Jayxun Ilhomlari

Oila – muqaddas

Oilada kam-koʻstlik boʻlarkan, lekin,

Bir kun janjal boʻlsa, qirq kun begona.

Quyoshi charogʻon yurtimda, biling,

Oila – muqaddas, Vatan – yagona!

 

Kichkina mamlakat qonuni, muhri,

Podshohi, navkari – ota va ona.

Dillardan ketmagay muhabbat mehri,

Oila – muqaddas, Vatan – yagona!

 

Ahil oilaga olis samodan,

Havas-la boqarkan oʻzga sayyora.

Orzular lochini oʻtsa ham oydan,

Oila – muqaddas, Vatan – yagona!

 

Shu aziz tuprogʻim yuzida, ana,

Marvarid shodasi qilar tarona.

O, bunday obod yurt qayda bor yana,

Oila – muqaddas, Vatan – yagona!

 

Kelajak egasi – oʻgʻil-qizlarim,

Oliy dargohlarda bugun talaba.

Farzandlar kamolin koʻrajak yurtim,

Oila – muqaddas, Vatan – yagona!

Odil ShOMURODOV.

 

Hamma narsa oʻtkinchi

bu dunyoda

Yaxshilik qil, qoʻldan kelsa odamga,

Davlat kelsa, aylanmagin yomonga.

Yoʻldosh boʻlma, aqli yoʻq bir nodonga,

Hamma narsa oʻtkinchi bu dunyoda.

 

Saqlagin sen yaxshilikni har onda,

Oqil boʻlsang rizo ota-onang-da.

Kir boʻlmasin aslo koʻngil xonang-da,

Hamma narsa oʻtkinchi bu dunyoda.

 

Bir kun ketar qazo yetsa odam-da,

Oʻylamaydi, buni koʻplar chamamda.

Tuzaladi, yurakdagi yarang-da,

Hamma narsa oʻtkinchi bu dunyoda.

 

Yaxshi niyat qilsang yaxshi saharda,

Birov haqin solma aslo qozonga.

Yaxshi odam qoʻl urmaydi haromga,

Hamma narsa oʻtkinchi bu dunyoda.

 

Otga minsang, qolma birdan oʻzgarib,

Toyib ketma vaʼdalarni zoʻr berib.

Yaxshi-yomon farqlanadi kun kelib,

Hamma narsa oʻtkinchi bu dunyoda.

 

Inson adashadi, qoqilar oyoq,

Biroq yolgʻon aytish baridan uyat.

Bir-birovdan aslo emasdir ziyod,

Hamma narsa oʻtkinchi bu dunyoda.

Angsatbay QARAJANOV, huquqshunos.

Qoraqalpoq tilidan Oygul Rajabova tarjimasi.

 

Umid

Men tingladim qalbim aytgan buyrugʻin,

Men oʻyladim baxtni mitti bu boshda.

Dunyo bozoridan biroz olib tin,

Hayotim kuyladim oʻn sakkiz yoshda.

 

Qishloqni tark etib, orzular tomon,

Bir qadam tashladim, qarab oldinga.

Dilimda jarohat bitmadi hamon,

Baxtli lahzalarim hali oldinda.

 

Ketyapman ergashib ziyo yoʻlidan,

Zulmatni oʻgʻirdi quyoshli samo.

Ming yillar shamolning tutib qoʻlidan,

Falakda boʻlaman uchib men – havo.

 

Izladim, madorim yetgancha mehr,

Topdim, oʻzga yaqin, aziz odamdan.

Allohni osmonday sevaman axir,

Nur tushar yoʻlimga kichkina shamdan.

 

Baxtli lahzalarim hali oldinda...

Sunnatulla Ahmadjon.

Vatanni eʼzozlang!

Eʼzozlaylik oʻtgan har kunni,

Tinchlikda oʻtgan damni.

Va qadrlab aziz odamni,

Ardoqlaylik ona Vatanni.

        

Mahallalar obod, sarishta,

Necha millat yashaydi inoq.

Har kun oʻtar tinch-osoyishta,

Oʻzbekiston osmoni porloq.

 

Tuprogʻini eʼzozlasak kam,

Qancha mehr bersak hamki kam.

Vatanini ardoqlayotgan,

Farzandidan minnatdor Vatan.

Shohruh FAYZULLAYeV,

21-maktab oʻquvchisi.

 

"Men dadamga oʻxshamayman"

(Er-xotin ajrashdi,

goʻdak yetim qoldi...)

Murgʻak qalbim parchalab,

Yarim koʻnglim timdalab,

Bilmam, kimdan oʻpkalab,

Dadam bizni tashlab ketdi.

 

Bolaligim jilovlandi,

Shodlik uyim ham buzildi.

Onajonim koʻp ezildi,

Dadam bizni tashlab ketdi.

 

Ukam hali juda yosh-da,

Eslolmaydi oʻng-u tushda.

Oʻyinqaroq bir bola-da,

Dadam bizni tashlab ketdi.

 

Eh dadalar, siz dadalar,

Bizga kerak lahzalar –

Bolalikning koʻchalarin,

Begona qilgan dadalar.

 

Katta boʻlsam oʻzim aslo,

Men dadamga oʻxshamayman,

Unga oʻxshab xiyonatning,

Koʻchasidan hech yurmayman.

 

Tunda onam yum-yum yigʻlar,

Uxlanglar, deb bizga qarar.

Jajji yuragim ezilar,

Dadam bizni tashlab ketdi.

 

Oʻrtoqlarim koʻp kamsitar,

Tashlandiq deb yerga urar.

Bigiz qilib barmogʻini,

Dadasi yoʻq, deb koʻrsatar.

 

Koʻzgusiga qarab olib,

Yigʻlayapti bir kun onam.

"Xunukmanmi, shuncha, - deya, –

Koʻzlarimga tordir olam..."

 

Men eshikning tirqishidan,

Moʻraladim sekin arang.

Oyoq-qoʻlim jonsiz boʻlib,

Pichirladim: "goʻzal onam".

 

Yetimlikning koʻchasida,

Dilim mening ozorlandi.

Oʻsdim onam yelkasida,

Dadam bizni tashlab ketdi...

Zuhra Ahmedova.

 

Oqibat

Muvaffaqiyatga erishsa odam,

"Oʻzgaribsan", deb tan olmaydi.

Lek orqaga tashlasang qadam,

"Endi doʻstim holing voy", deydi.

Gar koʻksingga tekkanda shamol,

Parvonadir, senga ular.

Mushkulingni koʻrsalar darhol,

Yuzi xomush, ichida kular.

Yilda bir bor yoʻqlamay turib,

Oqibatdan ertaklar yasar!

Xoh oʻsarsan, xoh qularsan!?

Nima boʻlsa, oʻzing koʻrarsan.

Shu ketishda ketsa oqibat,

Murdangni ham oʻzing koʻmarsan...

Mansurbek Ollamberganov,

TDTU talabasi.

 

Eʼzozaxon singlimga

Mening jajji singlim bor,

Xumor koʻz, qoshi yoyim.

Goʻzallikda begʻubor,

Singiljonim muloyim.

 

Unga teng kela olmas,

Dunyolarning goʻzali.

Tishi dur, misli olmos,

Nur sochadi yuzlari.

Habiba FarhOdova,

21-maktab oʻquvchisi.

 

Kelinni asrang!

Kelinga zarda qilmang,

U birovning bolasi.

Qahr sochib kamsitmang,

Asralgan gul – lolasi.

 

Uni asrab-avaylang,

Avlodlar davomchisin.

Ishga koʻmib tashlamang,

Bu hayot ilhomchisin.

Xursandbek Maʼrifatov,

38-maktab oʻquvchisi.