ҲОКИМ ЁРДАМЧИСИ АҲОЛИГА ҲИСОБОТ БЕРДИ

Шу кунларда Амударё туманининг барча овул ва маҳалла фуқаролар йиғинларида фаолият олиб борувчи ҳоким ёрдамчиларининг 2022 йил давомида амалга оширган ишлари сарҳисоб этилиб, жорий 2023 йил учун янги режаларини белгилаб олиш мақсадида ҳисобот йиғилишлари бўлиб ўтмоқда. Ана шундай ҳисобот йиғилиши Фаровон маҳалла фуқаролар йиғинида ҳам ўтказилди.

Ҳисобот йиғилишида Фаровон МФЙ раиси Мадамин Казаков, МФЙ ёшлари етакчиси Шоҳруҳ Рўзматов ҳамда профилактика инспектори Руфат Матназаров, маҳалла фаоллари ва ёшлар, ҳудудда фаолият олиб борувчи тадбиркорлар иштирок этдилар.

Очиқлик ва шаффофлик асосида ўтган йиғилишда кун тартибидаги асосий масала – маҳаллада фаолият олиб борувчи ҳоким ёрдамчиси Муқаддас Бекназарованинг 2022 йил давомида амалга оширган ишлари ва 2023 йил учун белгиланган режалар юзасидан ҳисоботи тингланди. Унга кўра, ҳоким ёрдамчисининг маҳалла аҳолиси ҳаётига оид муаммоларни тизимли ҳал этиш, “ Темир дафтар”, “Аёллар дафтари”, “Ёшлар дафтари”га киритилган фуқаролар билан ишлашишдаги фаолиятига алоҳида эътибор қаратилди. Хусусан, маҳаллада ҳоким ёрдамчисининг шахсий ташаббуси ва беғараз ёрдами билан аҳоли бандлигини таъминлашга қаратилган режавий тадбирлар ишлаб чиқилиб, янгидан иссиқхоналар ташкил этилди. Тозаланган ичимлик сув шохобчаси барпо қилинди. Фаровон ва Якка тут кўчаларининг 1,7 км. қисмига шағал-тош ётқизилди. Маҳалла ҳудудидаги узунлиги 10 метр бўлган кўприкнинг ҳимоя қисми ҳомийлик ёрдами ва ҳашар йўли билан таъмирланди. “Яшил макон” умуммиллий лойиҳаси доирасида маҳалла боғи ташкил этилди. Шунингдек, ҳудудда техника ва технология йўналишларида фаолият олиб борувчи тадбирларлик субъектлари ташкил этилиб, “Темир дафтари”, “Аёллар дафтари”, “Ёшлар дафтари”га киритилган оилалар аъзоларининг доимий иш билан бандлиги таъминланди.

“Темир дафтар” рўйхатига киритилган фуқаро Мухтор Камоловга “Саховат ва кўмак” жамғармаси ҳисобидан янгидан турар жой қуриб берилди. “Аёллар дафтари”нинг 3-тоифасида рўйхатда турувчи Феруза Аллаберганова ва Ригена Фозилбековаларнинг уйи сифатли таъмирдан чиқарилди. Шунингдек, 13 нафар ишсиз фуқароларга деҳқон хўжалиги юритишлари учун шароит яратилиб, 2,5 гектар ер ажратиб берилишига кўмаклашилди. Тикувчилик йўналишида ўз тадбиркорлигини бошлаш истагида бўлган аёл-қизлар ўқитилди ва уларга субсидиялар ажратилиб, тикув машиналари олиб берилди.

Шунингдек, якка тадбиркор Гулфия Худойберганова маҳаллада “Худойберганова Гулфия Гулмирзаевна” оилавий болалар боғчасини ташкил этди.

Жами 407 млн. сўмлик мазкур лойиҳани амалга оширишда тадбиркорнинг 250 млн. сўмлик ўз маблағига қўшимча равишда ҳоким ёрдамчисининг кўмаги билан 157 млн. сўмлик банк кредити ҳам йўналтирилди. Мазкур МТТ ташкил этилиши билан маҳалладаги 5 нафар аёл-қизнинг доимий бандлиги таъминланди.

Шунингдек, 33 млн. сўмлик имтиёзли кредит маблағи ҳисобига ташкил этилган “Асалой” гўзаллик салонида ҳам 5 нафар ишсиз ёшларнинг бандлиги таъминланди.

Ҳоким ёрдамчисининг ҳисоботида қайд этилишича, ҳомийларни жалб қилган ҳолда кам таъминланган оилаларни қўллаб-қувватлаш, уларни ижтимоий ҳимоялашга алоҳида эътибор қаратилмоқда. 2022 йил давомида айнан шу мақсадлар учун 9,5 млн. сўм маблағ ажратилиб, 6 та оилага зарур озиқ-овқат маҳсулотлари етказиб берилди. Ўтган қисқа фурсат ичида турли муаммоли масалалар бўйича 200 нафар фуқаро қабул қилиниб, уларнинг мурожаатлари пухта ўрганиш орқали ижобий ҳал этилишига кўмаклашилди.

Ҳисобот йиғилишида Муқаддас Бекназарованинг маърузаси юзасидан музокараларда Фаровон МФЙ раиси М.Казаков, ёшлар етакчиси Шоҳруҳ Рўзматов ва бошқалар иштирок этишиб, ўтган қисқа давр ичида ҳоким ёрдамчисининг кўмаги билан амалга оширилган ишлар ҳақида ўз фикрларини билдирдилар. Шу билан бирга аҳоли мурожаатлари билан тизимли равишда ишлаш борасидаги камчиликларни бартараф этиш бўйича ҳам фикр-мулоҳазаларини, тавсияларини баён этдилар.

Ҳисобот йиғилиши давомида маҳалла фаоллари ва ёшлари Фаровон маҳалласи ҳудудини янада ривожлантириш, аҳоли фаровонлигини таъминлашга қаратилган таклиф ва ташаббусларини ҳам ўртага ташладилар. Йиғилиш иштирокчилари ҳоким ёрдамчиси Муқаддас Бекназарованинг 2022 йилдаги фаолиятини қониқарли деб ҳисобладилар ва 2023 йилга белгиланган режалар юзасидан ўз таклиф ва тавсияларини ҳам билдирдилар.

Ҳисобот йиғилиши якунида ҳоким ёрдамчисининг 2023 йил учун белгиланган янги иш режаси бир овоздан тасдиқлаб олинди.

Робия ЙЎЛДОШЕВА.