TOMORQA – XALQIMIZ UChUN HAQIQIY TAʼMINOT MANBAIGA AYLANMOQDA

Aholining kundalik ehtiyoji uchun zarur oziq-ovqat mahsulotlari bilan taʼminlanishida tomorqa xoʻjaliklarining ahamiyati katta. Shu bois, Amudaryo tumanida tomorqa xoʻjaligi faoliyatini rivojlantirish, “Bir mahalla – bir mahsulot” tamoyili asosida mahallalarni ixtisoslashtirishga qaratilayotgan eʼtibor tufayli ovul va mahallalarda “dala doʻkonlari”, oʻrta va kichik  sigʻimli muzlatgichli omborxonalar, poliz va sabzavot ekinlarining koʻchatlarini yetishtiruvchi yengil konstruktsiyali issiqxonalar tashkil etilayotgani oʻzining samarasini bermoqda.

Joriy 2023-yilda Amudaryo tumanidagi 39853 ta tomorqa va  295 ta dehqon xoʻjaliklari ixtiyoridagi 6652,2 gektar ekin maydonlaridan unumli foydalanish maqsadida tuman Fermer, dehqon xoʻjaliklari va tomorqa yer egalari Kengashi mutaxassislari tomonidan aniq yoʻnaltirilgan chora-tadbirlar ishlab chiqildi. Unga koʻra, 2023-yilda  5807,3 gektar maydonga ertagi ekinlarni, jumladan, 2731,1 gektarga sabzavot, 758,1 gektar yerga poliz, 869,2 gektar kartoshka, 422,1 gektar dukkakli, 160,9 gektar maydonga moyli ekinlarni ekish rejalashtirilgan. 865,2 gektar yerga esa boshqa zarur ekinlarni joylashtirish belgilandi.

Ayni paytda dehqon xoʻjaliklari va tomorqa yer egalari tomonidan 2023-yil hosili uchun 1141,2 gektar maydonga piyoz, sarimsoqpiyoz ekildi. Aholi tomorqalaridagi 1183 ta issiqxonalarda ertagi poliz va sabzavot koʻchatlari yetishtirilib, ichki bozorga toʻliq yoʻnaltirilmoqda. Bundan tashqari, 49 ta ovul va mahallalardagi aholi tomorqalarida jami 10,5 gektar maydonda har biri 1-1,5 sotixli 804 ta issiqxonalar tashkil etish koʻzda tutilgan boʻlib, bugungi kunda 421 ta ana shunday issiqxonalar qurilib, egalariga topshirildi.

“Bir mahalla – bir mahsulot” tamoyili asosida 21 ta mahallani ixtisoslashtirish, har bir sektorda 2 tadan mahalla, 16 ta koʻcha va 521 ta xonadonning tomorqa xoʻjaliklarini namunali talablar darajasiga yetkazish rejalashtirilgan va shu asosda ish olib borilmoqda.

Shuningdek, tuman aholisini sifatli poliz va sabzavot mahsulotlari bilan taʼminlashni yanada yaxshilash maqsadida jami 12 ta mahallada, shundan 8 ta aholi gavjum yashaydigan mahallalarda yengil konstruktsiyali “dala doʻkonlari” va kichik sigʻimli muzlatgich omborxonalar faoliyatini yoʻlga qoʻyish rejalashtirilgan.

Xalqimizning uzumga boʻlgan ehtiyojini qondirish maqsadida joriy yilning oʻzida 6000 ta xonadonning koʻcha va hovli chetlariga uzum koʻchatlarini ekish rejalashtirilgan boʻlib, ayni paytgacha 4900 ta xonadon hovlisi va koʻcha qismiga uzum toklari ekildi.

Aholi tomorqasidan samarali foydalanish maqsadida xonadon chorvasi, xonadon parrandasi, shuningdek, quyonchilik, qoʻy-echki, qoramol boqish va asalarichilikni rivojlantirish borasidagi ishlar ham samarali tashkil etildi. Amalga oshirilayotgan chora-tadbirlar natijasida, bugungi kunda 513 ta xonadon tomorqasida 51300 bosh parranda parvarishlashni yoʻlga qoʻyish ishlari boshlab yuborildi. Ushbu rejaga koʻra, aholiga parrandalarni yetkazib berish uchun uchta taʼminotchi korxonalar biriktirildi. Ayni paytda 1223 ta xonadonning har birida kamida 65 bosh parranda boqish yoʻlga qoʻyilib, buning natijasida 1223 ta ish oʻrni yaratildi.

Tomorqa xoʻjaliklariga sifatli xizmat koʻrsatish maqsadida 8 ta “Tomorqa xizmati” MChJ tashkil etildi. “Yashil makon” umummilliy harakati doirasida “Amudaryo tomorqa xizmat” MChJ klaster korxonasi tomonidan 6340 tup mevali va manzarali daraxt koʻchatlari olib kelinib, tomorqa yer egalariga arzon narxlarda yetkazib berildi.

Tomorqa yer egalarining yerdan unumli foydalanishlari uchun zarur shart-sharoitlar yaratish, tomorqani xalqimiz uchun haqiqiy taʼminotchi korxonaga aylantirishlariga koʻmaklashish maqsadida Fermer, dehqon xoʻjaliklari va tomorqa yer egalari Kengashi huzuridagi fermer, dehqon xoʻjaliklari va tomorqa yer egalarini  qoʻllab-quvvatlash jamgʻarmasi hisobidan imtiyozli kredit mablagʻlari ajratilayotgani tomorqa yer egalari uchun qulay imkoniyatlar yaratib, ularning moʻl-koʻl daromad olishlarini taʼminlamoqda.

Ilhom POLVONOV,

tuman Fermer, dehqon xoʻjaliklari va

tomorqa yer egalari Kengashi raisi.