AMUDARYoLIK ZULFIYaXONIM QIZI MUNOSIB KUTIB OLINDI

Amudaryoliklar uchun bu yilgi bahor oʻzgacha fayz, tarovat bilan boshlandi. Koʻngillarga quvonch ulashuvchi xushxabarlar bilan har bir xonadonga, koʻngillarga bahoriy fayz, havas va halovat baxsh etgan 8-mart – Xalqaro xotin-qizlar bayrami Amu eli uchun qoʻshaloq bayramga aylanib ketdi. Prezidentimizning Farmoniga muvofiq Amudaryo tumanining eng chekka, Xolimbeg qishlogʻidagi 35-sonli umumtaʼlim maktabining 11-sinf oʻquvchisi Barnoxon Samandarova Zulfiya nomidagi Davlat mukofoti sohibasi boʻldi. Barnoxon erishgan bu yutuq nafaqat u taʼlim olayotgan 35-sonli maktab oʻqituvchilar jamoasi va oʻquvchilari, balki barcha amudaryoliklarni toʻlqinlantirib yubordi.

Amu elidan chiqqan birinchi Zulfiyaxonim qizi – Barnoxon Samandarovani 8-mart – Xalqaro xotin-qizlar kunida ustozlari, maktabdosh doʻstlari, hamqishloqlari shod-u xurramlik bilan kutib oldilar. Barnoxon taʼlim olayotgan 35-sonli umumtaʼlim maktabi hovlisi shu kuni bayramona bezatilib, tadbirga amudaryolik Zulfiyaxonim qizini yuksak davlat mukofot bilan tabriklash uchun Amudaryo tumani hokimi Sultonboy Yoʻldashev, tuman hokimligi masʼullari, Barnoxon Samandarovaning hurmatli ustozlari, xolimbeglik ota-onalar, OAV vakillari tashrif buyurdilar.

Tantanali marosimni Amudaryo tumani hokimi Sultonboy Yoʻldashev ochdi va Barnoxon Samandarovani, uning ustozlarini, xolimbeglik ayol-qizlarni 8-mart – Xalqaro xotin-qizlar kuni bayrami hamda maktab pedagogika jamoasini shogirdlari erishgan yuksak Davlat mukofoti bilan tabrikladi.

– Barnoxon Samandarova butun Amu elining faxri. Uning adabiyot, sheʼriyat boʻstoniga qoʻyayotgan qadamlari yanada zalvorli boʻlishiga ishonaman. Shu bilan birga Barnoxon erishgan bu yutuq butun Amu elining iqtidorli qizlari uchun ibrat, namuna boʻladi va uning izdoshlari safi yanada oshadi, – dedi Sultonboy Yoʻldashev oʻz tabrik nutqida.

Tadbir davomida Sultonboy Yoʻldashev Barno Samandarovaga va uning ota-onasiga Amudaryo tumani hokimligi tomonidan tayyorlangan qimmatbaho sovgʻalarni topshirdi.

Shundan soʻng, Barnoxonning ijoddagi ustozi, Oʻzbekiston yozuvchilar uyushmasi aʼzosi, Qoraqalpogʻiston Respublikasida xizmat koʻrsatgan jurnalist Robiya Yoʻldosheva, “Barkamol avlod” bolalar maktabi direktori, Qoraqalpogʻiston Respublikasida xizmat koʻrsatgan madaniyat xodimi, Oʻzbekiston jurnalistlar uyushmasi aʼzosi Xonimjon Rajabova, faxriy ustoz Ziyodboy Tangirberganov, 35-sonli maktab oʻqituvchilaridan Tozaboy Norimmatov, Gulasal Xoʻjanova hamda  Barnoxonning birinchi oʻqituvchisi Liza Rajabovalar soʻzga chiqishib, Barnoxon Samandarovani chin dildan muborakbod etishdi. Ayniqsa, maktab oʻquvchilari 8-mart – Xalqaro xotin-qizlar kuni bayrami arafasida sport sohasida ham katta yutuqlarni qoʻlga kiritganlari xususida toʻlqinlanib soʻz yuritdilar.

Darvoqe, 35-sonli maktabda ayni paytda 692 nafar xolimbeglik yoshlar taʼlim-tarbiya olishadi. Ularning bilim asoslarini puxta egallashlari uchun 66 nafar malakali pedagog xodimlar fidoyilik bilan mehnat qilishmoqda. Oʻqituvchilarning 35 nafari ayol-qizlar boʻlib, 4 nafar oʻqituvchi oliy, 9 nafari birinchi, 22 nafari ikkinchi toifaga ega.

Maktabda taʼlim-tarbiya ishlarini zamon talablari darajasida tashkil etish uchun barcha sharoitlar yaratilgan. Xususan, sport-sogʻlomlashtirish ishlari, oʻquvchilarning jismoniy faolligini oshirishga qaratilgan chora-tadbirlar tufayli maktab oʻquvchilari orasida turli sport musobaqalarining gʻolib va sovrindorlari safi oshib bormoqda. Xususan, 8-mart – Xalqaro xotin-qizlar bayrami arafasida, 3-4-mart kunlari Xoʻjayli shahrida boʻlib oʻtgan sportning futzal turi boʻyicha Qoraqalpogʻiston Respublikasi birinchiligi musobaqalarida maktabning futzal jamoasi faxrli 2-oʻrinni egallab, musobaqaning Oʻzbekiston Respublikasi bosqichiga yoʻllanmani qoʻlga kiritishdi.

Tadbirda soʻzga chiqqan Barnoxon Samandarova Prezidentimiz bilan uchrashuvi, yuksak davlat mukofotini topshirishga bagʻishlangan tantanali marosimdan olgan hayajonli taassurotlari haqida ustozlariga, maktabdosh doʻstlariga faxrlanib hikoya qildi va yanada yaxshi oʻqishga, yangi-yangi sheʼrlar ijod etishga, ijod maydoniga kirib kelayotgan qizlarni qoʻllab-quvvatlashga soʻz berdi.

Mehmonlari va ustozlarining dil soʻzlari, quvonchlari bilan maroqli oʻtgan tadbir yakunida Barnoxon Samandarovani tarbiyalab voyaga yetkazgan ota-onasi Tozaboy Samandarov va Rayhon Samandarovalarga minnatdorchilik ramzi sifatida tuman hokimi Sultonboy Yoʻldashev oʻz sovgʻalarini hadya etdi. Oʻz navbatida Barnoxonning ota-onalari koʻrsatilayotgan hurmat va eʼtibor uchun barchaga chin dildan minnatdorchilik bildirdi.

Muyassar Xalillayeva.

ZULFIYa IZDOShI - BARNOXON QIZIM!

Oliy maqsad qoʻyding oldingga, qoʻrqmay,

Ijodga shoʻngʻiding, baʼzan tuz totmay.

Qiyinchiliklarni yengding tap tortmay,

Mukofot muborak, Barnoxon qizim,

Sheʼr-u baytlaringda yurtingni kuylab,

Har satringga Vatan mehrini joylab.

Samarasin kutding necha yil, oylab,

Mukofot muborak, Barnoxon qizim,

Azim poytaxt - Toshkent chorladi seni,

Bilmasding tayyorlab qoʻyganin neni,

Ajoyib xabar-xushlading dilni,

Mukofot muborak, Barnoxon qizim,

Ustozlaring qutlar, koʻzlarida yosh,

Senga havasdadir barcha - qari, yosh.

Xolimbegning faxri sendek qalamqosh,

Mukofot muborak, Barnoxon qizim,

Niyatingga yetgin, Alloh qoʻllasin,

Yuzingdagi tabassum aslo soʻlmasin.

Qalbingda hech qachon armon qolmasin,

Zulfiya izdoshi - Barnoxon qizim,

Tozaboy Narimmatov, 35-sonli maktabning geografiya fani oʻqituvchisi.