Шоҳ ва шоир Бобур таваллудининг 540 йиллиги кенг нишонланди

Ҳар йили мамлакатимиздаги барча Олий, ўрта таълим ва мактабгача таълим муассасаларида 14 февраль− Заҳириддин Муҳаммад Бобурнинг таваллуд куни кенг тарзда нишонланади.

Буюк шоҳ ва шоир, давлат арбоби, мусиқашунос, олим, туркий, форсий, ва ҳинд тилида гўзал ашъорлар битган серқирра ижод соҳиби− Бобурнинг ҳаёт йўли барчага ибрат мактабидир.

Манғит шаҳрида жойлашган “Аму қуёши” нодавлат мактабгача таълим ташкилотида ҳам Заҳриддин Муҳаммад Бобур таваллудининг 540 йиллигига бағишлаб тадбир ташкил этилди.

Тадбирда сўзга чиққан нодавлат мактабгача таълим ташкилоти директори Сайёра Жумамуратова Бобур шахсиятининг мамлакатимизда ва умуман, жаҳон тарихи, маданиятидаги ўрни, навқирон авлод учун ибратли жиҳатлари, бу зот қолдирган бебаҳо маънавий мероснинг аҳамияти хусусида тўхталди.

Шундан сўнг, тарбияланувчилар томонидан тайёрланган гўзал рақслар намойиш қилинди.

Шунингдек, тадбирда 12 ёшдан бошлаб давлатни бошқарган буюк сиймонинг ҳаёт йўли давомида кўрган қийинчиликлари, бахтли кунлари, Ватан соғинчи акс этган саҳна кўринишлар намойиш этилди. Қолаверса, болажонлар буюк сиймонинг бетакрор ғазаллари ва рубоийларидан намуналар ўқиб, маъноларини шарҳлаб беришди.

Мактабгача таълим ташкилоти тарбияланувчиларининг катта инсонлардек фикр юритиши, ўзларини Бобурнинг издошлари дея ҳис қилиб, унинг дарди ва қувончини тўлиқ гавдалантириб бергани тадбирга ташриф буюрган ота-оналарда ҳам катта тассурот қолдирди. Айниқса, ҳинча ва андижонча рақслар икки элнинг неча юз йилларлан буён давом этиб келаётган дўстлик ришталарини яна бир бора гавдалантириб бергандек бўлди.

Тадбирда иштирок этган болажонлар буюк шоҳ ва шоирнинг Алишер Навоийдан кейинги бетакрор сиймо эканлигини янада теран ҳис қилдилар. Бобурнинг инсоний фазилатлари, олийжаноб ҳислатларини ўзларига ўрнак қилиб олдилар.

Дарҳақиқат, ўз она заминидан йироқда бутунлай бегона юртни макон тутган бобомиз тарқоқ ҳолдаги ҳинд қабилаларини бирлаштириб Бобурийлар империясига асос солди. Бор йўғи 47 йил умр кўрган бўлса ҳам, авлодларига битмас-туганмас маънавий хазина қолдирди. У ўзининг маълум ва машҳур асарлари билан тарихнавис адиб, лирик шоир ва ижтимоий масалалар ечимига ўз ҳиссасини қўшган олим сифатида жаҳон ҳамжамиятида ўзининг юксак ўрнига эгалиги билан бизга ғурур ва ифтихор бағишлайди.

Бобурнинг таваллуд куни муносабати билан ўтказилаётган кечалар, конферециялар, тадбирлар бобомизни ёд этишга, унинг бой меросини тарғиб қилишга қаратилганлиги билан аҳамиятлидир. Шундай экан, ҳар бир Ватандошимиз қалбида Бобур сиймосини аардоқлаб, унинг бой меросини келгуси авлодга этказишга дахлдор эканлигини чуқур ҳис қилмоғи лозим.

Туман ҳокимлигининг Ахборот хизмати.