QIPChOQLIK YoShLAR BILAN TUMAN HOKIMINING UChRAShUVI SAMIMIY MULOQOT TARZIDA OʻTDI

Mamlakatimizda yil sayin yoshlarga eʼtibor, ularning hayotiga oid muammolarini manzilli ravishda oʻrganish, yoshlar bilan davlat idoralari rahbarlari oʻrtasida mustahkam aloqa rishtalarini oʻrnatishga qaratilgan chora-tadbirlar natijasida davlat idoralari bilan xalq, ayniqsa yoshlar oʻrtasidagi byurokratik toʻsiqlarga barham berilib, oshkora va samimiy munosabat muhiti yaratilmoqda. Bu esa barcha toifadagi rahbarlar uchun xalq hayotiga oid muammolarni joyiga chiqib, batafsil oʻrganish, oʻz vaqtida zarur choralar koʻrish imkonini bermoqda.

Bu borada muhtaram Prezidentimizning har galgi xalq oldida, ayniqsa, yoshlar bilan uchrashuvlarida bugungi yoshlar – mamlakat iqtisodiyoti, siyosiy-maʼnaviy, ijtimoiy va madaniy hayotining ertangi kungi qudratli lokomativlaridir, degan yuksak eʼtirofi yoshlarning orzu-intilishlariga qanot bagʻishlamoqda. Ayniqsa, bilimdon, qobiliyatli, qoʻlida kasb-hunari bor, intiluvchan, lekin ijtimoiy himoyaga muhtoj yoshlar bilan boʻlayotgan bu kabi oshkora, samimiy muloqotlar asnosida ularning oʻz iqtidorlarini amalda namoyon etishlari uchun zarur shart-sharoitlar yaratilayotgani quvonarli.

Amudaryo tumanining Qipchoq shaharcha fuqarolar yigʻinida istiqomat qiluvchi yoshlar bilan 1-sektor rahbari, tuman hokimi Sultonboy Yoʻldashevning uchrashuvi qipchoqlik yoshlarning orzulari ushalishiga zamin yaratdi.

Oshkora va dildan suhbat tarzida boʻlib oʻtgan “Hokim va yoshlar” uchrashuvi tadbirida tuman Xalq qabulxonasi mudiri Erkin Rajabov, tuman hokimining oʻrinbosari Mahmud Shermetov, Yoshlar agentligi Amudaryo tumani boʻlimi boshligʻi Sardor Ismoilovlar hamda Qipchoq shaharchasida istiqomat qiluvchi 28 nafar faol va muammoli yoshlar, ommaviy axborot vositalari vakillari ishtirok etdilar.

Uchrashuvda Amudaryo tumani hokimi Sultonboy Yoʻldashev ishtirokchi yoshlar bilan dildan muloqotda boʻlib, ularning oʻqishda, ish faoliyatlari jarayonida erishayotgan yutuqlari, shuningdek, shaharcha yoshlarini qiynab kelayotgan muammolar bilan yaqindan tanishdi. Tanishuv asnosida, kasb-u kori, hunari bor-u oʻz tadbirkorligini yoʻlga qoʻyaolmayotgan, ijtimoiy himoyaga muhtoj yoshlar, shuningdek, bilimdon, zamonaviy kompyuter, texnologiyalari sotib olishni, dasturchi boʻlishni orzu qilgan yoshlar bilan suhbatlashdi.

Shu kunning oʻzida ana shunday qobiliyatli yoshlardan Ogʻabek Qurbonboyevga subsidiya asosida zamonaviy kompyuter jamlanmasi, tikuvchilik yoʻnalishida oʻzlarining yakka tadbirkorlik faoliyatlarini boshlash niyatida boʻlgan Sevara Rahimova hamda Inobat Abdikarimovalarga ham subsidiya asosida tikuv mashinasi olishda yordam berish choralari koʻrildi.

“Hokim va yoshlar” uchrashuvi davomida Xalq qabulxonasi mudiri Erkin Rajabov qipchoqlik yoshlarga huquqiy masalalarda oʻzining maslahat va tavsiyalarini berdi.

Yoshlar ham oʻz navbatida tuman hokimiga va boshqa masʼullarga oʻzlarini qiziqtirgan masalalar boʻyicha savollar bilan murojaat qildilar hamda tegishli javoblar oldilar.

Robiya Yoʻldosheva