9-aprel — Qoraqalpogʻiston Respublikasi Konstitutsiyasi qabul qilingan kun munosabati bilan Amudaryo tumanida bayram tadbiri oʻtkazildi

Bundan 30-yil oldin, aniqrogʻi, 1993-yil 9-aprel kuni XII chaqiriq Qoraqalpogʻiston Respublikasi Oliy Kengashining XII sessiyasida Qoraqalpogʻiston Respublikasi Konstitutsiyaci qabul qilingan edi. Amudaryo tumanida ham ushbu sana har yili yuqori saviyada va koʻtarinki ruhda nishonlanadi.

8-aprel kuni tuman Madaniyat boʻlimi binosida boʻlib oʻtgan bayram tadbirida tuman hokimi Sultonboy Yoʻldashev, deputatlar, sektorlar rahbarlari, hokim oʻrinbosarlari, tuman hokimligi, muassasa, korxona va tashkilotlar masʼullari, fuqarolar yigʻinlari raislari, taʼlim sohasi ilgʻorlari, keng jamoatchilik vakillari hamda ommaviy axborot vositalari vakillari ishtirok etdi.

Sahnada oʻrnatilgan ekranda mamlakatimizda, xususan Qoraqalpogʻistonda turli sohalarda erishilayotgan yutuqlar aks etgan roliklar namoyish etildi. Tadbir ishtirokchilari koʻz oʻngida yurtimizda amalga oshirilayotgan islohotlar, ulkan oʻzgarishlar, yoshlarning bilim olishi, aholining farovon turmush kechirishi uchun yaratilayotgan sharoit va imkoniyatlar namoyon boʻldi.

Tadbir avvalida Oʻzbekiston va Qoraqalpogʻiston Respublikalarining davlat madhiyalari yangradi.

Shundan soʻng tuman hokimi Sultonboy Yoʻldashev yurtdoshlarimizni Qoraqalpogʻiston Respublikasi Konstitutsiyasi qabul qilinganining 30 yilligi bilan samimiy muborakbod etib, xalqimiz hayotini yanada obod va farovon qilish, yurtimizda yashayotgan millati, tili va dinidan qatʼiy nazar, har bir insonga eʼtibor va gʻamxoʻrlik koʻrsatish – Konstitutsiyamizning bosh maqsadi eʼkanligini eʼtirof etdi. Shuningdek, bosh qonunimizni chuqur oʻrganish, anglash, hayotga joriy etish va unga soʻzsiz amal qilish – barchaning sharafli burchi ekanligini taʼkidladi.

Shundan soʻng tadbirda tumanimizning taniqli va xushovoz sanʼantkorlari tomonidan ona Vatan madhi tarannum etilgan goʻzal kuy-qoʻshiqlar yangradi. Ayniqsa, 21-sonli Bolalar musiqa va sanʼat maktabi orkestr jamoasi ijrosidagi “Qoraqalpoq syuitasi” kuyini barcha maroq bilan tingladi.

Shuningdek, tumanimizning taniqdi estrada yulduzlari tomonidan ijro etilgan Qoraqalpoq tilidagi “Maqtanishim”, “Joldimsiz”, “Qaraqalpaq jaslari” qoʻshiqlari, “Yosh kitobxon oila” tanlovining Respublika bosqichi gʻolibi Umidbek Oʻrinboyev hamda “Zulfiya” nomidagi Davlat mukofoti sohibasi Barno Samandarova tomonidan birgalikda ijro etilgan “Referendumga chorlaymiz” qoʻshigʻi yigʻilganlar qalbida oʻzgacha gʻurur va iftixor uygʻotdi.

Bayram tadbirida oʻzbek va qoraqalpoq xalqining azaliy doʻstligi, tinch-totuv yashab kelayotganiligi goʻzal kuy-qoʻshiqlar va raqslar orqali tarannum etildi.

Baxtimiz qomusi boʻlgan Konstitutsiyamizda ham millati, tili va ijtimoiy mavqeidan qatʼiy nazar barcha yurtdoshimizning teng huquqli etib belgilab qoʻyilgani yurtimizning buyuk kelajagi va xalqimiz farovon turmushining huquqiy asosi boʻlib xizmat qiladi.

Tuman hokimligining Axborot xizmati.