TOMORQA XOʻJALIKLARI JADAL RIVOJLANMOQDA

Aholi tomorqalaridan samarali foydalanish orqali fuqarolarning oʻzini-oʻzi band qilish tamoyili asosida ish bilan taʼminlanishiga koʻmaklashish maqsadida Amudaryo tumanida  8 ta “Tomorqa xizmati” MChJlar tashkil qilinib, aholi tomorqalariga sifatli xizmat koʻrsatib kelinmoqda. Shuningdek, 2023-yilda “Jumurtov tomorqa xizmat” MChJ negizida tomorqachilik klasteri tashkil etilib, 12 ta yoʻnalish boʻyicha loyihalar ishlab chiqilgan. Ushbu loyihalarga koʻra, tomorqa yer egalarini zarur koʻchatlar, texnika xizmati, mahalliy va mineral oʻgʻitlar bilan muntazam ravishda taʼminlash choralari koʻrilmoqda.

Joriy yilda amudaryolik dehqonlar 2023-yil hosili uchun 5807,3 gektar yer maydoniga ertagi ekinlar, 3346,7 gektarga takroriy, 2613,0 gektar maydonda toʻqsonbosti ekinlar ekishni  rejalashtirishgan. Shuningdek, 13,9 gektar tomorqa yer maydonida 1183 ta issiqxona mavjud boʻlib, ayni paytda barchasida koʻchatlar va ertagi sabzavot nihollari parvarish qilinmoqda.

Shuningdek, tumandagi har bir sektordagi 2 tadan mahalla hududida 521 ta xonadon ixtiyoridagi tomorqa yer maydonlari namunali tomorqa darajasiga yetkazilishi moʻljallangan.

Qangli ovulida istiqomat qiluvchi Saidjon Hayitboyev tomorqa xoʻjaligini asosiy daromad manbaiga aylantirib, oʻzi, farzandlari va umr yoʻldoshining doimiy ish bilan bandligini taʼminlaganidan mamnun. Saidjon ogʻa 27 mln. soʻmlik imtiyozli kredit mablagʻi hisobiga tomorqa yerining bir qismida 5 sotixli issiqxona xoʻjaligini tashkil etganiga hali koʻp vaqt boʻlgani yoʻq. Lekin issiqxona xoʻjaligida ertagi sabzavot va poliz ekinlari koʻchatlarini tayyorlab, bozorga olib chiqqan ilk mavsumdayoq dehqonchilik sohasidagi bu yoʻnalish haqiqatan ham koni foyda ekanligini his etdi. Zimmasidagi kredit mablagʻini soʻndirish Saidjon ogʻa uchun muammo boʻlmadi. Issiqxona xoʻjaligidan yiliga 35-40 mln. soʻm daromad koʻrgan tomorqachi qisqa vaqt ichida kredit mablagʻining asosiy qismini soʻndirishga ham ulgurdi.

Saidjon ogʻa tomorqa xoʻjaligidan kelgan daromad tufayli uch qiz, bir oʻgʻilni oʻqimishli, kasb-korli qildi. Katta qizi Toshkent Davlat Agrar universitetida fan doktori, yana bir qizi shifokor, oʻgʻli veterinariya sohasi bilimdoni, kenja qizi esa ajoyib uy bekasi. 11 nafar nevaraning bobosi boʻlgan Saidjon ogʻa yaqinda shaxsiy avtomobilini yangi "Kobalt" rusumli avtomobilga almashtirdi.

Tomorqada 12 ming tupdan ziyod pomidor, bulgʻor qalampiri, bodring koʻchatlari barq urib rivojlanmoqda. Koʻchatlarning esa xaridorlari bisyor.

Koʻchatchilikdan tashqari, issiqxonada ertagi bodring, pomidor yetishtirilib, iyun oyining oʻrtalarida hosildan boʻshagan yerga takroriy ekin sifatida kuzgi barra piyoz, koʻkatlar va yana bodring va pomidor ekishadi.

– Kuzgi sabzavotlar juda xaridorgir boʻladi, – deydi Saidjon ogʻa. – Xudo xohlasa, tomorqa yerimizdan bu yilgi daromad yanada moʻl boʻlishiga umid qilayapmiz. Nevaralarim ham koʻmakchi boʻlib qolishdi.

Biz esa tomorqani oila byudjetining barqaror taʼminot manbaiga aylantirgan Saidjon ogʻa Hayitboyevning ishlariga baraka tiladik.

Robiya Yoʻldosheva.