NAZARXON OVULIDA HOKIM VA YoShLAR UChRAShUVI BOʻLIB OʻTDI

Shu kunlarda Amudaryo tumani hokimi tegishli masʼullari bilan birgalikda chekka hududlarga ham tashrif buyurib, yoshlar bilan muloqotlar oʻtkazmoqda. Joylarda oʻtkazilayotgan bunday muloqotlar anchadan beri yechilmay kelinayotgan juda koʻp masalalarni hal etishda muhim oʻrin tutmoqda.

Nazarxon ovulida boʻlib oʻtgan ana shunday uchrashuvda ham tuman hokimi Sultonboy Yoʻldashev, hokim oʻrinbosari Mahmud Shermetov, Yoshlar ishlari agentligi tuman boʻlimi masʼullari hamda fuqarolar yigʻini masʼullari, hududdagi korxona-tashkilotlar rahbarlari ishtirok etishdi. Uchrashuvda tuman hokimi bugungi kunda yurtimizda yoshlarni qoʻllab-quvvatlash borasida amalga oshirilayotgan ishlar, ularning komil insonlar, kelajakning munosib egalari boʻlib voyaga yetishlari uchun yaratilayotgan imkoniyatlar xususida soʻzladi.

Taʼkidlash joizki, soʻnggi yillarda davlat rahbarining tashabbusi va koʻmagi bilan yoshlar siyosati boʻyicha 6 ta qonun, 15 ta farmoni, 15 ta qaror va 2 ta farmoyish qabul qilindi, shuningdek hukumatning 39 dan ortiq qarori va 4 ta farmoyishi imzolandi. Oliy Majlis Senatining Yoshlar, madaniyat va sport masalalari qoʻmitasi, Qonunchilik palatasi huzurida Yoshlar parlamenti tashkil etildi. Yoshlar bilan ishlash toʻrt bosqichda: mahalla – tuman – viloyat – respublika darajasida yaxlit vertikal boshqaruv tizimi asosida amalga oshirilmoqda. Shuningdek, respublikaning barcha mahallalarida faoliyatini boshlagan Yoshlar yetakchilari ish olib borib, yoshlarning muammolari joyida hal etilishiga yaqindan yordam berishmoqda.

Uchrashuvda shu xususda soʻz yuritilib, Nazarxon ovulida faoliyat olib borayotgan fuqarolar yigʻini yoshlar yetakchisi tomonidan amalga oshirilgan ishlar bilan tanishildi. Hudud yoshlar yetakchisi yoshlarning oʻz oʻzini band etish, tadbirkorlikni tashkil etishiga, tadbirkorlikni rivojlantirish maqsadida bank kreditini olish kabilarga koʻmaklashish borasidagi amaliy ishlar xususida gapirib oʻtdi.

Ochiq muloqot ruhida kechgan uchrashuvda nazarxonlik yoshlar oʻzlarini qiziqtirgan masalalar, tashvishga solayotgan muammolari yuzasidan tuman hokimiga toʻgʻridan-toʻgʻri murojaat qilishdi. Hudud yoshlari asosan, ish bilan taʼminlash, oʻzini oʻzi band qilish, oilaviy biznes, oʻz tadbirkorligini boshlash jarayonida bank kredit mablagʻlari rasmiylashtirilishida yuzaga kelayotgan muammolar, mavjud tadbirkorligini kengaytirishda amaliy yordam va boshqa shu kabi masalalar yuzasidan oʻz murojaatlarini bayon etdi. Muloqot jarayonida nazarxonlik yoshlarning hududda tadbirkorlikni rivojlantirish borasidagi takliflari ham tinglandi.

Nazarxon ovuli yoshlaridan Gulruh Yuldashboyeva tikuvchilik kasbiga oʻqib olishda amaliy yordam berishni soʻrab murojaat qildi. Otabek Aytjanov esa safarbarlik chaqiruv rezervi badalini toʻligʻi bilan qoplab berishda yordam soʻradi. Sultonbek Muratboyevga esa murojaatiga koʻra, oliy taʼlim muassasasida oʻqishni davom ettirishi uchun toʻlov kontrakt summasining bir qismini qoplab berishda koʻmaklashiladigan boʻldi.

Qolgan oʻrganishga vaqt va mablagʻ talab etgan masalalar xususida esa mutasaddi tashkilot rahbarlariga aniq topshiriq va koʻrsatmalar berilib, ushbu murojaatlar ijrosini tuman hokimi shaxsan oʻz nazoratiga olishini alohida taʼkidladi.

O.Xudoyberganova.