TUMAN HOKIMI BOʻZ YoP OVULI AHOLISI VA YoShLAR BILAN UChRAShIB, HUDUDDAGI MUAMMOLARNI OʻRGANDI

Bugungi kunda Amudaryo tumani hokimining chekka hududlarda aholi va yoshlar bilan uchrashuvlari tashkil etilib, murojaatlari tinglanmoqda va joyida hal etilishiga koʻmaklashilmoqda. Bu kabi uchrashuvlar xalqning dardini eshitish, ularning muammolarini hal etishda, samarali va kutilgan natijalarni bermoqda.

Tuman hokimi Sultonboy Yoʻldashevning navbatdagi uchrashuvi Boʻz yop ovulida boʻlib oʻtdi. Hududdagi 10-sonli maktabda boʻlib oʻtgan mazkur uchrashuvda tumandagi bir qator korxona, tashkilot, muassasalar rahbarlari ham qatnashishdi. Shuningdek, fuqarolar yigʻini masʼullari, hudud faollari, yoshlar ham ishtirok etishdi.

Uchrashuv avvalida tuman hokimi mamlakatimiz siyosiy, ijtimoiy va iqtisodiy hayotida kechayotgan koʻlamli islohotlar, aholining turmush darajasini yuksaltirish, mavjud kamchilik va muammolarni bartaraf etish, xususan tumanda va Boʻz yop ovulida qilinayotgan ishlar haqida toʻxtalib oʻtdi.

Tuman hokimi Prezidentimizning “2022-2023-yillarda mahallalar infratuzilmasini yanada yaxshilash boʻyicha qoʻshimcha chora-tadbirlar toʻgʻrisida”gi 408-sonli qaroriga asosan tumanimiz hududidagi mavjud muammolarni bartaraf etish va infratuzilmasini rivojlantirish maqsadida 25 mlrd. 595 mln. soʻm pul mablagʻlari ajratilgani, ushbu mablagʻlar mahallalarda ichki yoʻllarni taʼmirlash, suv inshootlarini rekonstruktsiya qilish, ayrim fuqarolar yigʻini maʼmuriy binosini va bolalar sport maydonchasini yangidan qurish, elektr tarmoqlarini tortish kabi ishlarga sarf etilayotganini aytib oʻtdi.

Undan tashqari, Boʻz yop ovulida ham “Yangi hayot” 1, 2-uchastkalari, “Boʻzariq” 1, 2, 3-uchastkalaridagi koʻchalarning 2,4 km. qismida “Shabboz tosh” masʼuliyati cheklangan jamiyati tomonidan shagʻal tosh toʻshash, joriy taʼmirlash ishlari olib borilayotgani, ushbu ishlarga 392,6 mln. soʻm miqdorida mablagʻ sarf etish belgilangani toʻgʻrisida soʻzladi. Shuningdek, ovul aholisini hududda olib borilayotgan obodonlashtirish ishlarida faol ishtirok etishga, oʻzlari yashab turgan joyni yanada obod goʻshaga aylantirishga munosib hissa qoʻshishga chaqirdi.

Uchrashuv davomida tuman rahbari mamlakatimizda tadbirkorlarga yaratilayotgan imkoniyatlar haqida soʻz yuritib, bu ish bilan shugʻullanishga doir shuningdek, qishloqda parrandachilik, tikuvchilik, issiqxonalar qurib ish bilan band boʻlish va ishsizlarning ham bandligini taʼminlash yuzasidan tavsiyalar berdi va kelgusida amalga oshirilishi koʻzda tutilayotgan rejalar toʻgʻrisida maʼlumotlar berdi.

Ochiq muloqot tarzida oʻtgan uchrashuv davomida fuqarolar oʻzlarini qiynab kelayotgan suv, elektr taʼminoti, yoʻl chiqarish, hududdagi maktabgacha taʼlim tashkiloti quvvatini oshirish va unga maktab yoshiga yetayotgan bolalarni ham qamrab olishni yoʻlga qoʻyish kabi muammolar bilan murojaat qilishdi. Har bir murojaat nazoratga olinib, ularning ijrosini taʼminlash boʻyicha masʼul korxona-tashkilotlar belgilab berildi va hech bir murojaat eʼtibordan chetda qolmadi.

O.Xudoyberganova.