“YoShLAR DAFTARI”DAGI 32 NAFAR YoShGA SUBSIDIYa ASOSIDA ISh QUROLLARI TAQDIM ETILDI

Soʻnggi yillarda mamlakatimizda yoshlar muammolarini hal etish, ularning ijtimoiy faolligini oshirish, bandligini taʼminlash, keng qamrovli ijtimoiy qoʻllab-quvvatlashga qaratilgan chora-tadbirlar natijasida yil sayin oʻzini-oʻzi band qilish tamoyili asosida faoliyat yuritayotgan va tadbirkorlik sohasida sezilardi yutuqlarga erishayotgan yoshlar safi tobora ortib bormoqda.

Ayniqsa, 2021-yildan boshlab yoshlarning ijtimoiy-iqtisodiy muammolarini aniqlash hamda ularni hal qilish maqsadida “Yoshlar daftari” tizimi ishlab chiqilib, amaliyotga joriy etilgani bu boradagi saʼy-harakatlarni tizimli ravishda muvofiqlashtirish imkonini bermoqda.

Amudaryo tumanida ham ayni paytda 2501 nafar yosh “Yoshlar daftari” roʻyxatiga kiritilgan boʻlib, har bir yoshning hayotiga oid yechimini kutayotgan muammolar ovul va mahallalar masʼullari tomonidan xonadonma-xonadon kirib borib, oʻrganishlar natijasida ijobiy hal etilmoqda.

Bundan tashqari, tumanning barcha hududlarida imtiqomat qiluvchi, “Yoshlar daftari roʻyxatiga kiritilgan yoshlar bilan hokim va sektorlar rahbarlarining uchrashuvlari tashkil etilib, oshkora va samimiy muloqot muhiti yaratilayotgani bois, koʻplab yoshlarning murojaatlari qanoatlantirilayotgani oʻz samarasini bermoqda. Xususan, tumanda “Yoshlar daftari”ga kiritilgan yoshlarning asosiy qismi kasb-hunarga oʻqitilib, maqsadli jamgʻarmalar hisobidan subsidiya asosida ularga zarur ish qurollari olib borilmoqda.

Joriy yilning 15-fevral sanasida Amudaryo tumani Mahalla va nuroniylarni qoʻllab-quvvatlash boʻlimi binosida boʻlib oʻtgan tuman hokimi Sultonboy Yoʻldashev, sektor rahbari, Davlat Soliq inspektsiyasi boshligʻi Aydos Seitov, IIB boshligʻi oʻrinbosari Sharopat Joldasboyev, tuman hokimi oʻrinbosarlari va Yoshlar ishlari Agentligi masʼullari ishtirokidagi uchrashuv tadbirida ham “Yoshlar daftari” roʻyxatiga kiritilgan yoshlarning oʻz-oʻzini band qilish tamoyili asosida ish qurollari bilan taʼminlash haqidagi murojaatlari ijobiy hal etildi.

Tadbirda 1-sektor rahbari, Amudaryo tumani hokimi Sultonboy Yoʻldashev mamlakatimizda, shu jumladan Amudaryo tumanida ham yoshlar hayotiga oid muammolarni ijobiy hal etish borasida amalga oshirilayotgan keng qamrovli ishlar haqida soʻz yuritib, ayniqsa, har bir yoshni ijtimoiy qoʻllab-quvvatlash, ularni tadbirkorlik sohasiga jalb etish orqali ish bilan bandligini taʼminlash, ijtimoiy faolligini oshirish ustuvor vazifa ekanligini taʼkidladi.

Tadbir davomida “Yoshlar daftari” roʻyxatiga kiritilgan 32 nafar yoshlarga oʻzini-oʻzi band qilish tamoyiliga koʻra, “Yoshlar daftari” jamgʻarmasi hisobidan subsidiya asosida ish qurollari taqdim etildi. Unga koʻra, chevarlik yoʻnalishida oʻzlarining tadbirkorligini boshlashni orzu qilgan muammoli yoshlarga tikuv mashinalari topshirildi.

Oʻz navbatida yoshlar davlatimiz, xususan, tuman hokimligi va sektorlar rahbarlari tomonidan koʻrsatilayotgan eʼtibor va ragʻbatdan mamnun ekanliklarini bildirdilar.

Robiya YOʻLDOShEVA.