Tuman hokimligining Axborot xizmati tomonidan OAV vakillari uchun matbuot anjumani tashkil etildi

20-fevral kuni tuman hokimligining Axborot xizmati tomonidan ommaviy axborot vositalari vakillari uchun matbuot anjumani oʻtkazildi.

Anjumanda aholini ijtimoiy qoʻllab-quvvatlash maqsadida Byudjetdan tashqari pensiya jamgʻarmasi Amudaryo tuman boʻlimi tomonidan 2022-yil davomida amalga oshirilgan ishlar sarhisob qilindi. Shuningdek, Pensiya jamgʻarmasi tomonidan 2022-yil davomida ishlab chiqilgan normativ-huquqiy hujjatlar toʻgʻrisida maʼlumot berildi.

Amudaryo televideniyesi, “Taraqqiyot koʻzgusi” va “Mening oilam” gazetalari muxbirlari Byudjetdan tashqari pensiya jamgʻarmasi Amudaryo tuman boʻlimi boshligʻi Qadamboy Ismailovga 2022-yil davomida boʻlim tomonidan amalga oshirilgan ishlar yuzasidan savollar bilan murojaat qilishdi.

Qayd etib oʻtilganidek, 2022-yilning oʻzida tuman boʻyicha jami 2705 nafar fuqarolarga pensiyalar va ijtimoiy nafaqalar tayinlandi. Shundan 1347 nafari yoshga doir, 265 nafari nogironlik, 114 nafari boquvchisini yoʻqotganlik va 979 nafari ijtimoiy nafaqalardir.

Undan tashqari, pensiya jamgʻarmasi tizimida 2022-yil mobaynida 924 dan ortiq 18 yoshgacha nogironligi boʻlgan bolalarning nafaqa ishlari raqamlashtirlgan boʻlsa, hozirgi kunda bir yarim mingga yaqin boquvchisini yoʻqotganlik pensiya va nafaqasini oluvchilarning ishlari 45 foizga raqamlashtirildi.

Matbuot anjumanida jurnalislar “Ijtimoiy himoya” yagona reyestri” axborot tizimining inson omilisiz shaffof tarzda ishlashi ijtimoiy himoyaga muhtoj fuqarolarni aniq va manzilli qoʻllab-quvvatlashga zamin yaratganini taʼkidladilar.

Mazkur axborot tizimi orqali oʻtgan yil mobaynida 21 mingdan otriq kam taʼminlangan oilalarga jami 126,4 mlrd. soʻm bolalar nafaqasi va moddiy yordam pullari toʻlab berilgan. Undan tashqari, 2022-yil may oyida Prezidentimizning 258-sonli qarori bilan har bir pensiya va ijtimoiy nafaqa oluvchi fuqarolarga 300 ming soʻmdan, 25 ming 276 nafar pensiya va ijtimoiy nafaqa oluvchilarga jami 7,8 mlrd. soʻm, shuningdek, 2022-yil 31-avgustdagi 213-sonli farmoniga asosan “Ijtimoiy himoya yagona reyestri” axborot tizimi orqali aniqlangan 21 ming 562 ta kam taʼminlangan oilalarga jami 13 mlrd. soʻmga yaqin mablagʻlar toʻlab berilgan.

Matbuot anjumanida “Fuqarolarning davlat pensiya taʼminoti toʻgʻrisida”gi hamda “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga pensiya tayinlash tartibini takomillashtirishga qaratilgan oʻzgartish va qoʻshimchalar kiritish haqida”gi Oʻzbekiston Respublikasi qonunlari batafsil tushintirib oʻtildi. Taʼkidlanganidek, “I va II guruh nogironlik pensiyasi tayinlanganidan keyingi ishlangan vaqt ish stajiga qoʻshib hisoblanadi.

Matbuot anjumanida jurnalistlar oʻzlarini qiziqtirgan savollar bilan boʻlim xodimlariga murojaat qilishib tegishlicha javoblar olishdi.

Tuman hokimligining Axborot xizmati.