“SOLIQChI - KOʻMAKChI” TAMOYILI ASOSIDA TADBIRKORLARGA AMALIY YoRDAM KOʻRSATILMOQDA

Amudaryo tuman Davlat soliq inspektsiyasi  xodimlari tomonidan soliq toʻlovchilarni qoʻllab-quvvatlash, mamlakatimizda ular uchun yaratilayotgan shart-sharoitlar, sohada joriy qilinayotgan oʻzgarishlar, imkoniyatlar hamda soliq qonunchiligidagi yangiliklardan vaqtida xabardor qilish, zarur tushunchalar, huquqiy maslahatlar berish maqsadida doimiy ravishda tushuntirish-targʻibot ishlari olib borilmoqda.

Xususan, “Soliqchi - koʻmakchi” tamoyili doirasida tumanda faoliyat yuritayotgan tadbirkorlik subʼektlarini yashil, sariq, qizil toifalar boʻyicha segmentlash orqali ularga zarur holatlarda yaqindan koʻmaklashish va yangidan tashkil etilgan xoʻjalik yurituvchi subʼektlar roʻyxati shakllantirilib, ushbu roʻyxat asosida joyiga chiqqan holda ularni qiynab kelayotgan muammolarni bartaraf etish choralari koʻrilayotgani, muhim ahamiyat kasb etmoqda.

Maʼlumki, Oʻzbekiston Respublikasi Prezidentining 2022-yil 31-avgustdagi “Qoraqalpogʻiston Respublikasida tadbirkorlik, innovatsion texnologiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida”gi 213-sonli Farmoniga muvofiq 2023-yilning 1-yanvaridan 2028-yil 1-yanvarga qadar boʻlgan davrda  foyda soligʻi, aylanmadan olinadigan soliq, yuridik shaxslarning mol-mulkiga solinadigan soliq va yuridik shaxslardan olinadigan yer soligʻi boʻyicha soliq stavkalari 50 foizga kamaytirildi. Shuningdek, ijtimoiy soliq miqdori ham kamaytirilib, 1 foiz miqdoridagi soliq stavkasida belgilandi.

Yakka tartibdagi tadbirkorlar uchun ijtimoiy soliq shaharlar hududida faoliyat yuritayotgan tadbirkorlar uchun 12 baravarga, tumanlar hududida faoliyat yuritayotganlar uchun esa 6 baravarga kamaytirilib, yiliga bazaviy hisoblash miqdorining 1 baravari miqdorida begilandi.

Soliq sohasidagi ushbu oʻzgarishlar va joriy etilayotgan yengilliklarni soliq toʻlovchilarga yetkazish hamda imtiyozlardan toʻgʻri foydalanishlarida amaliy yordam koʻrsatish maqsadida Amudaryo tuman Davlat soliq inspektsiyasi mutaxassislari masʼuliyati cheklangan jamiyat shaklidagi “Qoraqalpoq mahsulotlari” korxonasida boʻlishib, mazkur korxonada buxgalteriya hisob-kitobini yuritish, soliq imtiyozlari va ularni qoʻllash tartibi toʻgʻrisida zarur tushunchalar berdilar.

Shuningdek, ular masʼuliyati cheklangan jamiyat shaklidagi “Jayxun-Amu” mebel ishlab chiqarish korxonasida ham boʻlishib, soliq imtiyozlari va ularni qoʻllash tartibi, boshqa soliq turlaridan ortiqcha summasini qaytarish, kredit olish, yer ajratilishida eʼtibor berish zarur boʻlgan jihatlar, soliq organiga aloqador muammo va tushunmovchiliklar yuzasidan korxonada buxgalteriya hisobini yurituvchi xodimlarga zarur maʼlumotlar berdilar.

Joylarga chiqqan holda soliq sohasidagi  bu kabi oʻzgarishlar va yengilliklar toʻgʻrisida soliq toʻlovchilarga kerakli maʼlumot va tushunchalar berish joriy etilayotgan imtiyozlardan toʻgʻri foydalanish boʻyicha “Soliqchi – koʻmakchi” tamoyili asosida soha xodimlari tomonidan amaliy yordam koʻrsatilayotganidan tadbirkorlar mamnun boʻlishmoqda.

Robiya YOʻLDOShEVA.