Амударё тумани ҳокими Султонбой Йўлдашевнинг Наврўз умумхалқ байрами муносабати билан туманимиз аҳлига табриги

Азиз ватандошлар!

Муҳтарам отахон ва онахонлар, қадрли амударёликлар!

Бугунги шукуҳли кунларда – Наврўз айёми арафасида Сиз азизларга байрам табригини йўллаш бахтига мушарраф бўлганимдан бениҳоя мамнунман! Фурсатдан фойдаланиб, Сиз азизларни, сизлар орқали барча амударёликларни, юртдошларимизни яшариш ва янгиланиш айёми – Наврўзи олам билан чин қалбимдан табриклайман!

Азал-азалдан бу қутлуғ айёмни Шарқ халқлари кун ва туннинг тенглашган палласи сифатида катта шодиёна билан нишонлаб келади. Бу йил ҳам “Ҳар кунинг Наврўз бўлсин, жонажон Ўзбекистоним!” деган бош ғоя асосида овул ва маҳаллаларимизда умумхалқ сайиллари ўтказилмоқда. Шаҳар ва қишлоқларимизда юртдошларимиз Наврўз айёмини кўтаринки руҳ ва шод-хуррамлик билан қарши олмоқдалар.

Табиат уйғониб, бутун олам яшилликка бурканаётган ушбу кунларда деҳқонларимиз ҳам яхши ниятлар билан ерга уруғ қадашга тайёргарлик кўрмоқдалар. “Яшил макон” умуммиллий лойиҳаси доирасида давом этаётган кўчат экиш тадбирлари байрам кунларида янада қизғин тус олмоқда. Бугун бутун мамлакатимиз бўйлаб давом этаётган умумхалқ ҳашарида эса миллионлаб юртдошларимиз фаол иштирок этмоқдалар.

Наврўз – шарқона Янги йилнинг бошланиш санасидир. Ота-боболаримиз бу қутлуғ айёмда эзгу ниятлар билан янги режалар тузишган. Туманимизда ҳам “Инсонга эътибор ва сифатли таълим йили” дея номланган жорий йилда барча соҳаларда салмоқли ишларни амалга оширишни режа қилганмиз.

Жумладан, янги таълим ва тиббиёт масканларини қуриш, реконструкция қилиш, замонавий усулда жиҳозлаш орқали инсон қадрини юксалтириш, фарзандларимиз келажагига мустаҳкам замин яратиш йўлида қатор ишлар амалга оширилади.

Ҳудудларни жадал ривожлантириш орқали аҳоли учун қулай шароитлар яратишга алоҳида эътибор қаратилади. Жумладан, инфратузилма объектлари янгидан қурилиб, қайта реконструкция қилинади. Ижтимоий соҳа объектларида барча манбалар ҳисобидан 65,7 млрд. сўмлик 12 та йирик лойиҳалар амалга оширилади.

Аҳолининг уй-жойга бўлган эҳтиёжини таъминлаш мақсадида 5 та кўп қаватли, 150 хонадонли арзонлаштирилган уй-жойлар қурилади.

Бундан ташқари, иқтисодиётни жадал ривожлантириш ва юқори ўсиш суръатларини таъминлашга алоҳида эътибор қаратилади. Жорий йилда туманни ижтимоий-иқтисодий ривожлантириш дастури доирасида 62 та лойиҳаларга 184,3 млрд. сўмлик инвестициялар жалб қилинади.

Шунингдек, тадбиркорликни, қишлоқ хўжалигини янада ривожлантириш, аҳоли бандлигини таъминлаш, камбағалликни қисқартириш, аҳолининг муҳтож қатламини ижтимоий ҳимоя қилиш йўналишларида кенг кўламли ишларни амалга оширишни режалаштирганмиз.

Қадрли байрам тадбири иштирокчилари!

Бугун шундай қутлуғ кунда – Шарқона янги йил арафасида ушбу эзгу режаларимизни амалга ошириш йўлида хизмат қилувчи ўқитувчи ва шифокорларга, давлат ва жамоат хизматчиларига, деҳқон ва фермерларга, барча юртдошларимизга куч-қувват, мустаҳкам саломатлик, ишларига ривож тилаймиз! Уларнинг халқимиз турмуш шароитини янада яхшилаш, одамларимизни ҳаётдан рози қилишдек эзгу ишларида омад ёр бўлишига тилакдошмиз!

Азиз юртдошлар!

Сизларни яна бир марта энг қадимий ва асл миллий байрамимиз – Наврўзи олам билан чин қалбимдан табриклайман! Наврўз айёми билан бошланаётган Шарқона Янги йил қутлуғ ва баракали келсин! Деҳқонларимизнинг эзгу ниятлар билан экаётган уруғлари мўл ҳосил бериб, дастурхонларимиз тўкин бўлсин! Халқимизнинг турмуши фаровон бўлиб, озод ва обод Ватанимиз ҳамиша гуллаб-яшнайверсин!

Наврўз байрамингиз муборак бўлсин, азиз юртдошлар!