SAYYoR SUD MAJLISIDA TUZALISh YOʻLIGA OʻTGAN MAHKUMLARGA YeNGILLIK BERILDI

Soʻnggi yillarda mamlakatimizda barcha sohalarda boʻlgani kabi sud tizimida ham ulkan islohotlar amalga oshirilmoqda va bu jarayon shubhasiz, oʻz samaralarini bermoqda. Jinoyat ishlari boʻyicha Amudaryo tuman sudi tomonidan ham sohaga oid Qonun va qonunosti hujjatlarida nazarda tutilgan sudlar oldidagi vazifalarni ogʻishmay amalga oshirishga qaratilgan tizimli ishlar olib borilmoqda.

Joriy yilning 9-fevral kuni Jinoyat ishlari boʻyicha Amudaryo tuman sudi tomonidan Doʻstlik mahalla fuqarolar yigʻini binosida oʻtkazilgan sayyor sud yigʻilishida ham mamlakatimizning amaldagi qonunlari barcha uchun baravar va uni buzgan har qanday shaxs, u kim boʻlishidan qatʼiy nazar, qonunda belgilangan jazosini olish muqarrarligi, shu bilan birga tuzalish yoʻliga oʻtgan mahkumlarga yengillik berilishi alohida taʼkidlandi.

 Yigʻilishda Jinoyat ishlari boʻyicha Amudaryo tuman sudining raisi Asqar Safarov, Amudaryo tuman prokurorining yordamchisi Abbaz Niyozimbetov, tuman Ichki ishlar boʻlimi Probatsiya guruhi katta inspektori, katta leytenant Ruslan Iskandarovlar qatnashdilar.

Sayyor sudda, Amudaryo tumani Ichki ishlar boʻlimi Probatsiya guruhida tuzalish yoʻliga oʻtgan 5 nafar mahkumlarga nisbatan kiritilgan taqdimnomalar koʻrib chiqildi.

Unga koʻra, Amudaryo tumani Qum-yop mahallasida yashovchi fuqaro, Jinoyat ishlari boʻyicha Qanlikoʻl tuman sudining 2019-yil 22-noyabr kungi hukmi boʻyicha Oʻzbekiston Respublikasi Jinoyat Kodeksining 266-moddasi 3-qismi "a" bandi bilan 6-yil muddatga ozodlikdan mahrum qilingan. 5-iyun 2021-yilda Jinoyat ishlari boʻyicha Yuqorichirchiq tuman sudining ajrimi bilan Jinoyat Kodeksining 74-moddasiga asosan oʻtalmagan 4-yil 5 oy 17 kun jazo muddatini 20 foiz ahloq tuzatish ishlari jazosiga almashtirilgan.

U Amudaryo tumani IIBda 2021-yilning 1-avgustidan hisobga olingan va 2021-yil 1-avgust kunidan buyon Amudaryo tumanida faoliyat yurituvchi korxonalardan biriga ishga qabul qilinib, xozirgi kunga qadar ishchi boʻlib ishlab kelmoqda. Mahkum jazoni oʻtash tartib va qoidalariga toʻliq amal qilgan holda axloq tuzatish ishlari jazosining uchdan bir qismini oʻtagan, oʻtalmagan jazo muddati 2-yil 1 oy 17 kunni tashkil qiladi.

Shu bois, mahkumning ahloq tuzatish ishlari jazosining oʻtalmagan qismi boʻyicha Oʻzbekiston Respublikasi Jinoyat Kodeksining 73-moddasiga asosan muddatidan ilgari shartli ravishda ozod qilish masalasini koʻrib chiqish uchun sudga taqdimnoma kiritilgan.

Shuningdek, Amudaryo tumani Uyshin mahallasida yashovchi yanv bir yurtdoshimizga Jinoyat ishlari boʻyicha Moʻynoq tuman sudininng hukmi bilan Oʻzbekiston Respublikasi JKning 168-moddasi 3-qismi "b" bandi va 228-moddasi 1-qismi bilan 3-yil muddatga ishlagan ish haqining 10 foizini ushlab qolish orqali ahloq tuzatish ishlari jazosi tayinlangan va Amudaryo tumani IIBda 2022-yil sentyabr oyida hisobga olingan.

U 2022-yil 30-sentyabr kunidan buyon Amudaryo tumanidagi dehqon xoʻjaligida ishchi boʻlib ishlab kelmoqda. Mahkum jazoni oʻtash tartib va qoidalariga toʻliq amal qilib, belgilangan jazo muddatining 1-yil 6 oy qismini oʻtagan, oʻtalmagan jazo muddati 1-yil 6 oyni tashkil qiladi. Shu bois, uning ahloq tuzatish ishlari jazosining oʻtalmagan qismi uchun Oʻzbekiston Respublikasi Jinoyat Kodeksining 73-moddasi qoʻllanilib, muddatidan ilgari shartli ravishda ozod qilish masalasini koʻrib chiqish uchun sudga taqdimnoma kiritilgan.

Bundan tashqari, sayyor sud majlisida yana 3 nafar shaxslarni muddatidan ilgari shartli ravishda ozod qilish masalasini koʻrib chiqish uchun sudga taqdimnomalar kiritilgan.

Sayyor sud majlisida ushbu taqdimnomalar atroflicha muhokama etildi va jazoni oʻtash tartib-qoidalariga amal qilib, sud tomonidan zimmasiga yuklatilgan majburiyatlarni bajargan hamda mehnatga halol munosabatda boʻlganligi uchun 5 nafar mahkum Oʻzbekiston Respublikasi Jinoyat Kodeksining 73-moddasiga asosan muddatidan ilgari shartli ravishda ozod qilindilar.

Asqar SAFAROV, Jinoyat ishlari boʻyicha Amudaryo tuman sudi raisi.

Ruslan ISKANDAROV, Amudaryo tumani IIB Probatsiya guruhi katta inspektori.