan taʼminlash ishlari ham amalga oshirilib, aloqa sifatini yanada yaxshilashga eʼtibor qaratilmoqda.
Undan tashqari, uchastkalar zarur oʻquv qoʻllanmalar, siyosiy-huquqiy bilimlarni mustahkamlashga qaratilgan boshqa adabiyotlar bilan ham taʼminlangan. Referendumni qonun talablariga muvofiq tarzda oʻtkazish maqsadida referendum oʻtkazuvchi uchastka komissiyalari aʼzolari uchun oʻquv-seminarlar tashkil etish, ularning siyosiy-huquqiy bilimlari, amaliy koʻnikmalarini boyitish ham rejalashtirilgan.
O.Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
