Amudaryo tumani hokimi Sultonboy Yoʻldashevning Navroʻz umumxalq bayrami munosabati bilan tumanimiz ahliga tabrigi

Aziz vatandoshlar!

Muhtaram otaxon va onaxonlar, qadrli amudaryoliklar!

Bugungi shukuhli kunlarda – Navroʻz ayyomi arafasida Siz azizlarga bayram tabrigini yoʻllash baxtiga musharraf boʻlganimdan benihoya mamnunman! Fursatdan foydalanib, Siz azizlarni, sizlar orqali barcha amudaryoliklarni, yurtdoshlarimizni yasharish va yangilanish ayyomi – Navroʻzi olam bilan chin qalbimdan tabriklayman!

Azal-azaldan bu qutlugʻ ayyomni Sharq xalqlari kun va tunning tenglashgan pallasi sifatida katta shodiyona bilan nishonlab keladi. Bu yil ham “Har kuning Navroʻz boʻlsin, jonajon Oʻzbekistonim!” degan bosh gʻoya asosida ovul va mahallalarimizda umumxalq sayillari oʻtkazilmoqda. Shahar va qishloqlarimizda yurtdoshlarimiz Navroʻz ayyomini koʻtarinki ruh va shod-xurramlik bilan qarshi olmoqdalar.

Tabiat uygʻonib, butun olam yashillikka burkanayotgan ushbu kunlarda dehqonlarimiz ham yaxshi niyatlar bilan yerga urugʻ qadashga tayyorgarlik koʻrmoqdalar. “Yashil makon” umummilliy loyihasi doirasida davom etayotgan koʻchat ekish tadbirlari bayram kunlarida yanada qizgʻin tus olmoqda. Bugun butun mamlakatimiz boʻylab davom etayotgan umumxalq hasharida esa millionlab yurtdoshlarimiz faol ishtirok etmoqdalar.

Navroʻz – sharqona Yangi yilning boshlanish sanasidir. Ota-bobolarimiz bu qutlugʻ ayyomda ezgu niyatlar bilan yangi rejalar tuzishgan. Tumanimizda ham “Insonga eʼtibor va sifatli taʼlim yili” deya nomlangan joriy yilda barcha sohalarda salmoqli ishlarni amalga oshirishni reja qilganmiz.

Jumladan, yangi taʼlim va tibbiyot maskanlarini qurish, rekonstruktsiya qilish, zamonaviy usulda jihozlash orqali inson qadrini yuksaltirish, farzandlarimiz kelajagiga mustahkam zamin yaratish yoʻlida qator ishlar amalga oshiriladi.

Hududlarni jadal rivojlantirish orqali aholi uchun qulay sharoitlar yaratishga alohida eʼtibor qaratiladi. Jumladan, infratuzilma obʼektlari yangidan qurilib, qayta rekonstruktsiya qilinadi. Ijtimoiy soha obʼektlarida barcha manbalar hisobidan 65,7 mlrd. soʻmlik 12 ta yirik loyihalar amalga oshiriladi.

Aholining uy-joyga boʻlgan ehtiyojini taʼminlash maqsadida 5 ta koʻp qavatli, 150 xonadonli arzonlashtirilgan uy-joylar quriladi.

Bundan tashqari, iqtisodiyotni jadal rivojlantirish va yuqori oʻsish surʼatlarini taʼminlashga alohida eʼtibor qaratiladi. Joriy yilda tumanni ijtimoiy-iqtisodiy rivojlantirish dasturi doirasida 62 ta loyihalarga 184,3 mlrd. soʻmlik investitsiyalar jalb qilinadi.

Shuningdek, tadbirkorlikni, qishloq xoʻjaligini yanada rivojlantirish, aholi bandligini taʼminlash, kambagʻallikni qisqartirish, aholining muhtoj qatlamini ijtimoiy himoya qilish yoʻnalishlarida keng koʻlamli ishlarni amalga oshirishni rejalashtirganmiz.

Qadrli bayram tadbiri ishtirokchilari!

Bugun shunday qutlugʻ kunda – Sharqona yangi yil arafasida ushbu ezgu rejalarimizni amalga oshirish yoʻlida xizmat qiluvchi oʻqituvchi va shifokorlarga, davlat va jamoat xizmatchilariga, dehqon va fermerlarga, barcha yurtdoshlarimizga kuch-quvvat, mustahkam salomatlik, ishlariga rivoj tilaymiz! Ularning xalqimiz turmush sharoitini yanada yaxshilash, odamlarimizni hayotdan rozi qilishdek ezgu ishlarida omad yor boʻlishiga tilakdoshmiz!

Aziz yurtdoshlar!

Sizlarni yana bir marta eng qadimiy va asl milliy bayramimiz – Navroʻzi olam bilan chin qalbimdan tabriklayman! Navroʻz ayyomi bilan boshlanayotgan Sharqona Yangi yil qutlugʻ va barakali kelsin! Dehqonlarimizning ezgu niyatlar bilan ekayotgan urugʻlari moʻl hosil berib, dasturxonlarimiz toʻkin boʻlsin! Xalqimizning turmushi farovon boʻlib, ozod va obod Vatanimiz hamisha gullab-yashnayversin!

Navroʻz bayramingiz muborak boʻlsin, aziz yurtdoshlar!