TIBBIYoT BIRLAShMASI HAMShIRALARIGA PATRONAJ SUMKALARI TOPShIRILDI

Bugungi kunda yurtimizda reproduktiv yoshdagi ayollar, homiladorlar va bolalarga koʻrsatiladigan tibbiy yordam sifatini oshirish, koʻlamini yanada kengaytirish, tibbiy xizmatni samarali yoʻlga qoʻyish kabi maqsadlarda muhim chora-tadbirlar amalga oshirilmoqda. Ayniqsa, bu borada katta ahamiyat kasb etayotgan patronaj xizmati takomillashtirilib, qamrovni yanada yaxshilash, hamshiralik yordamini koʻrsatish, tibbiy madaniyatni yuksaltirish kabi ishlarning yangicha mezon va taʼsirchan usullari joriy etilmoqda.

22-fevral kuni tuman Tibbiyot birlashmasi majlislar zalida tibbiy xizmat sifatini yaxshilash borasida olib borilayotgan ishlar xususida yigʻilish oʻtkazildi. Tibbiyot birlashmasi rahbari Faxriddin Abdullayev tomonidan oʻtkazilgan mazkur yigʻilishda tuman hokimi Sultonboy Yoʻldashev ham ishtirok etdi.

Yigʻilishda tuman hokimi tibbiyot xodimlari, soha mutaxassislari bilan muloqotda boʻlib, sogʻliqni saqlash tizimida olib borilayotgan islohotlar, tumanimiz aholisiga koʻrsatilayotgan tibbiy xizmat sifati, moddiy-texnik bazani yaxshilash borasida amalga oshirilayotgan ishlar xususida soʻzlashdi. Shuningdek, tibbiy patronaj xizmati inson salomatligini asrash, kasalliklarning oldini olish va xalqimiz salomatligini muhofazalashda muhim oʻrin tutishini alohida taʼkidlab oʻtdi.

Yigʻilish davomida soʻzga chiqqan soha masʼullari ham ushbu yoʻnalishdagi ishlar talab darajasida yoʻlga qoʻyilayotgani natijasida koʻplab tibbiy-ijtimoiy muammolarning oldi olinayotgani, kasalliklarni keskin kamaytirish, jamiyatda sogʻlom turmush tarzini qaror toptirishda muhim ahamiyat kasb etayotgani toʻgʻrisida keng toʻxtalib oʻtishdi.

Taʼkidlanganidek, bugungi kunda tibbiyot xodimlari tomonidan hudud aholisi har olti oyda xatlovdan oʻtkazilmoqda. Unda aholi orasida patronaj koʻmagiga ehtiyojmand qatlam aniqlab olinib, patronaj hamshira, umumiy amaliyot shifokori va tor mutaxassislar ishtirokida xonadonlarda maqsadli patronaj tadbirlari tashkil etilmoqda. Unda patronaj parvarishga muhtoj yolgʻiz qariyalar, nogironlar va oʻzgalar parvarishiga muhtoj shaxslar, 1 yoshgacha va nogiron bolalar, homiladorlar, yangi tuqqan onalar patronaj bilan qamrab olinmoqda. Aniqlangan bemorlarni esa kasalligiga qarab, ambulator yoki statsionar sharoitda tumandagi tibbiyot muassasasida davolash choralari koʻrilmoqda.

Yigʻilishda shu kabi maʼlumotlar berilganidan soʻng, Prezidentimizning “Birlamchi tibbiy-sanitariya yordamini aholiga yaqinlashtirish va tibbiy xizmatlar samaradorligini oshirish boʻyicha qoʻshimcha chora-tadbirlar toʻgʻrisida”gi Qarori hamda aholiga koʻrsatilayotgan birlamchi tibbiy-sanitariya yordamining, tibbiyot xodimlarini qoʻllab-quvvatlash va faoliyat samaradorligini oshirish boʻyicha chora-tadbirlar Dasturiga asosan mahalliy byudjet hisobidan 50 nafar patronaj hamshiralarga tibbiyot sumkalari topshirildi. Tibbiyot sumkalarini qabul qilib olgan patronaj hamshiralar Prezidentimiz va tuman hokimiga sogʻliqni saqlash sohasiga qaratayotgan eʼtiborlari uchun minnatdorchilik bildirdilar. Oʻzlariga topishirilgan vazifalarni sidqidildan bajarishga va patronaj tibbiy xizmati sifatini yanada yaxshilashga, bemorlarning tibbiyot xodimlaridan roziligiga erishishga bor kuch va bilimlarini sarf etishga tayyor ekanliklarini aytdilar.

Taʼkidlash joizki, tibbiy madaniyat darajasining yuqori boʻlishida patronaj hamshiralarning oʻrni beqiyos. Bugungi kunda oʻrta tibbiyot xodimlarini ish qurollari bilan taʼminlash, mehnatini yengillashtirish borasida amalga oshirilayotgan bu kabi ishlar hamshiralarning ishtiyoqini oshirib, tibbiy xizmat sifatini yanada yaxshilashga xizmat qiladi.

J.Yavkashev, tuman TTB tashkiliy-uslubiy boʻlimi mudiri.