“ЁШЛАР ДАФТАРИ”ДАГИ 32 НАФАР ЁШГА СУБСИДИЯ АСОСИДА ИШ ҚУРОЛЛАРИ ТАҚДИМ ЭТИЛДИ

Сўнгги йилларда мамлакатимизда ёшлар муаммоларини ҳал этиш, уларнинг ижтимоий фаоллигини ошириш, бандлигини таъминлаш, кенг қамровли ижтимоий қўллаб-қувватлашга қаратилган чора-тадбирлар натижасида йил сайин ўзини-ўзи банд қилиш тамойили асосида фаолият юритаётган ва тадбиркорлик соҳасида сезиларди ютуқларга эришаётган ёшлар сафи тобора ортиб бормоқда.

Айниқса, 2021 йилдан бошлаб ёшларнинг ижтимоий-иқтисодий муаммоларини аниқлаш ҳамда уларни ҳал қилиш мақсадида “Ёшлар дафтари” тизими ишлаб чиқилиб, амалиётга жорий этилгани бу борадаги саъй-ҳаракатларни тизимли равишда мувофиқлаштириш имконини бермоқда.

Амударё туманида ҳам айни пайтда 2501 нафар ёш “Ёшлар дафтари” рўйхатига киритилган бўлиб, ҳар бир ёшнинг ҳаётига оид ечимини кутаётган муаммолар овул ва маҳаллалар масъуллари томонидан хонадонма-хонадон кириб бориб, ўрганишлар натижасида ижобий ҳал этилмоқда.

Бундан ташқари, туманнинг барча ҳудудларида имтиқомат қилувчи, “Ёшлар дафтари рўйхатига киритилган ёшлар билан ҳоким ва секторлар раҳбарларининг учрашувлари ташкил этилиб, ошкора ва самимий мулоқот муҳити яратилаётгани боис, кўплаб ёшларнинг мурожаатлари қаноатлантирилаётгани ўз самарасини бермоқда. Хусусан, туманда “Ёшлар дафтари”га киритилган ёшларнинг асосий қисми касб-ҳунарга ўқитилиб, мақсадли жамғармалар ҳисобидан субсидия асосида уларга зарур иш қуроллари олиб борилмоқда.

Жорий йилнинг 15 февраль санасида Амударё тумани Маҳалла ва нуронийларни қўллаб-қувватлаш бўлими биносида бўлиб ўтган туман ҳокими Султонбой Йўлдашев, сектор раҳбари, Давлат Солиқ инспекцияси бошлиғи Айдос Сеитов, ИИБ бошлиғи ўринбосари Шаропат Жолдасбоев, туман ҳокими ўринбосарлари ва Ёшлар ишлари Агентлиги масъуллари иштирокидаги учрашув тадбирида ҳам “Ёшлар дафтари” рўйхатига киритилган ёшларнинг ўз-ўзини банд қилиш тамойили асосида иш қуроллари билан таъминлаш ҳақидаги мурожаатлари ижобий ҳал этилди.

Тадбирда 1-сектор раҳбари, Амударё тумани ҳокими Султонбой Йўлдашев мамлакатимизда, шу жумладан Амударё туманида ҳам ёшлар ҳаётига оид муаммоларни ижобий ҳал этиш борасида амалга оширилаётган кенг қамровли ишлар ҳақида сўз юритиб, айниқса, ҳар бир ёшни ижтимоий қўллаб-қувватлаш, уларни тадбиркорлик соҳасига жалб этиш орқали иш билан бандлигини таъминлаш, ижтимоий фаоллигини ошириш устувор вазифа эканлигини таъкидлади.

Тадбир давомида “Ёшлар дафтари” рўйхатига киритилган 32 нафар ёшларга ўзини-ўзи банд қилиш тамойилига кўра, “Ёшлар дафтари” жамғармаси ҳисобидан субсидия асосида иш қуроллари тақдим этилди. Унга кўра, чеварлик йўналишида ўзларининг тадбиркорлигини бошлашни орзу қилган муаммоли ёшларга тикув машиналари топширилди.

Ўз навбатида ёшлар давлатимиз, хусусан, туман ҳокимлиги ва секторлар раҳбарлари томонидан кўрсатилаётган эътибор ва рағбатдан мамнун эканликларини билдирдилар.

Робия ЙЎЛДОШЕВА.