Shoh va shoir Bobur tavalludining 540 yilligi keng nishonlandi

Har yili mamlakatimizdagi barcha Oliy, oʻrta taʼlim va maktabgacha taʼlim muassasalarida 14-fevral− Zahiriddin Muhammad Boburning tavallud kuni keng tarzda nishonlanadi.

Buyuk shoh va shoir, davlat arbobi, musiqashunos, olim, turkiy, forsiy, va hind tilida goʻzal ashʼorlar bitgan serqirra ijod sohibi− Boburning hayot yoʻli barchaga ibrat maktabidir.

Mangʻit shahrida joylashgan “Amu quyoshi” nodavlat maktabgacha taʼlim tashkilotida ham Zahriddin Muhammad Bobur tavalludining 540 yilligiga bagʻishlab tadbir tashkil etildi.

Tadbirda soʻzga chiqqan nodavlat maktabgacha taʼlim tashkiloti direktori Sayyora Jumamuratova Bobur shaxsiyatining mamlakatimizda va umuman, jahon tarixi, madaniyatidagi oʻrni, navqiron avlod uchun ibratli jihatlari, bu zot qoldirgan bebaho maʼnaviy merosning ahamiyati xususida toʻxtaldi.

Shundan soʻng, tarbiyalanuvchilar tomonidan tayyorlangan goʻzal raqslar namoyish qilindi.

Shuningdek, tadbirda 12 yoshdan boshlab davlatni boshqargan buyuk siymoning hayot yoʻli davomida koʻrgan qiyinchiliklari, baxtli kunlari, Vatan sogʻinchi aks etgan sahna koʻrinishlar namoyish etildi. Qolaversa, bolajonlar buyuk siymoning betakror gʻazallari va ruboiylaridan namunalar oʻqib, maʼnolarini sharhlab berishdi.

Maktabgacha taʼlim tashkiloti tarbiyalanuvchilarining katta insonlardek fikr yuritishi, oʻzlarini Boburning izdoshlari deya his qilib, uning dardi va quvonchini toʻliq gavdalantirib bergani tadbirga tashrif buyurgan ota-onalarda ham katta tassurot qoldirdi. Ayniqsa, hincha va andijoncha raqslar ikki elning necha yuz yillarlan buyon davom etib kelayotgan doʻstlik rishtalarini yana bir bora gavdalantirib bergandek boʻldi.

Tadbirda ishtirok etgan bolajonlar buyuk shoh va shoirning Alisher Navoiydan keyingi betakror siymo ekanligini yanada teran his qildilar. Boburning insoniy fazilatlari, oliyjanob hislatlarini oʻzlariga oʻrnak qilib oldilar.

Darhaqiqat, oʻz ona zaminidan yiroqda butunlay begona yurtni makon tutgan bobomiz tarqoq holdagi hind qabilalarini birlashtirib Boburiylar imperiyasiga asos soldi. Bor yoʻgʻi 47-yil umr koʻrgan boʻlsa ham, avlodlariga bitmas-tuganmas maʼnaviy xazina qoldirdi. U oʻzining maʼlum va mashhur asarlari bilan tarixnavis adib, lirik shoir va ijtimoiy masalalar yechimiga oʻz hissasini qoʻshgan olim sifatida jahon hamjamiyatida oʻzining yuksak oʻrniga egaligi bilan bizga gʻurur va iftixor bagʻishlaydi.

Boburning tavallud kuni munosabati bilan oʻtkazilayotgan kechalar, konferetsiyalar, tadbirlar bobomizni yod etishga, uning boy merosini targʻib qilishga qaratilganligi bilan ahamiyatlidir. Shunday ekan, har bir Vatandoshimiz qalbida Bobur siymosini aardoqlab, uning boy merosini kelgusi avlodga etkazishga daxldor ekanligini chuqur his qilmogʻi lozim.

Tuman hokimligining Axborot xizmati.