KITOBXON YoShLAR IShTIROKIDA KUTUBXONAGA SAYoHAT TAShKIL ETILDI

Yoshlarning komil insonlar boʻlib voyaga yetishlarida kitob va kitobxonlikning ahamiyati nihoyatda kattadir. Kitobxonlik yoshlarning maʼnaviy dunyosini boyitadi, ularni halol yashash va toʻgʻri yoʻlga boshlaydi. Kitob hayotni chuqur anglab yetishga, insonning oʻz tanlagan orzulariga erishishga yordam beradi.

Amudaryo televideniyesida Oliy majlis huzuridagi Nodavlat notijorat tashkilotlarni va fuqarolik jamiyatining boshqa institutlarini qoʻllab-quvvatlash Jamoat fondi tomonidan moliyalashtirilgan “Yuksak maʼnaviyatli va axloqli yoshlar – kelajak poydevori” nomli grant loyihasi doirasida yoshlar oʻrtasida kitobxonlikni keng targʻib qilish maqsadida tumandagi Axborot-resurs markaziga maktab oʻquvchilari ishtirokida ekskursiya tashkil qilindi.

Shu yil 16-mart kuni yoshlarni kitoblarga oshno qilish, oʻquvchilarni kutubxonaga jalb etish kabi maqsadlarda tashkil etilgan ushbu tadbirga 36-sonli maktab oʻquvchilari, “Taraqqiyot koʻzgusi” gazetasi, Amudaryo televideniyesi tahririyati xodimlari tashrif buyurishdi.

Kutubxonada yoshlarni tuman Axborot-kutubxona markazining axborot-bibliografiya xizmati rahbari Rohatoy Romanova  boy kitob fondi bilan tanishtirdi. Markazda turli mavzulardagi adabiyotlar, Oʻzbekiston va Qoraqalpogʻiston miqyosidagi davriy nashrlar ham jamlangan.

Hozirgi kunda tuman Axborot-kutubxona markazi Oybek nomli mahalladagi yangi binoda faoliyat koʻrsatmoqda. Avval oʻz binosiga ega boʻlmagan ushbu maskanda endilikda foydalanuvchilarga axborot-kutubxona xizmati koʻrsatish yangi darajaga koʻtarildi. Kutubxona xizmati talablariga javob beradigan barcha sharoitlar, qulayliklar yaratilib, zamonaviy jihozlar bilan taʼminlandi. Eng muhimi – kitob fondi yanada boyitildi.  Markaz aholini zaruriy adabiyotlar va axborot bilan toʻla-toʻkis taʼminlash imkoniyatiga ega boʻlgan zamonaviy ziyo maskaniga aylandi. Zamonaviy sharoitlar yaratilgan xonalarga turli mavzulardagi kitoblar chiroyli javonlarga joylashtirilib, kitobxonlar uchun ham qulay sharoitlar yaratildi. Shuningdek, xodimlar uchun, kitob mutolaasi uchun va elektron kitoblardan foydalanish uchun ham alohida xonalar ajratildi.

Axborot-kutubxona fondi turli yoʻnalishdagi koʻplab adabiyotlar bilan toʻldirilib, ayni kunda uning kitoblar jamgʻarmasi 64 ming nusxaga yaqin, elektron resurslari esa 175 nomga yetdi. Foydalanuvchilar soni esa mazkur yilda 14 ming nafardan ortdi. Kutubxona boy merosga ega boʻlib, turli davrlarga taalluqli kitoblar, oʻtgan yillardagi gazeta va jurnallar saqlanib, mushtariylarga havola etib borilmoqda. Undan tashqari, kutubxona foydalanuvchilari, tashrif buyuruvchilarni fondda saqlanib kelinayotgan manbalar bilan tanishtirish, targʻib qilish maqsadida mavzuli koʻrgazmalar, tadbirlar va ijod ahli bilan uchrashuvlar tashkil etib kelinmoqda.

Ekskursiya davomida maktab oʻquvchilariga kutubxonaga aʼzo boʻlish, kitoblarni tanlash va uyga olib ketib oʻqish tartiblari tushuntirildi. Shuningdek ularga oʻqish zalida fan kitoblariga qoʻshimcha boʻlgan kitoblardan foydalanish mumkinligi, elektron kitoblarni mutolaa qilishlariga sharoit mavjudligi ham aytib oʻtildi.

Yoshlar kutubxonadagi turli adabiyotlar, gazeta va jurnallar bilan tanishib chiqishdi. Shu yerning oʻzida kutubxonaga aʼzo boʻlib, boy kitob fondidan, sevimli adabiyotlarini qiynalmasdan topishda kutubxona xizmatidan foydalanish imkoniyatiga ega boʻlishdi.

Ozoda Xudoyberganova.