Xalq deputatlari Amudaryo tuman Kengashining 58-sessiyasi toʻgʻrisida axborot

2023-yil 24-fevral kuni Amudaryo tumani hokimligining majlislar zalida Xalq deputatlari tuman Kengashining navbatdagi – 58-sessiyasi boʻlib oʻtdi.

Sessiyani tuman hokimi — Kengash raisi Sultonboy Yoʻldashev ochdi va olib bordi.

Sessiyada deputatlar, sektor rahbarlari, tuman hokimi oʻrinbosarlari, hokimlik masʼul xodimlari, boʻlimlar, tashkilotlar rahbarlari hamda ommaviy axborot vositalari vakillari ishtirok etdi.

Sessiya kotibligiga 3-Boyovul saylov okrugidan deputat Aybek
Begimov saylandi.

Deputatlar dastlab Fuqarolik ishlari boʻyicha Amudaryo tuman sudi tomonidan 2022-yil davomida odil sudlovni amalga oshirish borasida amalga oshirilgan ishlar yuzasidan sud raisi Qayrulla Atamuratovning axborotini tingladi.

Qayd etib oʻtilganidek, Fuqarolik ishlari boʻyicha Amudaryo tumani sudi tomonidan 2022-yil davomida 2788ta ish koʻrib tamomlangan. Tamomlangan ishlarning 2122tasi boʻyicha hal qiluv qarorlari chiqarilgan boʻlib, shundan 1988ta ish boʻyicha daʼvo arizalar qanoatlantirilgan va 134ta ish boʻyicha daʼvo arizalar rad etilgan. 666ta ish boʻyicha esa ajrimlar chiqarilgan boʻlib, 39ta holatda ish yuritishdan tugatilgan, 627ta ariza koʻrmasdan qoldirilgan.

Sessiyada Jinoyat ishlari boʻyicha Amudaryo tuman sudi tomonidan odil sudlovni amalga oshirish borasida amalga oshirilgan ishlar yuzasidan ham sud raisi Asqar Safarovning axboroti tinglandi.

Taʼkidlanganidek, sud tomonidan jinoiy va maʼmuriy ishlarni sifatli koʻrib chiqish va aholi oʻrtasida huquqiy targʻibot ishlarini olib borish boʻyicha bir qancha ishlar amalga oshirilgan. Xususan, 2022-yil davomida jami koʻrib tamomlangan 124 ta jinoyat ishidan 28 tasi sayyor sud majlisida koʻrilgan.

Sessiya kun tartibida xatlov oʻtkazish orqali aniqlangan ijtimoiy himoyaga muhtoj ayollarni 4-bosqich “Ayollar daftari”ga kiritish boʻyicha tuman hokimi oʻrinbosari, Oila va xotin-qizlar boʻlimi boshligʻi Goʻzal Saburovaning hisoboti tinglandi.

Hisobotda aytib oʻtilganidek, sektor rahbarlarining taklifiga koʻra, 4-bosqich “Ayollar daftari”ga jami 5 398 nafar xotin-qizlar kiritilishi rejalashtirilgan.

Mazkur masala yuzasidan Qoraqalpogʻiston Respublikasi Vazirlar Kengashi raisi oʻrinbosari, Oila va xotin-qizlar qoʻmitasi boshligʻi Maryam Axmedova oʻzining taklif hamda fikrlarini bildirdi. Taʼkidlanganidek, “Ayollar daftari”ga kiritilgan ayollarni har tomonlama qoʻllab-quvvatlash, ularga ijtimoiy, iqtisodiy, psixologik yordam koʻrsatish borasida tizimli ishlar amalga oshirilishi zarur. Bunda tegishli korxona-tashkilotlar Aholi bandligiga koʻmaklashish markazi bilan hamkorlikda ish olib borib, har oyda boʻsh ish oʻrinlarini eʼlon qilib borishi va bunda albatta ushbu ish oʻrinlariga “Ayollar daftari”ga kiritilgan ayollar joylashtirilishi lozimligini taʼkidladi.

Sessiya ishida mahallalarda tadbirkorlikni rivojlantirish, aholi bandligini taʼminlash va kambagʻallikni qisqartirish boʻyicha kelib tushayotgan murojaatlarni tahlil qilgan holda hokim yordamchilari faoliyatining natijadorligini oʻrganish toʻgʻrisida tuman Xalq qabulxonasi boʻlimi mudiri Erkin Rajabovning axboroti tinglandi.

Axborotda keltirilishicha, hokim yordamchilari tomonidan 2023-yil uchun rejadagi 47 189ta xonadondan 31-yanvarga qadar 6 097ta xonadonlar xatlovdan oʻtkazilgan.

Sessiya davomida Ekologiya va atrof muxitni muxofaza qilish boʻlimining birinchi darajali inspektori Gʻayrat Iskandarovning Amudaryo tumanida ekologiya va atrof-muhitni muhofaza qilish sohasida 2022-yil davomida amalga oshirilgan ishlar yuzasidan hisoboti tinglandi.

 Keltirib oʻtilganidek, 2022-yil davomida ekologik nazorat reyd tadbirlari davomida jami 200 ta huquqbuzarliklar aniqlanib, huquqbuzarlik sodir etgan shaxslarga 211,7 mln soʻm miqdorda jarimalar qoʻllanilgan.

Sessiya kun tartibida Amudaryo tumani maxalliy byudjeti mablagʻlarining 2022-yil davomida sarflanishi toʻgʻrisida tuman Moliya boʻlimi mudiri Ulugʻbek Bekniyazovning hisoboti tinglandi.

Taʼkidlanganidek, Amudaryo tumani mahalliy byudjetning 2022-yil davomida daromadlar qismi rejasi 81,5 mlrd soʻmga belgilangan boʻlib, xaqiqatda 85,2 mlrd soʻmga, yaʼni 104,6 foizga – rejaga nisbatan 3 mlrd 718,8 ming soʻmga ortigʻi bilan bajarilishiga erishilgan. Mahalliy byudjet va uning ortiqcha bajarilgan qismi mablagʻlari belgilangan tartiblarga asosan sarflangan.

Sessiya kun tartibida “Oʻzbekiston Respublikasi Prezidentining 2022-yil 10-sentyabrdagi “Dehqon xoʻjaliklarini tashkil etishni qoʻllab-quvvatlash orqali aholi daromadlarini oshirish boʻyicha qoʻshimcha chora-tadbirlar toʻgʻrisida”gi qarorining tumandagi ijrosi yuzasidan tuman Fermer, dehqon xoʻjaliklari va tomorqa yer egalari Kengashi raisi Ilhom Palvanovning hisoboti tinglandi.

Keltirib oʻtilganidek, tuman hokimligining zaxira yer fondidan umumiy maydoni 483,5 gektar, shundan ekin maydonlarini 452,6 gektar boʻlgan yerlar e-auksion elektron savdo plaformasi orqali auktsionga qoʻyishga tayyorlangan. Deputatlar mazkur ekin maydonlarini ochiq elektron tanlovga chiqarish boʻyicha tayyorlangan loyihalarni koʻrib chiqib, tasdiqladilar.

Sessiyada Kengash vakolatiga kiruvchi boshqa masalalar ham muhokama qilindi. Barcha masalalar atroflicha koʻrib chiqilib, tuman Kengashining tegishli qarorlari qabul qilindi. Shuning bilan sessiya oʻz ishini yakunladi.

Tuman hokimligining Axborot xizmati.