HOKIM YoRDAMChISI AHOLIGA HISOBOT BERDI

Shu kunlarda Amudaryo tumanining barcha ovul va mahalla fuqarolar yigʻinlarida faoliyat olib boruvchi hokim yordamchilarining 2022-yil davomida amalga oshirgan ishlari sarhisob etilib, joriy 2023-yil uchun yangi rejalarini belgilab olish maqsadida hisobot yigʻilishlari boʻlib oʻtmoqda. Ana shunday hisobot yigʻilishi Farovon mahalla fuqarolar yigʻinida ham oʻtkazildi.

Hisobot yigʻilishida Farovon MFY raisi Madamin Kazakov, MFY yoshlari yetakchisi Shohruh Roʻzmatov hamda profilaktika inspektori Rufat Matnazarov, mahalla faollari va yoshlar, hududda faoliyat olib boruvchi tadbirkorlar ishtirok etdilar.

Ochiqlik va shaffoflik asosida oʻtgan yigʻilishda kun tartibidagi asosiy masala – mahallada faoliyat olib boruvchi hokim yordamchisi Muqaddas Beknazarovaning 2022-yil davomida amalga oshirgan ishlari va 2023-yil uchun belgilangan rejalar yuzasidan hisoboti tinglandi. Unga koʻra, hokim yordamchisining mahalla aholisi hayotiga oid muammolarni tizimli hal etish, “ Temir daftar”, “Ayollar daftari”, “Yoshlar daftari”ga kiritilgan fuqarolar bilan ishlashishdagi faoliyatiga alohida eʼtibor qaratildi. Xususan, mahallada hokim yordamchisining shaxsiy tashabbusi va begʻaraz yordami bilan aholi bandligini taʼminlashga qaratilgan rejaviy tadbirlar ishlab chiqilib, yangidan issiqxonalar tashkil etildi. Tozalangan ichimlik suv shoxobchasi barpo qilindi. Farovon va Yakka tut koʻchalarining 1,7 km. qismiga shagʻal-tosh yotqizildi. Mahalla hududidagi uzunligi 10 metr boʻlgan koʻprikning himoya qismi homiylik yordami va hashar yoʻli bilan taʼmirlandi. “Yashil makon” umummilliy loyihasi doirasida mahalla bogʻi tashkil etildi. Shuningdek, hududda texnika va texnologiya yoʻnalishlarida faoliyat olib boruvchi tadbirlarlik subʼektlari tashkil etilib, “Temir daftari”, “Ayollar daftari”, “Yoshlar daftari”ga kiritilgan oilalar aʼzolarining doimiy ish bilan bandligi taʼminlandi.

“Temir daftar” roʻyxatiga kiritilgan fuqaro Muxtor Kamolovga “Saxovat va koʻmak” jamgʻarmasi hisobidan yangidan turar joy qurib berildi. “Ayollar daftari”ning 3-toifasida roʻyxatda turuvchi Feruza Allaberganova va Rigena Fozilbekovalarning uyi sifatli taʼmirdan chiqarildi. Shuningdek, 13 nafar ishsiz fuqarolarga dehqon xoʻjaligi yuritishlari uchun sharoit yaratilib, 2,5 gektar yer ajratib berilishiga koʻmaklashildi. Tikuvchilik yoʻnalishida oʻz tadbirkorligini boshlash istagida boʻlgan ayol-qizlar oʻqitildi va ularga subsidiyalar ajratilib, tikuv mashinalari olib berildi.

Shuningdek, yakka tadbirkor Gulfiya Xudoyberganova mahallada “Xudoyberganova Gulfiya Gulmirzayevna” oilaviy bolalar bogʻchasini tashkil etdi.

Jami 407 mln. soʻmlik mazkur loyihani amalga oshirishda tadbirkorning 250 mln. soʻmlik oʻz mablagʻiga qoʻshimcha ravishda hokim yordamchisining koʻmagi bilan 157 mln. soʻmlik bank krediti ham yoʻnaltirildi. Mazkur MTT tashkil etilishi bilan mahalladagi 5 nafar ayol-qizning doimiy bandligi taʼminlandi.

Shuningdek, 33 mln. soʻmlik imtiyozli kredit mablagʻi hisobiga tashkil etilgan “Asaloy” goʻzallik salonida ham 5 nafar ishsiz yoshlarning bandligi taʼminlandi.

Hokim yordamchisining hisobotida qayd etilishicha, homiylarni jalb qilgan holda kam taʼminlangan oilalarni qoʻllab-quvvatlash, ularni ijtimoiy himoyalashga alohida eʼtibor qaratilmoqda. 2022-yil davomida aynan shu maqsadlar uchun 9,5 mln. soʻm mablagʻ ajratilib, 6 ta oilaga zarur oziq-ovqat mahsulotlari yetkazib berildi. Oʻtgan qisqa fursat ichida turli muammoli masalalar boʻyicha 200 nafar fuqaro qabul qilinib, ularning murojaatlari puxta oʻrganish orqali ijobiy hal etilishiga koʻmaklashildi.

Hisobot yigʻilishida Muqaddas Beknazarovaning maʼruzasi yuzasidan muzokaralarda Farovon MFY raisi M.Kazakov, yoshlar yetakchisi Shohruh Roʻzmatov va boshqalar ishtirok etishib, oʻtgan qisqa davr ichida hokim yordamchisining koʻmagi bilan amalga oshirilgan ishlar haqida oʻz fikrlarini bildirdilar. Shu bilan birga aholi murojaatlari bilan tizimli ravishda ishlash borasidagi kamchiliklarni bartaraf etish boʻyicha ham fikr-mulohazalarini, tavsiyalarini bayon etdilar.

Hisobot yigʻilishi davomida mahalla faollari va yoshlari Farovon mahallasi hududini yanada rivojlantirish, aholi farovonligini taʼminlashga qaratilgan taklif va tashabbuslarini ham oʻrtaga tashladilar. Yigʻilish ishtirokchilari hokim yordamchisi Muqaddas Beknazarovaning 2022-yildagi faoliyatini qoniqarli deb hisobladilar va 2023-yilga belgilangan rejalar yuzasidan oʻz taklif va tavsiyalarini ham bildirdilar.

Hisobot yigʻilishi yakunida hokim yordamchisining 2023-yil uchun belgilangan yangi ish rejasi bir ovozdan tasdiqlab olindi.

Robiya YOʻLDOShEVA.