Жайхун Илҳомлари

Оила – муқаддас

Оилада кам-кўстлик бўларкан, лекин,

Бир кун жанжал бўлса, қирқ кун бегона.

Қуёши чароғон юртимда, билинг,

Оила – муқаддас, Ватан – ягона!

 

Кичкина мамлакат қонуни, муҳри,

Подшоҳи, навкари – ота ва она.

Диллардан кетмагай муҳаббат меҳри,

Оила – муқаддас, Ватан – ягона!

 

Аҳил оилага олис самодан,

Ҳавас-ла боқаркан ўзга сайёра.

Орзулар лочини ўтса ҳам ойдан,

Оила – муқаддас, Ватан – ягона!

 

Шу азиз тупроғим юзида, ана,

Марварид шодаси қилар тарона.

О, бундай обод юрт қайда бор яна,

Оила – муқаддас, Ватан – ягона!

 

Келажак эгаси – ўғил-қизларим,

Олий даргоҳларда бугун талаба.

Фарзандлар камолин кўражак юртим,

Оила – муқаддас, Ватан – ягона!

Одил ШОМУРОДОВ.

 

Ҳамма нарса ўткинчи

бу дунёда

Яхшилик қил, қўлдан келса одамга,

Давлат келса, айланмагин ёмонга.

Йўлдош бўлма, ақли йўқ бир нодонга,

Ҳамма нарса ўткинчи бу дунёда.

 

Сақлагин сен яхшиликни ҳар онда,

Оқил бўлсанг ризо ота-онанг-да.

Кир бўлмасин асло кўнгил хонанг-да,

Ҳамма нарса ўткинчи бу дунёда.

 

Бир кун кетар қазо етса одам-да,

Ўйламайди, буни кўплар чамамда.

Тузалади, юракдаги яранг-да,

Ҳамма нарса ўткинчи бу дунёда.

 

Яхши ният қилсанг яхши саҳарда,

Биров ҳақин солма асло қозонга.

Яхши одам қўл урмайди ҳаромга,

Ҳамма нарса ўткинчи бу дунёда.

 

Отга минсанг, қолма бирдан ўзгариб,

Тойиб кетма ваъдаларни зўр бериб.

Яхши-ёмон фарқланади кун келиб,

Ҳамма нарса ўткинчи бу дунёда.

 

Инсон адашади, қоқилар оёқ,

Бироқ ёлғон айтиш баридан уят.

Бир-бировдан асло эмасдир зиёд,

Ҳамма нарса ўткинчи бу дунёда.

Ангсатбай ҚАРАЖАНОВ, ҳуқуқшунос.

Қорақалпоқ тилидан Ойгул Ражабова таржимаси.

 

Умид

Мен тингладим қалбим айтган буйруғин,

Мен ўйладим бахтни митти бу бошда.

Дунё бозоридан бироз олиб тин,

Ҳаётим куйладим ўн саккиз ёшда.

 

Қишлоқни тарк этиб, орзулар томон,

Бир қадам ташладим, қараб олдинга.

Дилимда жароҳат битмади ҳамон,

Бахтли лаҳзаларим ҳали олдинда.

 

Кетяпман эргашиб зиё йўлидан,

Зулматни ўғирди қуёшли само.

Минг йиллар шамолнинг тутиб қўлидан,

Фалакда бўламан учиб мен – ҳаво.

 

Изладим, мадорим етганча меҳр,

Топдим, ўзга яқин, азиз одамдан.

Аллоҳни осмондай севаман ахир,

Нур тушар йўлимга кичкина шамдан.

 

Бахтли лаҳзаларим ҳали олдинда...

Суннатулла Аҳмаджон.

Ватанни эъзозланг!

Эъзозлайлик ўтган ҳар кунни,

Тинчликда ўтган дамни.

Ва қадрлаб азиз одамни,

Ардоқлайлик она Ватанни.

        

Маҳаллалар обод, саришта,

Неча миллат яшайди иноқ.

Ҳар кун ўтар тинч-осойишта,

Ўзбекистон осмони порлоқ.

 

Тупроғини эъзозласак кам,

Қанча меҳр берсак ҳамки кам.

Ватанини ардоқлаётган,

Фарзандидан миннатдор Ватан.

Шоҳруҳ ФАЙЗУЛЛАЕВ,

21-мактаб ўқувчиси.

 

"Мен дадамга ўхшамайман"

(Эр-хотин ажрашди,

гўдак етим қолди...)

Мурғак қалбим парчалаб,

Ярим кўнглим тимдалаб,

Билмам, кимдан ўпкалаб,

Дадам бизни ташлаб кетди.

 

Болалигим жиловланди,

Шодлик уйим ҳам бузилди.

Онажоним кўп эзилди,

Дадам бизни ташлаб кетди.

 

Укам ҳали жуда ёш-да,

Эслолмайди ўнг-у тушда.

Ўйинқароқ бир бола-да,

Дадам бизни ташлаб кетди.

 

Эҳ дадалар, сиз дадалар,

Бизга керак лаҳзалар –

Болаликнинг кўчаларин,

Бегона қилган дадалар.

 

Катта бўлсам ўзим асло,

Мен дадамга ўхшамайман,

Унга ўхшаб хиёнатнинг,

Кўчасидан ҳеч юрмайман.

 

Тунда онам юм-юм йиғлар,

Ухланглар, деб бизга қарар.

Жажжи юрагим эзилар,

Дадам бизни ташлаб кетди.

 

Ўртоқларим кўп камситар,

Ташландиқ деб ерга урар.

Бигиз қилиб бармоғини,

Дадаси йўқ, деб кўрсатар.

 

Кўзгусига қараб олиб,

Йиғлаяпти бир кун онам.

"Хунукманми, шунча, - дея, –

Кўзларимга тордир олам..."

 

Мен эшикнинг тирқишидан,

Мўраладим секин аранг.

Оёқ-қўлим жонсиз бўлиб,

Пичирладим: "гўзал онам".

 

Етимликнинг кўчасида,

Дилим менинг озорланди.

Ўсдим онам елкасида,

Дадам бизни ташлаб кетди...

Зуҳра Аҳмедова.

 

Оқибат

Муваффақиятга эришса одам,

"Ўзгарибсан", деб тан олмайди.

Лек орқага ташласанг қадам,

"Энди дўстим ҳолинг вой", дейди.

Гар кўксингга текканда шамол,

Парвонадир, сенга улар.

Мушкулингни кўрсалар дарҳол,

Юзи хомуш, ичида кулар.

Йилда бир бор йўқламай туриб,

Оқибатдан эртаклар ясар!

Хоҳ ўсарсан, хоҳ қуларсан!?

Нима бўлса, ўзинг кўрарсан.

Шу кетишда кетса оқибат,

Мурдангни ҳам ўзинг кўмарсан...

Мансурбек Олламберганов,

ТДТУ талабаси.

 

Эъзозахон синглимга

Менинг жажжи синглим бор,

Хумор кўз, қоши ёйим.

Гўзалликда беғубор,

Сингилжоним мулойим.

 

Унга тенг кела олмас,

Дунёларнинг гўзали.

Тиши дур, мисли олмос,

Нур сочади юзлари.

Ҳабиба ФарҳОдова,

21-мактаб ўқувчиси.

 

Келинни асранг!

Келинга зарда қилманг,

У бировнинг боласи.

Қаҳр сочиб камситманг,

Асралган гул – лоласи.

 

Уни асраб-авайланг,

Авлодлар давомчисин.

Ишга кўмиб ташламанг,

Бу ҳаёт илҳомчисин.

Хурсандбек Маърифатов,

38-мактаб ўқувчиси.