FIDOYI MEHNATLAR SAMARASI

Umumiy oʻrta taʼlim muassasalarida oʻquvchilarni milliy va umuminsoniy qadriyatlar ruhida tarbiyalash muhitini yaratishda, milliy odob-axloq meʼyorlarini tarbiya jarayoniga tatbiq etishda, oʻquvchilar koʻnglida ona Vatanga, buyuk ajdodlarimiz merosi va xalqimizning bugungi bunyodkorlik ishlariga yuksak ehtirom tuygʻularini singdirishda maktab direktorlarining maʼnaviy va maʼrifiy tarbiya ishlari boʻyicha oʻrinbosarlarining zimmasidagi vazifalar juda salmoqli. Shuningdek, u oʻqituvchilar jamoasida ham bilimdonligi, insoniy fazilatlari bilan barchaga oʻrnak boʻla olishi lozim. Pedagogik jamoada sogʻlom ijodiy muhitni yarata olishi, ilgʻor oʻqituvchilarni oʻz vaqtida ragʻbatlantirib, yanada samarali ishlashga undashi muassasada taʼlim sifati oshishiga zamin boʻladi.

Asosiy koʻrsatkichlariga koʻra yashil toifaga kiruvchi tumanimizdagi 26-sonli umumiy oʻrta taʼlim maktabining maʼnaviy-maʼrifiy ishlar boʻyicha direktor oʻrinbosari Hamida Artikova jonkuyar oʻqituvchi, xizmat lavozimini sidqidildan ado etib kelayotgan taʼlim fidoyilaridan biridir.

U oʻrta maktabni tugatib 1998-2002-yillarda Qoraqalpoq davlat universitetining biologiya fakultetida oʻqidi. Oʻqituvchilik faoliyatini Mangʻit shahridagi 38-sonli maktabda biologiya fani oʻqituvchisi boʻlib ishlashdan boshladi. 2005-yildan hozirgi kungacha 26-sonli maktabning maʼnaviy-maʼrifiy ishlar boʻyicha direktor oʻrinbosari boʻlib ishlab kelmoqda.

Mazkur muassasada hozirgi kunda 44 nafar mahoratli oʻqituvchilar 21-sinfda 470 nafar oʻquvchilarga taʼlim-tarbiya berishayapti.

Oʻqituvchilarning oʻz bilimini oshirish, zamonaviy metodlar asosida fan asoslarini chuqur oʻrgatishga intilishi tufayli maktab tumandagi dars samaradorligi yuqori taʼlim muassasalaridan biriga aylandi. Oʻtgan oʻquv yilida maktabning 11-sinfini tugatgan 42 nafar bitiruvchilarning 22 nafari respublikamizdagi turli oliygohlar talabalari boʻlishgani, turli koʻrik-tanlovlar bilimlar bellashuvlari fanlar olimpiadalarida oʻquvchilarining yuqori oʻrinlarni egallayotgani oʻqituvchilar, oʻquvchilar orasida sogʻlom maʼnaviy muhit barqarorligidan, pedagogik jamoaning fidoyiligidan dalolat beradi.

Joriy oʻquv yilida ham maktab oʻquvchilari quvonarli yutuqlarni qoʻlga kiritishayapti. Maktabning 11-sinf oʻquvchisi Nurshoda Saʼdullayeva ingliz tilidan xalqaro, Shohida Nurullayeva matematika fanidan milliy sertifikat olishga muyassar boʻlishdi.

Hamidaning taʼlimga jonkuyarligi bejiz emas. Uning oilasini pedagoglar oilasi, desak adashmagan boʻlamiz. Uning qaynonasi Masharif Madrahimov, qaynonasi Norjon Yoʻldoshevalar mazkur maktabda oʻqituvchilik qilib, pensiyaga chiqishgan, turmush oʻrtogʻi Sobirjon Madrahimov ham oʻqituvchi, Hamidaga togʻday suyanch, hamfikr, hamqadam.

Hamida Artikova Sobirjon bilan oʻgʻli, ikki nafar qizini ham odobli, ilmli, intiluvchan qilib voyaga yetkazishayapti. Hali maktab oʻquvchilari boʻlgan Faxriddin, Feruzabonu, Shahnozabonularning ham ilmda erishayotgan yutuqlari koʻp.

Faxriddin kimyo, fanidan fanlar olimpiadasida tumanda 1-oʻrinni olib, Qoraqalpogʻiston respublikasi bosqichida qatnashdi.

Maʼnaviyat va taʼlim fidoyisi Hamida Artikovaning keyingi ishlarida ham muvaffaqiyatlar tilab qolamiz.

Oygul RAJABOVA.