ТУМАН ҲОКИМИ БЎЗ ЁП ОВУЛИ АҲОЛИСИ ВА ЁШЛАР БИЛАН УЧРАШИБ, ҲУДУДДАГИ МУАММОЛАРНИ ЎРГАНДИ

Бугунги кунда Амударё тумани ҳокимининг чекка ҳудудларда аҳоли ва ёшлар билан учрашувлари ташкил этилиб, мурожаатлари тингланмоқда ва жойида ҳал этилишига кўмаклашилмоқда. Бу каби учрашувлар халқнинг дардини эшитиш, уларнинг муаммоларини ҳал этишда, самарали ва кутилган натижаларни бермоқда.

Туман ҳокими Султонбой Йўлдашевнинг навбатдаги учрашуви Бўз ёп овулида бўлиб ўтди. Ҳудуддаги 10-сонли мактабда бўлиб ўтган мазкур учрашувда тумандаги бир қатор корхона, ташкилот, муассасалар раҳбарлари ҳам қатнашишди. Шунингдек, фуқаролар йиғини масъуллари, ҳудуд фаоллари, ёшлар ҳам иштирок этишди.

Учрашув аввалида туман ҳокими мамлакатимиз сиёсий, ижтимоий ва иқтисодий ҳаётида кечаётган кўламли ислоҳотлар, аҳолининг турмуш даражасини юксалтириш, мавжуд камчилик ва муаммоларни бартараф этиш, хусусан туманда ва Бўз ёп овулида қилинаётган ишлар ҳақида тўхталиб ўтди.

Туман ҳокими Президентимизнинг “2022-2023 йилларда маҳаллалар инфратузилмасини янада яхшилаш бўйича қўшимча чора-тадбирлар тўғрисида”ги 408-сонли қарорига асосан туманимиз ҳудудидаги мавжуд муаммоларни бартараф этиш ва инфратузилмасини ривожлантириш мақсадида 25 млрд. 595 млн. сўм пул маблағлари ажратилгани, ушбу маблағлар маҳаллаларда ички йўлларни таъмирлаш, сув иншоотларини реконструкция қилиш, айрим фуқаролар йиғини маъмурий биносини ва болалар спорт майдончасини янгидан қуриш, электр тармоқларини тортиш каби ишларга сарф этилаётганини айтиб ўтди.

Ундан ташқари, Бўз ёп овулида ҳам “Янги ҳаёт” 1, 2-участкалари, “Бўзариқ” 1, 2, 3-участкаларидаги кўчаларнинг 2,4 км. қисмида “Шаббоз тош” масъулияти чекланган жамияти томонидан шағал тош тўшаш, жорий таъмирлаш ишлари олиб борилаётгани, ушбу ишларга 392,6 млн. сўм миқдорида маблағ сарф этиш белгилангани тўғрисида сўзлади. Шунингдек, овул аҳолисини ҳудудда олиб борилаётган ободонлаштириш ишларида фаол иштирок этишга, ўзлари яшаб турган жойни янада обод гўшага айлантиришга муносиб ҳисса қўшишга чақирди.

Учрашув давомида туман раҳбари мамлакатимизда тадбиркорларга яратилаётган имкониятлар ҳақида сўз юритиб, бу иш билан шуғулланишга доир шунингдек, қишлоқда паррандачилик, тикувчилик, иссиқхоналар қуриб иш билан банд бўлиш ва ишсизларнинг ҳам бандлигини таъминлаш юзасидан тавсиялар берди ва келгусида амалга оширилиши кўзда тутилаётган режалар тўғрисида маълумотлар берди.

Очиқ мулоқот тарзида ўтган учрашув давомида фуқаролар ўзларини қийнаб келаётган сув, электр таъминоти, йўл чиқариш, ҳудуддаги мактабгача таълим ташкилоти қувватини ошириш ва унга мактаб ёшига етаётган болаларни ҳам қамраб олишни йўлга қўйиш каби муаммолар билан мурожаат қилишди. Ҳар бир мурожаат назоратга олиниб, уларнинг ижросини таъминлаш бўйича масъул корхона-ташкилотлар белгилаб берилди ва ҳеч бир мурожаат эътибордан четда қолмади.

О.Худойберганова.